Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER WAN

Wanem Nao Truth Abaotem God?

Wanem Nao Truth Abaotem God?
  • Waswe, God really lovem iu?

  • Wanem nao olketa fasin bilong God? Waswe, hem garem nem?

  • Waswe, man savve fren gud witim God?

1, 2. Why nao plande taem hem gud for askem olketa kwestin?

IUMI savve hao hem wei bilong pikinini for askem staka kwestin. Plande start for askem olketa kwestin taem olketa start for toktok. Olketa savve askem olketa kwestin olsem: Wea nao sun hem go long naet? Wanem nao olketa laet long skae long naet? Hu nao teachim olketa bird for flae? Maet iu trae hard for givim ansa, bat plande taem hem no isi for ansarem kwestin bilong olketa. Nomata iu givim gudfala ansa, datwan savve mekem olketa for ask: Hao nao olsem?

2 Hem no olketa pikinini nomoa wea savve askem olketa kwestin. Taem iumi gohed for grow, iumi askem olketa kwestin tu. Iumi duim diswan for savve long wea nao for go, wanem nao olketa danger iumi need for stap klia long hem, and for mekem iumi savve long samting wea iumi interest long hem. Bat luk olsem plande pipol stop for askem olketa kwestin, especially olketa barava important kwestin, or maet olketa stop for lukaotem olketa ansa tu.

3. Why nao plande pipol stop for trae faendem ansa for olketa kwestin wea barava important?

 3 Ting raonem kwestin long kava bilong disfala buk, olketa kwestin long introduction, or olketa kwestin long start bilong disfala chapter. Olketa kwestin olsem, olketa moa important winim olketa nara kwestin wea iu savve askem. Nomata olsem, plande pipol givap for trae kasem ansa for olketa. Why nao olsem? Waswe, Bible garem olketa ansa hia? Samfala sei olketa ansa long Bible hard tumas for minim. Olketa narawan wari nogud wei for askem olketa kwestin bae mekem olketa feel shame. And samfala disaedem hao olketa leader and bigman bilong church nao only wan wea savve ansarem olketa kwestin olsem. Hao nao tingting bilong iu?

4, 5. Wanem nao samfala kwestin for askem wea moa important winim olketa nara kwestin, and why nao iumi shud lukaotem ansa for olketa?

4 For sure, iu bae interest for savve long ansa for olketa main important kwestin wea man savve tingim. Maet samfala taem iu ting raonem olketa samting and laek for savve: ‘Why nao iumi laef? Waswe, hem for born, laef for lelebet taem, and then dae? Wanem nao olketa fasin bilong God?’ Hem gud for askem olketa kwestin olsem, and hem important for no givap for trae faendem ansa go kasem taem wea iu faendem ansa wea iu fit for trustim and wea mekem iu satisfae. Datfala teacher wea staka savve long hem, Jesus Christ, hem sei: “Gohed for ask, and iufala bae kasem; gohed for lukaotem, and iufala bae faendem; gohed for noknok, and bae hem open for iufala.”—Matthew 7:7.

5 Sapos iu “gohed for lukaotem” ansa for olketa important kwestin, iu bae faendem olketa ansa hia. (Proverbs 2:1-5) Nomata sapos olketa narawan talem iu hem iusles for lukaotem olketa ansa, olketa ansa stap, and iu savve faendem olketa insaed long Bible. Olketa ansa no hard tumas for minim, and olketa savve mekem man hapi and givim hem hope. Olketa savve helpem iu for mekem laef bilong iu distaem hem samting wea iu satisfae long hem. Firstaem, iumi storyim wanfala kwestin wea mekem staka pipol konfius.

 WASWE, GOD LOVEM IUMI?

6. Why nao plande pipol tingse God hem no lovem iumi?

6 Long tingting bilong staka pipol, ansa hem nomoa. Olketa sei: ‘Sapos God hem lovem iumi world bae no garem olketa problem.’ Iumi lukim hao staka war, fasin for heit, and wei for safa hem gohed long world distaem. Iumi wanwan savve sik, safa, or barava sorre from fren or famili member bilong iumi hem dae. Dastawe plande savve talem olsem: ‘Sapos God hem lovem iumi and tingim olketa problem wea iumi garem, hem bae no letem olketa samting olsem for happen!’

7. (a) Hao nao olketa bigman bilong religion mekem plande pipol for tingse God no lovem pipol? (b) Wanem nao really samting wea Bible hem teachim abaotem olketa hard taem wea iumi kasem?

