SAPOS iu lukim wanfala niuspepa, bae iu lukim staka report abaotem terrorism, war, and crime. Tingim tu olketa hevi and wari wea iuseleva garem. Maet iu wari or barava sorre from wanfala famili member or fren bilong iu hem sik or dae. Maet iu garem sem feeling olsem datfala gud man Job wea talem hao laef bilong hem “fulap witim wei for safa.”Job 10:15.

Askem iuseleva:

  • Waswe, hem nao samting wea God planim for mi and evri nara man?

  • Wea nao mi savve kasem help for deal witim olketa problem bilong mi?

  • Waswe, eni hope stap for iumi savve lukim peace long earth enitaem?

Bible givim olketa gudfala ansa for olketa kwestin hia.

 BIBLE TEACHIM HAO GOD BAE MEKEM OLKETA SAMTING HIA KAMAP LONG EARTH.

“Hem bae aotem krae from eye bilong olketa, and dae bae nomoa, sorre and singaot and pain bae nomoa tu.”Revelation 21:4

“Man wea cripple bae klaemap olsem wanfala deer.”Isaiah 35:6

“Eye bilong olketa wea blind bae open.”Isaiah 35:5

 “Evriwan long olketa grev wea God rememberim bae . . . kamaot.”John 5:28, 29

“No eniwan bae sei: ‘Mi sik.’”Isaiah 33:24

“Staka kaikai bae stap long earth.”Psalm 72:16

 KASEM GUD SAMTING FROM OLKETA TEACHING INSAED BIBLE

No kwiktaem for tingse hem bae hard for olketa samting hia kamap. God promis for duim olketa samting hia, and Bible explainim wei wea hem bae duim diswan.

Bat Bible duim moa samting winim datwan. Wei for followim Bible bae mekem iu savve barava enjoyim laef bilong iu distaem. Tingim olketa hevi and trabol wea iu garem distaem. Maet iu garem poor living, olketa problem long famili, sik, or wanfala famili member or fren bilong iu hem dae. Bible savve helpem iu deal witim olketa problem distaem, and hem savve helpem iu tu long wei wea hem ansarem olketa kwestin olsem:

  • Why nao iumi safa?

  • Hao nao iumi savve deal witim olketa wari and hevi?

  • Hao nao iumi savve mekem famili moa hapi?

  • Wanem nao happen long iumi taem iumi dae?

  • Waswe, bae enitaem iumi lukim moa olketa famili member and fren wea dae finis?

  • Hao nao iumi savve sure God bae duim samting wea hem promisim for future?

 Iu readim disfala buk bikos iu laek for savve long wanem Bible hem teachim. Disfala buk bae helpem iu. Lukim hao each page hem olketa kwestin for olketa paragraf. Plande million pipol enjoyim kaen wei for storyim Bible witim Olketa Jehovah’s Witness wea iusim olketa kwestin for kasem main point bilong olketa paragraf. Mifala hope iu bae enjoyim diswan tu. Jehovah bae blessim iu taem iu barava enjoyim wei for lanem really samting wea Bible teachim!