Skip to content

HELP FOR FAMILI

Taem Hasband and Waef Garem Difren Tingting

Taem Hasband and Waef Garem Difren Tingting

Samfala taem problem savve kamap between olketa hasband and waef bikos olketa garem difren tingting, wei, and wanem olketa interest lo hem. Bat samfala nara samting savve kamap wea tufala no agree lo hem, olsem olketa samting hia:

  • Haomas taem for spendem witim olketa relative

  • Hao for iusim selen

  • For garem pikinini or nomoa

Wanem nao bae iutufala duim sapos iutufala no garem sem tingting abaotem wanfala samting?

 Wanem iu shud savve

Nomata iutufala fitim each other datwan no minim iutufala barava semsem lo evri samting. Nomata hasband and waef stap gud tugeta, samfala taem bae tufala no garem sem tingting and maet hem abaotem olketa important samting tu.

“Start lo taem mi smol, famili blo mi barava klos. Lo olketa weekend, mifala savve go visitim olketa grani, uncle, aunty, and olketa kasin. Bat famili blo hasband blo mi no savve spendem staka taem tugeta. So mitufala savve garem difren tingting abaotem haomas taem for spendem witim famili or for story witim olketa relative wea stap farawe.”—Tamara.

“Mi and waef blo mi garem difren tingting abaotem wei for spendem selen bikos lo wanem parents blo mifala lanem mifala. Lo first tu-thri month bihaen mitufala marit, mitufala savve raoa abaotem datwan. Mitufala mas story staka taem, then mitufala just agree.”—Tyler.

Tufala man savve lukluk lo sem samting bat tufala savve garem difren tingting abaotem datwan. Hem semsem tu taem wanfala problem kamap and hasband and waef garem difren tingting

Nomata maet tufala willing for changem tingting, samfala taem problem stap yet. Olsem example, maet wanfala klos relative hem sik and hem needim samwan for lukaftarem hem. Or maet wanfala lo tufala laek garem pikinini bat narawan nomoa. *

“Mi and waef blo mi story raonem sapos mitufala bae garem pikinini. Luk olsem hem laekem tumas for garem pikinini and tingting blo mitufala start for barava difren nao. Mi no savve faendem eni wei for mi agree lo datwan.”—Alex.

Nomata sapos iutufala garem difren tingting, datwan no minim marit blo iutufala bae nogud. Samfala savveman sei sapos iu and marit partner blo iu no savve agree abaotem wanfala serious samting, iu shud traem evri difren kaen wei for mekem hem followim tingting blo iu and sapos nomoa iu shud lusim marit partner blo iu. Bat wei for duim olsem hem showimaot man hem tinghae tumas lo tingting blo hemseleva and hem no tingim promis wea hem mekem lo marit partner blo hem for stap olowe witim hem nomata lo taem wea hem no isi tu.

 Wanem iu savve duim

Disaed strong for keepim marit promis blo iu. Sapos iu duim datwan, bae hem helpem iu and marit partner blo iu for waka tugeta olsem wanfala team for stretem olketa problem.

Bible principle: “No eni man mas aotem samting wea God joinim finis.”—Matthew 19:6.

Ting raonem hao samting bae affectim iutufala. Olsem example, wanem nao bae iutufala duim sapos wanfala lo iutufala laek garem pikinini bat narawan nomoa? Hem gud for tingim olketa samting hia:

  • Hao strong nao marit blo iutufala?

    Waswe, iutufala evriwan luksavve wei for lukaftarem pikinini savve mekem man stress and datwan maet kosim problem sapos iutufala no fren gud?

  • Olketa responsibility blo parents.

    Parents mas provaedem kaikai, kaleko, and ples for stap for olketa pikinini, bat olketa mas duim moa samting tu.

  • Waswe, iutufala garem inaf selen.

    Waswe, iu savve waka, lukaftarem famili, and lukaftarem olketa nara responsibility tu?

Bible principle: “Sapos eniwan long iufala laek for wakem wanfala taoa, hem mas ting raonem firstaem haomas selen nao hem needim.”—Luke 14:28.

Ting raonem evri nara samting. Maet iutufala savve stretem samfala samting wea iutufala no agree lo hem. Olsem example, sapos wanfala lo iutufala laek garem pikinini bat narawan nomoa, maet wan wea no laek for garem pikinini savve tingim olketa kwestin hia:

  • ‘Taem mi sei, mi no laek garem pikinini, waswe, datwan minim mi no enitaem laek garem pikinini or mi just no laek garem pikinini distaem nomoa?’

  • ‘Waswe, mi no laek garem pikinini bikos mi wari nogud mi no savve kamap gudfala parent?’

  • ‘Waswe, mi wari marit partner blo mi bae no tingim mi bihaen mitufala garem pikinini?’

And marit partner wea laek garem pikinini savve ting raonem olketa kwestin hia:

  • ‘Waswe, mitufala redi for lukaftarem pikinini?’

  • ‘Waswe, mitufala garem inaf selen for lukaftarem wanfala pikinini?’

Bible principle: “Wisdom from heven hem mekem man for. . . no forcem tingting bilong hem.”—James 3:17.

Tingim olketa gudfala idea wea marit partner blo iu garem. Tufala man savve lukluk lo sem samting bat tufala savve garem difren tingting abaotem datwan. Hem semsem tu for wanfala hasband and waef. Taem olketa lukluk lo wanfala problem, olketa savve garem difren tingting abaotem datfala samting, olsem example, taem olketa story abaotem wei for spendem selen. Bifor iutufala story abaotem samting wea iutufala no agree lo hem, story raonem olketa samting wea iutufala agree lo hem.

  • Olketa wanem goal nao iutufala agree lo hem?

  • Olketa wanem gud idea nao iutufala evriwan garem?

  • For helpem marit blo iutufala gohed strong, waswe, wanfala savve changem tingting blo hem or iutufala evriwan savve duim datwan?

Bible principle: “Man mas no tingim hemseleva nomoa, bat hem mas tingim nara pipol tu.”—1 Corinth 10:24.

^ par. 14 Tufala shud story raonem olketa important kwestin bifor tufala marit. Nomata olsem, samfala taem samting hem happen or maet hasband or waef changem tingting blo hem.—Eklesiastes 9:11.