7 Samting wea barava nogud, hem hao samfala taem, olketa bigman bilong religion nao mekem pipol tingse God no lovem iumi. Hao nao olsem? Taem seknomoa barava nogud samting kasem pipol, olketa bigman hia sei datwan hem will bilong God. So olketa blamem God nao for olketa nogud samting wea happen. Waswe, samting olketa talem hem tru? Wanem nao really samting wea Bible teachim? James 1:13 hem sei: “Taem man hem kasem test, hem no fit for sei, ‘God nao testim mi.’ From man no savve testim God witim nogud samting and God tu no testim eniwan.” So no enitaem nao God hem kosim olketa nogud samting wea iumi lukim long world for happen. (Job 34:10-12) Hem tru, hem letem olketa nogud samting for happen. Bat wei for letem samting happen, hem barava difren from wei for kosim datwan.

8, 9. (a) Wanem example nao hem showim hao wei for letem wicked fasin gohed hem difren from wei for kosim datwan? (b) Why nao hem no stret for sei God hem rong for letem olketa man duim olketa nogud samting?

8 Olsem example, tingim wanfala wise and loving Dadi wea son bilong hem wea big finis still stap long haos. Taem son hem start for bighed and disaed for lusim famili, dadi no stopem hem. Son bilong hem aftarem olketa nogud samting, and gogo, hem kasem trabol nao. Waswe, dadi nao kosim olketa problem wea son kasem? Nomoa. (Luke 15:11-13) Long sem  wei, God no stopem olketa man taem olketa chus for duim nogud samting, bat hem no kosim olketa problem wea kamaot from datwan tu. So bae hem no stret for blamem God for trabol wea olketa man kasem.

9 God garem olketa gudfala reason for letem olketa man duim olketa nogud samting. From hem Creator bilong iumi wea wise and garem bigfala paoa, hem no need for explainim long iumi olketa reason for why hem duim samting. Bat from hem lovem iumi, hem explainim diswan. Bae iu lanem moa samting abaotem olketa reason hia long Chapter 11. Bat iumi savve trustim hao God no mekem iumi kasem olketa problem hia. Samting hem duim nao, hem givim iumi only hope wea iumi savve depend long hem for finisim olketa nogud samting hia!—Isaiah 33:2.

10. Why nao iumi savve sure God bae finisim evri samting wea kamaot from nogud samting wea olketa man duim?

10 Nara samting for tingim tu, hem wei wea God hem holy. (Isaiah 6:3) Diswan minim hem barava klin. Hem nating savve duim or tingim samting wea nogud. So iumi savve barava trustim hem. Bat iumi no savve trustim olketa man bikos samfala taem olketa duim samting wea no stret. Nomata man wea garem paoa hem savve barava honest, bat plande taem hem no garem paoa for stretem olketa nogud samting wea kamaot from wanem wicked pipol duim. Bat God garem moa paoa winim eniwan. Hem savve stretem bak olketa nogud samting wea kamaot from wicked fasin. Taem God duim samting for stretem diswan, hem bae duim diswan long wei wea bae finisim nogud samting for olowe!—Psalm 37:9-11.

HAO NAO TINGTING BILONG GOD ABAOTEM OLKETA SAMTING WEA NO STRET?

11. (a) Hao nao tingting bilong God abaotem olketa samting wea no stret? (b) Hao nao tingting bilong hem abaotem olketa hard taem wea iu kasem?

11 Go kasem datfala taem, hao nao tingting bilong God abaotem samting wea gohed long world and long laef bilong iu? First samting, Bible teachim hao God hem “lovem justice.”  (Psalm 37:28) So hem barava ting strong long standard bilong hem saed long wanem hem stret and wanem hem no stret. Hem heitim evri wei wea no stret. Bible hem sei ‘heart bilong God hem feel sorre’ taem world hem fulap witim pipol wea duim nogud samting bifor. (Genesis 6:5, 6) God hem no change. (Malachi 3:6) Hem still barava no laek for lukim wei wea pipol long world distaem olketa safa. Bible hem sei: ‘Hem lovem iu.’—1 Peter 5:7.

Bible teachim hao Jehovah hem Creator bilong universe wea showimaot love

12, 13. (a) Why nao iumi garem olketa gudfala fasin olsem love, and diswan mekem iumi ting hao long samting wea happen long world? (b) Why nao iu savve sure God bae barava stretem olketa problem long world?

12 Hao nao iumi savve sure God barava no laek for lukim man safa? Tingim diswan. Bible teachim hao God wakem man long image bilong hem. (Genesis 1:26) So iumi garem olketa gudfala fasin bikos God hem garem olketa gudfala fasin. Olsem example, waswe, iu feel nogud taem iu lukim gudfala pipol safa? Sapos iu feel nogud long olketa samting olsem wea no stret, iu savve sure hao God hem barava feel nogud.

