Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER FIFTIN

Worship wea God Acceptim

Worship wea God Acceptim
  • Waswe, God acceptim evri religion?

  • Hao nao iumi fit for luksavve long tru religion?

  • Hu nao olketa tru worshiper bilong God long earth distaem?

1. Wanem gud samting nao iumi bae kasem sapos iumi worshipim God long stretfala wei?

JEHOVAH GOD barava tingim iumi and hem laekem iumi for kasem gud samting from loving direction bilong hem. Sapos iumi worshipim hem long stretfala wei, iumi bae hapi and bae missim plande problem. Bae iumi garem tu blessing and help bilong hem. (Isaiah 48:17) Bat plande handred religion talem hao olketa teachim tru samting abaotem God. Nomata olsem, each religion teachim difren samting abaotem hu nao God and wanem hem laekem iumi for duim.

2. Hao nao iumi savve lanem stretfala wei for worshipim Jehovah, and wanem example nao helpem iumi for minim diswan?

2 Hao nao bae iu fit for savve long stretfala wei for worshipim Jehovah? Iu no need for studyim olketa teaching bilong evri religion and then trae for savve long which teaching nao hem stret. Only samting iu need for duim hem for lanem really samting wea Bible hem teachim abaotem tru worship. Olsem example: Long plande kantri, pipol for raverave mekem olketa laea selen. Sapos wanfala bank givim iu waka for lukluk long evri selen and trae for faendem olketa laea wan, hao bae iu duim datwan? Waswe, bae iu trae for rememberim lukluk bilong evri difren kaen laea selen wea pipol wakem? Nomoa. Bae hem moabeta sapos iu lukluk gud long olketa really selen and savve gud long lukluk bilong olketa. Bihaen iu barava savve long lukluk bilong really selen, bae iu fit for  luksavve long laea selen. Olsem tu, taem iumi lane hao for luksavve long religion wea tru, bae iumi luksavve tu long olketa religion wea false.

3. Olsem Jesus talem, wanem nao iumi mas duim sapos iumi laekem God for acceptim iumi?

3 Hem important for iumi worshipim Jehovah long wei wea hem acceptim. Long tingting bilong plande pipol, God acceptim evri religion, bat Bible no teachim datwan. Hem no inaf tu for just sei iumi wanfala Christian. Jesus hem sei: “No evriwan wea sei long mi, ‘Lord, Lord,’ bae go insaed long kingdom bilong heven, bat man wea duim will bilong Dadi bilong mi long heven nao bae go insaed.” So for mekem God acceptim iumi, iumi mas lanem wanem nao God laekem iumi for duim, and then duim datwan. Jesus kolem olketa wea no duim will bilong God, ‘pipol for brekem law.’ (Matthew 7:21-23) False religion hem olsem laea selen bikos hem no savve givim eni gud samting long iumi. For tok stret, religion olsem hem spoelem man.

4. Samting Jesus talem abaotem tufala road hem minim wanem, and tufala road hia lead go long wea nao?

4 Jehovah givim evriwan long earth chance for kasem laef olowe. Bat for kasem laef olowe long Paradaes, iumi mas worshipim God long stretfala wei and duim olketa samting wea mekem hem hapi. Sorre tumas, staka no willing for duim datwan. Hem nao why Jesus hem sei: “Go insaed long gate wea no waed; bikos road wea lead go long dae hem big tumas and waed, and plande pipol nao go insaed long hem; bat samfala nomoa faendem datfala gate and road wea lead go long laef, bikos datfala gate hem no waed, and datfala road hem no isi for wakabaot long hem.” (Matthew 7:13, 14) Tru religion leadim pipol go long laef olowe. False religion leadim pipol go long wei for finis evribit. Jehovah no laekem eniwan for dae, dastawe hem givim evriwan chance for lane abaotem hem. (2 Peter 3:9) So wei wea iumi worshipim God hem important bikos sapos God acceptim worship bilong iumi bae iumi laef, bat sapos nomoa, bae iumi dae.

