Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER THRI

Wanem Nao Plan Bilong God for Disfala Earth?

Wanem Nao Plan Bilong God for Disfala Earth?
  • Wanem nao plan bilong God for olketa man?

  • Long wanem wei nao Satan hem againstim God?

  • Laef long earth bae hao long future?

1. Wanem nao plan bilong God for disfala earth?

PLAN bilong God for earth hem barava nambawan. Jehovah laekem full earth for garem pipol wea hapi and wea healthy. Bible talem hao “God wakem wanfala naes ples long Eden” and hem “mekem grow . . . evri tree wea luk naes tumas and wea gud for kaikai.” Bihaen God creatim first man and woman, Adam and Eve, Hem givim datfala naes ples for olketa stap, and hem sei: “Garem plande pikinini and fulimap earth and lukaftarem.” (Genesis 1:28; 2:8, 9, 15) So hem plan bilong God for pipol garem pikinini and for isisi mekem full earth kamap olsem Eden, and for lukaftarem olketa animal.

2. (a) Hao nao iumi savve God bae duim samting wea hem planim for disfala earth? (b) Bible hem sei olketa wanem kaen pipol nao bae stap olowe long earth?

2 Hao nao tingting bilong iu, bae plan bilong Jehovah God for pipol stap long paradaes kamap tru? God hem sei: “Mi talem finis; mi bae mekem hem kamap tru.” (Isaiah 46:9-11; 55:11) Tru nao, God bae barava duim samting wea hem plan for duim! Hem talem hao hem “no creatim earth for stap nating,” bat hem ‘wakem for pipol stap long hem.’ (Isaiah 45:18) Wanem kaen pipol nao God laekem for stap long earth? And for hao long nao hem laekem olketa for stap? Bible hem sei: “Olketa wea raeteous bae  kasem earth olsem present, and olketa bae stap for olowe long hem.”Psalm 37:29; Revelation 21:3, 4.

3. Olketa wanem nogud samting nao gohed long earth distaem, and diswan hem mekem olketa wanem kwestin kamap?

3 Hem klia hao diswan no happen yet. Distaem, pipol savve sik and dae, and olketa savve faetem and killim dae narawan tu. Samting hem happen wea mekem diswan olsem. Bat hem no plan bilong God for earth bae nogud olsem! Wanem nao happen? Why nao God no duim samting wea hem plan for duim? No eni buk bilong man abaotem samting wea happen bifor savve explainim diswan bikos disfala problem hem start long heven.

WANFALA ENEMY KAMAP

4, 5. (a) Hu nao iusim wanfala snek for story long Eve? (b) Wanem nao samting wea savve mekem man wea honest and garem gudfala fasin, change and kamap man for steal?

4 First buk insaed Bible storyim hao samwan wea againstim God hem stap long Eden. Bible kolem hem “datfala snek,” bat hem no really wanfala animal. Last buk insaed Bible talem hao hem “datwan wea olketa kolem Devil and Satan, wea hem giamanim olketa man long full earth.” Bible kolem hem tu “datfala snek bilong bifor kam.(Genesis 3:1; Revelation 12:9) Disfala strong angel iusim wanfala snek for story long Eve. Hem duim diswan long wei for mekem hem luk olsem voice bilong hem kam from datfala snek. Masbi datfala angel stap taem God redyim earth for olketa man.Job 38:4, 7.

5 Bat evri samting wea Jehovah wakem hem perfect, so hu nao creatim disfala “Devil,” wea nara nem bilong hem “Satan”? Samting wea happen nao, wanfala spirit son bilong God mekem hemseleva for kamap datfala Devil. Hao nao olsem? Samfala taem, man wea honest and wea garem gudfala fasin savve change and kamap man for steal. Wanem nao mekem hem for change? Maet hem letem feeling for laek duim nogud samting grow insaed heart bilong  hem. Sapos hem gohed for tingim datwan, feeling for laek duim datwan savve barava strong tumas. Then sapos chance kamap, maet hem go for steal nao.James 1:13-15.

6. Hao nao wanfala strong spirit son bilong God kamap Satan and Devil?

6 Hem nao samting wea happen long Satan. Masbi Satan herem God talem Adam and Eve for garem olketa pikinini and for fulimap earth witim pipol. (Genesis 1:27, 28) Luk olsem hem start for sei long hemseleva: ‘Pipol hia savve worshipim mi, no worshipim God!’ So feeling for laekem samting wea rong hem kamap strong tumas long heart bilong hem. Gogo, hem trikim Eve taem hem talem olketa laea samting abaotem God. (Genesis 3:1-5) From diswan, hem kamap wanfala “Devil,” wea minim “Man for tok spoelem man.” And long semtaem, hem kamap “Satan,” wea minim “Man for againstim man.”

7. (a) Why nao Adam and Eve dae? (b) Why nao iumi olketa pikinini bilong Adam kamap olo and dae?

