Skip to content

Skip to secondary menu

Olketa Jehovah’s Witness

Solomon Islands Pidgin

Jesus Dae for Wanem?

Jesus Dae for Wanem?

Ansa from Bible

Jesus dae mekem olketa man kasem forgiveness for sin bilong olketa and savve kasem laef olowe. (Rome 6:​23; Ephesus 1:7) Dae bilong Jesus showimaot tu hao man savve faithful nomata hem kasem barava hard taem.​—Hebrew 4:​15.

Tingim olketa gud samting wea kamaot from dae bilong wanfala man.

  1. Jesus dae mekem iumi kasem “forgiveness for sin bilong iumi.”​—Colossae 1:​14.

    Taem God wakem Adam firstaem hem perfect. Nomata olsem Adam chus for no obeyim God. Wei wea hem no obey affectim evri pikinini bilong hem. Bible sei: “From wanfala man no obeyim God, diswan mekem staka pipol sin.”​—Rome 5:​19.

    Jesus hem perfect. No eni taem hem duim sin. Dastawe hem fit for givim “sakrifaes for olketa sin bilong iumi.” (1 John 2:2) From Adam hem no obey, evriwan kasem sin. From Jesus hem obey, evriwan wea showimaot faith long sakrifaes bilong hem, bae kasem forgiveness for sin bilong olketa.

    Hem olsem Adam salem olketa man for sin. Bat Jesus hem peim olketa bak taem hem willing for dae for olketa. From datwan, Bible sei “sapos eniwan hem sin, wanfala man wea raeteous hem stap for helpem iumi, wea hem nao Jesus Christ wea stap witim Dadi long heven.”​—1 John 2:1.

  2. Jesus hem dae “mekem evriwan wea showimaot faith long hem no dae bat kasem laef olowe.”​—John 3:​16.

    Jehovah wakem Adam for laef olowe, bat from hem sin hem dae. From Adam no obey, “sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.”​—Rome 5:​12.

    Dae bilong Jesus savve aotem sin, and tu, olketa wea showimaot faith long hem bae kasem laef olowe. Bible sei: “Sin and dae hem rul olsem king. Olsem tu, wei bilong God for kaen tumas hem rul olsem king mekem hem savve ting long pipol olsem olketa raeteous. Diswan hem for mekem pipol savve kasem laef olowe bikos long Lord bilong iumi Jesus Christ.”​—Rome 5:​21.

    Long distaem olketa man no savve laef longtaem. Nomata olsem, God promis for givim laef olowe long olketa wea raeteous and for resurrectim olketa wea dae mekem olketa kasem gud samting from sakrifaes bilong Jesus.​—Psalm 37:29; 1 Corinth 15:22.

  3. Jesus “obeyim God nomata gogo hem dae.” Diswan showimaot man savve faithful long God nomata hem kasem hard taem.​—Philippi 2:8.

    Nomata Adam perfect, hem no obeyim God bikos hem laekem samting wea hem no bilong hem. (Genesis 2:​16, 17; 3:6) Bihaen, Satan wea hem main enemy bilong God, talem hao evri man bae no obeyim God sapos olketa kasem hard taem. (Job 2:4) Nomata olsem, Jesus obeyim God and gohed faithful nomata hem kasem shame and hem safa taem hem dae. (Hebrew 7:​26) Diswan barava showimaot man savve faithful long God nomata hem kasem eni hard.

Olketa kwestin abaotem dae bilong Jesus

  • Why nao Jesus mas safa and dae for olketa man? Why nao God no finisim wei for dae nomoa?

    Law bilong God sei “pei wea sin givim hem dae.” (Rome 6:​23) God no haedem disfala law from Adam, bat hem talem Adam hem bae dae sapos hem no obey. (Genesis 3:3) Taem Adam sin, toktok bilong God, “wea no savve laea,” hem kamap tru nao. (Titus 1:2) Adam mekem evri pikinini bilong hem no for kasem sin nomoa, bat dae tu.

    Evri man fit for dae nomoa, bat God hem “kaen tumas.” (Ephesus 1:7) God sendem Jesus for sakrifaesim perfect laef bilong hem. Datwan hem fitim olketa law bilong God and hem showimaot mercy bilong hem.

  • Jesus dae long wanem taem?

    Jesus dae long “mek-naen hour” bihaen sun kamap, or samting olsem thri klok long aftanun long Pasova bilong olketa Jew. (Mark 15:33-​37, footnote) Datfala taem hem semsem witim Friday, April 1, 33 C.E., fitim calendar long distaem.

  • Long wea nao Jesus dae?

    Olketa killim Jesus long ples wea long Hebrew olketa kolem Golʹgo·tha” wea minim “Bon bilong Hed. (John 19:17, 18) Disfala ples hem “aotsaed long gate” long Jerusalem long taem bilong Jesus. (Hebrew 13:12) Maet ples hia hem stap antap hill, from Bible sei samfala “standap farawe lelebet and lukluk kam” taem olketa killim dae Jesus. (Mark 15:40) Nomata olsem olketa no really savve wea nao disfala ples Golgotha hem stap distaem.

  • Hao nao Jesus dae?

    Nomata staka pipol sei Jesus hem dae long cross, Bible sei: “Hem karem olketa sin bilong iumi long body bilong hem long wanfala tree.” (1 Peter 2:​24, King James Version) Olketa wea raetem Bible iusim tufala Greek word stau·rosʹ and xyʹlon for storyim samting wea olketa killim Jesus long hem. Staka savveman sei tufala word hia minim nomoa wanfala pis timba or post wea standap stret.

  • Hao nao iumi shud Celebratem dae bilong Jesus?

    Long naet bilong Pasova bilong olketa Jew, Jesus startim disfala celebration witim olketa disaepol bilong hem, and hem komandim olketa: “Gohed for duim diswan for showimaot iufala rememberim mi.” (1 Corinth 11:24) Bihaen samfala hour olketa killim dae Jesus.

    Olketa wea raetem Bible comparem dae bilong Jesus witim sheepsheep wea olketa sakrifaesim long taem bilong Pasova. (1 Corinth 5:7) Pasova wea olketa Israelite celebratem long bifor hem mekem olketa tingim wei wea olketa kamap free from wei for slave. Taem olketa Christian celebratem dae bilong Jesus hem mekem olketa for tingim hao dae bilong Jesus Christ mekem olketa for free from sin and dae. Pasova wea olketa savve garem long Nisan 14 bifor olketa duim evri year. Olketa Christian tu celebratem dae bilong Jesus wanfala taem evri year.

    Evri year, long date wea semsem olsem Nisan 14, staka pipol evriwea long world bae celebratem dae bilong Jesus.