 HAO FOR LUKSAVVE LONG TRU RELIGION

5. Hao nao iumi fit for luksavve long olketa wea followim tru religion?

5 Hao nao iumi savve faendem ‘datfala road wea lead go long laef’? Jesus talem hao samting wea pipol duim nao bae showimaot olketa followim religion wea tru. Hem sei: “From frut bilong olketa iufala bae luksavve long olketa.” Hem sei tu: “Evri gudfala tree hem garem gudfala frut.” (Matthew 7:16, 17) So pipol bae luksavve long olketa bilong tru religion from olketa biliv and fasin bilong olketa. Nomata olketa no perfect, and olketa savve duim olketa mistek, olketa tru worshiper laek for duim will bilong God. Bae iumi lukim sixfala samting wea bae helpem iumi for luksavve long hu nao followim tru religion.

6, 7. Hao nao olketa servant bilong God ting long Bible, and wanem nao Jesus duim wea showimaot hem garem sem tingting?

6 Olketa servant bilong God teachim nomoa samting wea Bible talem. Bible hem sei: “Evri scripture hem kam from God and hem gud for teachim man, for givim kaonsel, for stretem evri samting, and for givim discipline long raeteous wei, mekem man [or woman] bilong God hem fit evribit, barava redi for duim evri gudfala waka.” (2 Timothy 3:16, 17) Aposol Paul hem sei olsem long olketa nara Christian: “Taem iufala kasem toktok bilong God, wea iufala herem from mifala, iufala acceptim datwan, no olsem toktok bilong man, bat, olsem toktok bilong God.” (1 Thessalonians 2:13) So olketa biliv bilong olketa long tru religion no followim tingting or kastom bilong olketa man. Samting olketa bilivim hem kam from Word bilong God, Bible.

7 Jesus Christ showimaot stretfala example bikos evri teaching bilong hem kam from Word bilong God. Hem prea long Dadi bilong hem long heven and sei: “Word bilong iu nao truth.” (John 17:17) Jesus bilivim Word bilong God, and evri samting hem teachim barava followim samting wea Bible talem. Plande taem, Jesus hem sei: “Olketa raetem finis.” (Matthew 4:4, 7, 10) Then Jesus bae talem toktok  bilong wanfala scripture. Olsem tu, pipol bilong God distaem no teachim tingting bilong olketa seleva. Olketa bilivim hao Bible hem Word bilong God, and olketa teachim nomoa samting wea Bible talem.

8. Wanem nao insaed wei for worshipim Jehovah?

8 Olketa wea followim tru religion worshipim Jehovah nomoa and talem pipol abaotem nem bilong hem. Jesus hem sei: “Iu mas worshipim God bilong iu, Jehovah, and iu mas servem hem nomoa.” (Matthew 4:10) So olketa servant bilong God worshipim Jehovah nomoa, no eni nara God. Insaed diswan hem for talem pipol abaotem nem bilong tru God and olketa fasin bilong hem. Psalm 83:18 hem sei: “Iu, wea nem bilong iu Jehovah, iu nomoa Most Hae ovarem full earth.” Jesus showimaot example bilong wei for helpem olketa narawan savve long God, taem hem sei olsem long prea: “Mi mekem olketa man wea iu givim mi from disfala world savve long nem bilong iu.” (John 17:6) Olsem tu, olketa tru worshiper distaem teachim olketa narawan abaotem nem bilong God, olketa plan bilong hem, and olketa fasin bilong hem.

9, 10. Long olketa wanem wei nao olketa tru Christian showimaot love long each other?

9 Pipol bilong God showimaot love long each other wea tru and wea no selfish. Jesus hem sei: “Sapos iufala lovem each other, evriwan bae savve iufala nao olketa disaepol bilong mi.” (John 13:35) Olketa first Christian garem love olsem for each other. Pipol wea showimaot love wea followim olketa Bible principle no letem wei wea olketa narawan kam from difren tribe, living, or kantri, for spoelem wei wea olketa stap gud witim olketa. Kaen love olsem hem mekem pipol for barava garem wan mind and stap gud tugeta. (Colossians 3:14) Olketa bilong false religion no garem wan mind and love for each other olsem. Hao nao iumi savve long datwan? Olketa killim dae olketa bilong sem religion bat wea kam from difren tribe or kantri. Olketa tru Christian no killim dae olketa Christian brata bilong olketa, or eni narawan. Bible hem sei: “Olketa pikinini bilong God and olketa pikinini bilong Devil  showaot long disfala samting: Olketa wea no gohed for duim raeteous fasin, and wea no lovem brata bilong hem, no kam from God. . . . Iumi mas garem love for each other; no olsem Cain, wea hem kam from datfala wicked wan and wea killim dae brata bilong hem.”1 John 3:10-12; 4:20, 21.