7 Satan iusim olketa laea and wei for trikim man for mekem Adam and Eve no obeyim God. (Genesis 2:17; 3:6) From diswan, gogo tufala dae, wea hem nao God sei bae happen sapos olketa no obey. (Genesis 3:17-19) From Adam lusim wei for perfect taem hem sin, evri pikinini bilong hem kasem sin tu. (Romans 5:12) Tingim example bilong wanfala tray for beikem bred. Sapos datfala tray hem bend, wanem nao bae happen long evri bred wea man beikem insaed datfala tray? Evri bred bae bend nao. Olsem tu, evri man kasem wei for no perfect from Adam. Hem nao why evri man kamap olo and dae.Romans 3:23.

8, 9. (a) Satan hem kwestinim wanem samting abaotem Jehovah? (b) Why nao God no stretawe distroem olketa hia wea againstim hem?

8 Satan leadim Adam and Eve for bighed againstim God taem hem kosim tufala for sin. Hem againstim wei wea Jehovah hem rul. So from diswan, hem olsem Satan hem sei: ‘God hem wanfala nogud ruler. Hem laea and hem  holem bak olketa gud samting from olketa wea stap anda long hem. Olketa man no needim God for rulim olketa. Olketa savve disaedem seleva samting wea gud and samting wea nogud. And olketa bae moa hapi sapos olketa stap anda long rul bilong mi.’ Hao nao bae God deal witim nogud wei wea Satan kwestinim rul bilong hem? Long tingting bilong samfala, hem fitim for God killim dae thrifala  hia wea againstim hem. Bat waswe, datwan bae ansarem olketa kwestin wea Satan hem mekem kamap? Waswe, datwan bae pruvim hao God hem rul long stretfala wei?

9 From Jehovah hem evritaem duim samting wea stret, hem kanduit for killim dae olketa hia stretawe. Hem luksavve hao hem bae tek taem for ansarem olketa kwestin bilong Satan and for barava pruvim hao Devil hem laea. So God disaedem hao hem bae letem olketa man for rulim olketa seleva for longtaem lelebet anda long Satan. Chapter 11 long disfala buk bae storyim why Jehovah duim datwan, and why hem weit for longfala taem bifor hem duim samting for stretem diswan. Bat iumi shud tingim diswan: No enitaem Satan duim gudfala samting for Adam and Eve, so waswe, hem stret for tufala bilivim samting wea hem talem? Jehovah givim tufala evri samting wea olketa garem, so waswe, hem stret for olketa bilivim hao Jehovah no tingim olketa and hem laea long olketa? Sapos iu nao Adam or Eve, wanem nao bae tingting bilong iu?

10. Hao nao iu savve sapotim rul bilong Jehovah and pruvim hao Satan hem laea?

10 Hem gud for tingim olketa kwestin hia bikos iumi wanwan feisim olketa sem kwestin distaem tu. Tru nao, iu garem chance for helpem Jehovah pruvim hao Satan hem laea taem iu acceptim Jehovah olsem Ruler bilong iu. (Psalm 73:28; Proverbs 27:11) Sorre nao, no staka pipol long disfala world chus for duim datwan. Diswan mekem wanfala important kwestin kamap, Waswe, Bible really teachim hao Satan nao man wea rulim world?

HU NAO RULIM WORLD?

Hard for Satan offerim evri kingdom bilong world long Jesus sapos hem no ownim olketa!

11, 12. (a) Hao nao wei wea Satan testim Jesus showimaot hem ruler bilong world? (b) Wanem nao nara samting wea pruvim Satan hem rulim world?

11 No enitaem Jesus daotem hao Satan hem rulim world.  Satan duim wanfala mirakol for showim long Jesus “evri kingdom bilong world and glory bilong olketa.” Then Satan hem promis olsem: “Evri samting hia mi bae givim long iu sapos iu baodaon and worshipim mi.” (Matthew 4:8, 9; Luke 4:5, 6) Tingim diswan. Sapos Satan no rulim olketa kingdom hia, waswe, hem savve offerim long Jesus tu? Jesus no denyim wei wea olketa gavman hia bilong Satan. For sure, Jesus bae duim datwan sapos Satan no really ruler bilong olketa.

12 Hem tru, Jehovah nao Olmaeti God, Man wea creatim evri samting. (Revelation 4:11) Nomata olsem, no eni scripture insaed Bible talem hao Jehovah God or Jesus Christ rulim world. Bat Jesus talem stret hao Satan hem “ruler bilong disfala world.” (John 12:31; 14:30; 16:11) And tu, Bible talem hao Satan hem “god bilong disfala world.” (2 Corinthians 4:3, 4) Aposol John hem sei olsem abaotem Satan wea againstim Jehovah: “Full world hem stap anda long paoa bilong wicked wan.”1 John 5:19.