13 Wanfala barava best samting abaotem iumi olketa man, hem wei wea iumi savve showimaot love. Diswan tu showimaot hao God wakem iumi long image bilong hem. Bible teachim iumi hao “God hem love.” (1 John 4:8) Iumi showimaot love bikos God showimaot love. Waswe, love bae muvim iu for finisim wei for safa and olketa samting wea no stret long disfala world sapos iu garem paoa for duim datwan? For sure iu bae duim datwan! Sapos olsem, iu savve sure tu hao God bae finisim wei for safa and olketa samting wea no stret. Olketa promis long introduction bilong disfala  buk, hem no olketa false hope nomoa. God bae duim samting wea hem promis for duim! Bat for iu garem faith long olketa promis hia, iu need for savve long moa samting abaotem God wea talem olketa promis olsem.

GOD LAEKEM IU FOR SAVVE LONG HEM

Taem iu laekem samwan for savve long iu, iu talem hem nem bilong iu. God talem iumi nem bilong hem insaed Bible

14. Hu nao nem bilong God, and why nao iumi shud iusim datwan?

14 Sapos iu laekem samwan for savve long iu, wanem nao bae iu duim? Iu bae talem hem nem bilong iu. Waswe, God garem nem tu? Plande religion sei nem bilong hem “God” or “Lord,” bat datwan no nem bilong God. “Lord” and “God” hem olketa title, olsem “king” and “prime minister” hem  olketa title. Bible teachim iumi hao God garem plande title. “God” and “Lord” nao tufala long olketa title bilong hem. Bat Bible teachim tu hao God garem nem: Jehovah. Psalm 83:18 hem sei: “Iu, wea nem bilong iu Jehovah, iu nomoa Most Hae ovarem full earth.” Sapos Bible bilong iu no garem datfala nem insaed, iu savve readim Appendix wea garem title “Mining Bilong Nem Bilong God and Wei for Iusim Datwan” bilong disfala buk for lanem why nao datwan hem olsem. Tru samting nao hem hao nem bilong God hem stap plande thousand taem insaed olketa barava old copy bilong Bible. So Jehovah laekem iu for savve long nem bilong hem and for iusim datwan. Hem iusim Bible for talem iumi abaotem hemseleva.

15. Wanem nao datfala nem Jehovah hem minim?

15 God givim hemseleva wanfala nem wea garem bigfala mining. Nem bilong hem, Jehovah, minim hem savve duim eni samting wea hem promis for duim or wea hem plan for  duim. * No eni nara nem garem sem mining olsem nem bilong hem. God nomoa fit for garem datfala nem. Long plande wei, Jehovah hem difren from evri narawan. Hao nao olsem?

16, 17. Wanem nao iumi lanem abaotem Jehovah from olketa title hia: (a) “Olmaeti wan”? (b) “King bilong olowe”? (c) “Creator”?

16 Iumi lukim finis hao Psalm 83:18 sei olsem abaotem Jehovah: “Iu nomoa Most Hae.” Olsem tu, Bible kolem Jehovah nomoa “datfala Olmaeti.” Revelation 15:3 hem sei: “Jehovah God, Olmaeti, olketa waka bilong iu barava nambawan. Olketa wei bilong iu raeteous and tru, King bilong olowe.” Datfala title “Olmaeti” teachim iumi hao no eniwan garem moa paoa winim Jehovah. And datfala title “King bilong olowe” remindim iumi hao Jehovah hem spesol and difren long nara wei tu. Evri nara samting wea laef garem start, bat no Jehovah. Psalm 90:2 hem sei: “From taem olowe go kasem taem olowe, iu nao God.” Datwan hem barava mekem iumi tinghae long hem!

17 Nara samting wea mekem Jehovah hem difren, hem wei wea hem nomoa Creator. Revelation 4:11 hem sei: “Iu nao fit, Jehovah, God bilong mifala, for kasem glory and honor and paoa, from iu creatim evri samting, and from will bilong iu nao evri samting hia stap and kamap.” Evri samting, olsem olketa angel long heven wea iumi no savve lukim, staka thousand star long skae, olketa naes frut wea grow, and olketa fish long sea and olketa river, Jehovah nao Man wea creatim olketa!

WASWE, IU SAVVE FREN GUD WITIM JEHOVAH?