10 Bat moa samting hem insaed wei for showimaot love. Olketa tru Christian willing for iusim taem, strong, and samting olketa garem for helpem and encouragem each other. (Hebrews 10:24, 25) Olketa helpem each other for deal witim olketa problem, and olketa honest long each other. Tru nao, olketa followim datfala kaonsel long Bible for “duim gud samting long evriwan.”Galatians 6:10.

11. Why nao hem important for acceptim Jesus Christ olsem man wea God iusim for sevem iumi?

11 Olketa tru Christian acceptim Jesus Christ nao olsem man wea God iusim for sevem iumi. Bible hem sei: “Salvation no kam thru long eni narawan, from no eni nem moa anda long heven midolwan olketa man wea savve mekem wei for iumi sev.” (Acts 4:12) Long Chapter 5, iumi lanem hao Jesus givim laef bilong hem olsem wanfala sakrifaes for pipol wea obey. (Matthew 20:28) And tu, Jesus hem King wea God markem for Kingdom long heven wea bae rulim full earth. And for kasem laef olowe, God laekem iumi for obeyim Jesus and followim olketa teaching bilong hem. Hem nao why Bible hem sei: “Man wea showimaot faith long Son bae laef olowe; man wea no obeyim Son bae no laef.”John 3:36.

12. Wanem wei nao olketa tru worshiper no part bilong world?

12 Olketa tru worshiper no part bilong world. Jesus hem sei olsem long Pilate, datfala bigman bilong Rome: “Kingdom bilong mi hem no part bilong disfala world.” (John 18:36) Nomata wanem kantri nao olketa stap long hem, olketa tru follower bilong Jesus stap anda long Kingdom bilong hem long heven and barava no saedem eni sekson bilong politik. Olketa no join insaed olketa war and faet. Bat olketa worshiper bilong Jehovah no trae for stopem nara pipol wea  laek for joinim wanfala sekson bilong politik, kamap wanfala minister insaed gavman, or vote. Olketa tru worshiper bilong God obeyim law tu. Why nao olsem? Bikos Word bilong God komandim olketa for “stap anda long olketa gavman.” (Romans 13:1) Taem gavman askem pipol for duim samting wea againstim samting wea God talem iumi for duim, olketa tru worshiper followim example bilong olketa aposol, wea sei: “Mifala mas obeyim God olsem ruler winim olketa man.”Acts 5:29; Mark 12:17.

13. Hao nao tingting bilong olketa tru follower bilong Jesus abaotem Kingdom bilong God, and from diswan, wanem nao olketa duim?

 13 Olketa tru follower bilong Jesus talemaot hao Kingdom bilong God nao hem only hope for olketa man. Jesus hem sei: “Olketa bae preachim disfala gud nius bilong kingdom evriwea long earth for givim witness long evri nation; and then end bae kam.” (Matthew 24:14) Olketa tru follower bilong Jesus Christ no encouragem pipol for depend long olketa gavman for stretem olketa problem bilong olketa, bat olketa talemaot hao Kingdom bilong God long heven nao hem only hope wea olketa man garem. (Psalm 146:3) Jesus teachim iumi for prea for datfala perfect gavman taem hem sei: “Mekem Kingdom bilong iu kam. Mekem will bilong iu kamap long heven and long earth.” (Matthew 6:10) Word bilong God talem hao datfala Kingdom long heven “bae smasem and finisim evri kingdom hia [wea hem nao olketa kingdom distaem], and hem nomoa bae stap for olowe.”Daniel 2:44.

14. Long tingting bilong iu, wanem religion nao hem showimaot olketa mark bilong tru worship?

14 Taem iu tingim evri samting hia, askem iuseleva: ‘Wanem religion nao hem teachim nomoa samting wea Bible teachim and talem pipol abaotem nem bilong Jehovah? Wanem religion nao hem showimaot kaen love wea God talem olketa Christian for garem, showimaot faith long Jesus, no part bilong world, and talemaot hao Kingdom bilong God nao hem only hope for olketa man? Taem iumi tingim evri religion long world, which wan nao hem duim evri samting hia?’ Hem klia hao datfala religion hem Olketa Jehovah’s Witness.Isaiah 43:10-12.

WANEM NAO BAE IU DUIM?

15. Wanem moa God laekem iumi for duim?

15 For mekem God hapi, hem no inaf for biliv long God nomoa. Nomata olketa demon tu bat bilivim hao God hem stap. (James 2:19) Bat hem klia hao olketa no duim will bilong God, and tu, God no acceptim olketa. For God acceptim iumi, iumi mas biliv long hem, and tu, iumi mas duim will bilong  hem. Iumi mas separatem iumiseleva tu from false worship and strong for followim tru worship.

16. Sapos iumi tekpart insaed false religion, wanem nao iumi shud duim?

16 Aposol Paul showimaot hao iumi mas no tekpart insaed false worship. Hem sei: “So dastawe Jehovah hem sei: ‘Sapos iufala go aot from midolwan long olketa, and separatem iufala seleva, and no tasim samting wea no klin, mi bae acceptim iufala.’” (2 Corinthians 6:17; Isaiah 52:11) So olketa tru Christian no duim eni samting wea join witim false worship.

17, 18. Wanem nao “Bigfala Babylon,” and why nao iumi mas no delay for “go aot from hem”?

17 Bible showimaot hao olketa difren kaen false religion hem part bilong “Bigfala Babylon.” * (Revelation 17:5) Datfala nem mekem iumi tingim datfala taon bilong Babylon bifor, wea hem nao ples wea false religion hem start bihaen long Flood long taem bilong Noah. Plande teaching bilong olketa false religion distaem kam from Babylon bifor. Olsem example, olketa long Babylon bifor worshipim olketa trinity god. Distaem, main teaching bilong plande religion hem Trinity. Bat Bible talemaot klia hao only wanfala tru God hem stap, Jehovah, and Jesus Christ hem Son bilong hem. (John 17:3) Olketa long Babylon bifor bilivim tu hao olketa man garem wanfala soul wea no savve dae and wea lusim body bihaen hem dae, and savve stap long ples for safa. Distaem, klosap evri religion teachim hao soul, wea samfala kolem datwan spirit, no savve dae and hem savve safa long hellfire.

18 From worship long Babylon bifor hem spred go long evri ples long earth, hem stret for sei Bigfala Babylon distaem hem stand for evri false religion long world. And God talem finis hao olketa false religion hia bae seknomoa finis. (Revelation 18:8) Waswe, iu minim nao why hem important for separatem iuseleva from evri part bilong Bigfala Babylon? Jehovah  God laekem iu for “go aot from hem” kwiktaem, bifor hem tu leit.Revelation 18:4.

Taem iu servem Jehovah witim pipol bilong hem iu kasem staka moa samting winim wanem iu lusim

19. Wanem gud samting nao iu bae kasem from wei for servem Jehovah?

19 From iu disaed for no followim false religion, maet samfala no laek for kaban witim iu. Bat nomata maet iu lusim olketa fren and olketa nara samting from wei wea iu servem Jehovah witim pipol bilong hem, bae iu kasem staka moa samting winim wanem iu lusim. Olsem olketa disaepol bilong Jesus bifor wea lusim olketa samting for mekem olketa savve followim hem, gogo bae iu garem staka spiritual brata and sista. Iu bae part bilong wanfala big famili bilong plande million tru Christian evriwea long world wea showimaot tru Christian love. And iu bae garem datfala nambawan hope for kasem laef olowe “long niu world wea bae kam.” (Mark 10:28-30) Maet gogo, olketa wea lusim iu bikos long biliv bilong iu bae interest long samting Bible hem teachim and kamap olketa worshiper bilong Jehovah.

20. Olketa wea followim tru religion bae kasem wanem samting long future?

20 Bible teachim hao klosap nao God bae finisim disfala wicked world and changem witim wanfala raeteous niu world anda long Kingdom bilong hem. (2 Peter 3:9, 13) Datwan bae wanfala nambawan world! And long datfala raeteous niu world, wanfala religion nomoa bae stap. Datwan bae worship wea stret. Iu bae wise sapos iu duim wanem iu need for duim for mekem iu savve kaban and worship witim olketa tru worshiper distaem.

^ par. 17 For moa information abaotem why Bigfala Babylon piksarem evri false religion long world, lukim Appendix wea garem title “Wanem Nao ‘Bigfala Babylon?’