18. Why nao samfala pipol tingse olketa bae nating savve fren gud witim God, bat wanem nao Bible hem sei?

18 Taem samfala read abaotem olketa nambawan fasin bilong Jehovah, hem mekem olketa no sure sapos olketa bae fit for fren witim God. Bat waswe, tingting olsem hem stret? Bible sei olsem abaotem Jehovah: “Hem no farawe from eniwan long iumi.” (Acts 17:27) And tu, Bible hem sei: ‘Fren gud witim God, and hem bae fren gud witim iu.’—James 4:8.

19. (a) Hao nao iumi savve start for fren gud witim Jehovah, and wanem gud samting nao bae iumi kasem from datwan? (b) Olketa wanem fasin bilong God nao iu barava laekem?

 19 Hao nao iu savve fren gud witim God? Firstaem, gohed for duim samting wea iu duim distaem, hem nao, for lane abaotem God. Jesus hem sei: “For kasem laef olowe, olketa mas kasem savve abaotem iu, datfala only tru God, and abaotem datwan wea iu sendem kam, Jesus Christ.” (John 17:3) Tru nao, Bible teachim iumi hao wei for lane abaotem Jehovah and Jesus savve mekem man kasem “laef olowe”! Olsem iumi storyim finis, “God hem love.” (1 John 4:16) Jehovah garem olketa nara barava naesfala fasin tu. Olsem example, Bible hem sei Jehovah hem “God wea garem mercy and kaenfala fasin, slow for kros, garem bigfala loving-kaeness, and barava tru evritaem.” (Exodus 34:6) Hem “gud and redi for forgive.” (Psalm 86:5) God hem patient. (2 Peter 3:9) Hem loyal. (Revelation 15:4) Taem iu read go moa insaed Bible, bae iu lukim hao Jehovah showimaot hem garem olketa fasin hia, and tu, plande nara fasin wea naes tumas.

20-22. (a) Waswe, wei wea iumi no savve lukim God mekem hem hard for iumi fren gud witim hem? Explainim hao nao olsem. (b) Wanem nao maet olketa narawan sei iu no need for duim, bat wanem nao iu shud duim?

20 Hem tru, iu no savve lukim God from hem wanfala spirit. (John 1:18; 4:24; 1 Timothy 1:17) Bat taem iu iusim Bible for lane abaotem hem, gogo bae iu savve gud long hem. Olsem datfala man for raetem psalm hem sei, iu savve “lukim olketa naesfala samting abaotem Jehovah.” (Psalm 27:4; Romans 1:20) Taem iu gohed for lanem moa samting abaotem Jehovah, bae iu barava savve gud long hem, and garem plande reason for lovem and fren gud witim hem.

Love wea wanfala Dadi savve garem for pikinini bilong hem showimaot bigfala love wea Dadi bilong iumi long heven garem for iumi

21 Iu bae isisi start for minim why Bible hem teachim iumi for ting long Jehovah olsem Dadi bilong iumi. (Matthew 6:9) Hem givim iumi laef, bat tu, olsem eni dadi, hem laekem iumi for garem barava gudfala laef. (Psalm 36:9)  Bible teachim tu hao God savve ting long man olsem fren bilong hem. (James 2:23) Tingim datwan—iu savve kamap fren bilong Creator bilong universe!

22 Taem iu gohed for lanem moa samting from Bible, maet iu lukim hao samfala wea no savve long why hem important for studyim Bible bae talem iu hao iu no need for duim datwan. Maet olketa wari nogud iu changem biliv bilong iu. Bat no letem eniwan stopem iu for garem wei for fren witim God, wea datwan hem spesol winim eni nara wei for fren wea iu savve garem.

23, 24. (a) Why nao iu shud gohed for askem olketa kwestin abaotem samting wea iu lanem? (b) Wanem nao next chapter bae storyim?

23 Hem tru, maet firstaem iu no minim samfala samting wea iu studyim. Maet iu need for hambol and ask for help, bat no hol bak from iu feel shame. Jesus sei hem gud for hambol, olsem wanfala pikinini. (Matthew 18:2-4) And iumi evriwan savve hao hem wei bilong pikinini for askem staka kwestin. God laekem iu for kasem olketa ansa. Bible hem praisem samfala wea barava interest for lane abaotem God. Olketa chekim gud olketa scripture for mek sure samting olketa lanem hem tru.—Acts 17:11.

24 Best wei for lane abaotem Jehovah hem for studyim gud Bible. Hem difren from evri nara buk. Long wanem wei? Next chapter bae storyim diswan.

^ par. 15 Nara information abaotem mining bilong nem bilong God and hao for talem datfala nem hem long Appendix wea garem title “Mining Bilong Nem Bilong God and Wei for Iusim Datwan.”