HAO WORLD BILONG SATAN BAE FINIS

13. Why nao iumi needim wanfala niu world?

13 Winim enitaem bifor, staka danger samting gohed insaed world. Staka army faet long war, olketa bigman bilong politik no honest, olketa wea lead long olketa religion garem hypocrite fasin, and staka nogud criminal stap tu. Hard for eniwan mekem disfala world hem gud bak. Bible showimaot hao klosap nao God bae finisim disfala wicked world long war bilong hem, Armageddon. Diswan bae mekem wei for wanfala raeteous niu world hem kamap.Revelation 16:14-16.

14. Hu nao God chusim for kamap Ruler insaed Kingdom bilong Hem, and wanem nao Bible sei abaotem diswan?

14 Jehovah God chusim Jesus Christ for kamap Ruler insaed Kingdom bilong Hem long heven, wea datwan hem wanfala gavman. Long taem bifor kam, Bible hem sei:  “Wanfala pikinini hem born for iumi, iumi kasem wanfala son, and datfala gavman bae stap long shoulder bilong hem. And olketa bae kolem hem . . . Prince bilong Peace. Gavman bilong hem bae rul ovarem evri samting, and peace bae gohed for olowe.” (Isaiah 9:6, 7, King James Version) Jesus teachim olketa follower bilong hem for prea olsem abaotem disfala gavman: “Mekem kingdom bilong iu kam. Mekem will bilong iu kamap long heven and long earth.” (Matthew 6:10) Long wanfala chapter bihaen, iumi bae lanem hao klosap nao Kingdom bilong God bae aotem olketa gavman bilong disfala world, and hem nao bae rulim full world. (Daniel 2:44) Then Kingdom bilong God bae mekem earth kamap paradaes.

WANFALA NIU WORLD HEM KLOSAP NAO!

15. Wanem nao disfala “niu earth”?

15 Bible hem promis olsem: “Iumi weitim wanfala niu skae and wanfala niu earth wea hem promisim, wea evriwan bae garem raeteous fasin.” (2 Peter 3:13; Isaiah 65:17) Samfala taem, Bible iusim disfala word “earth” for minim pipol wea stap long earth. (Genesis 11:1) So disfala raeteous “niu earth” hem pipol wea God acceptim olketa.

16. Wanem nao wanfala nambawan present from God for olketa wea hem acceptim, and wanem nao iumi mas duim for kasem datwan?

16 Jesus promisim hao long niu world, olketa wea God acceptim bae kasem datfala present bilong “laef olowe.” (Mark 10:30) Plis lukim John 3:16 and 17:3, and readim samting wea Jesus sei iumi mas duim for kasem laef olowe. Distaem, tingim olketa blessing wea Bible storyim for olketa wea fit for kasem datfala nambawan present from God insaed Paradaes wea bae kam.

17, 18. Hao nao iumi savve sure evriwan long earth bae stap sef and garem peace?

17 Wicked fasin, war, crime, and raf fasin bae nomoa nao.  “Man wea wicked bae finis . . . Bat olketa wea garem kwaet fasin bae kasem earth olsem present.” (Psalm 37:10, 11) Peace bae gohed bikos ‘God bae finisim olketa war evriwea long earth.’ (Psalm 46:9; Isaiah 2:4) Then “man wea raeteous bae kamap, and bigfala peace bae gohed olowe olsem moon hem for olowe,” wea datwan hem minim peace bae gohed for olowe!Psalm 72:7.

18 Olketa wea worshipim Jehovah bae stap sef. Taem olketa Israelite bifor obeyim God, olketa stap sef. (Leviticus 25:18, 19) Bae hem nambawan for enjoyim wei for stap sef tu insaed Paradaes!Isaiah 32:18; Micah 4:4.

19. Hao nao iumi savve plande kaikai bae stap long niu world wea God bae mekem kamap?

19 No eniwan bae short long kaikai. Man wea raetem olketa psalm hem sei: “Staka kaikai bae stap long earth; antap long olketa maunten hem bae fulap witim kaikai.” (Psalm 72:16) Jehovah bae blessim pipol bilong hem wea raeteous, and “plande kaikai bae grow long earth.”Psalm 67:6.

20. Why nao iumi savve sure full earth bae kamap wanfala paradaes?

20 Full earth bae wanfala paradaes. Bae pipol wakem olketa niu haos and garden long ples wea distaem olketa wea sin spoelem. (Isaiah 65:21-24; Revelation 11:18) Isisi, olketa bae mekem full earth kamap wanfala paradaes wea luk naes tumas and wea evri samting hem grow gud olsem Eden. And God bae no fail for ‘openem hand bilong hem and givim long evri samting wea laef evri samting wea olketa laekem.’Psalm 145:16.

21. Hao nao iumi savve olketa animal and man bae stap gud tugeta?

21 Bae olketa man and animal stap gud tugeta. Olketa wild animal and olketa animal wea no wild bae kaikai tugeta. And nomata smol pikinini tu bat bae hem no fraet long olketa animal wea danger tumas distaem.Isaiah 11:6-9; 65:25.

22. Wanem nao bae happen long wei for sik?

 22 Sik bae finis. From Jesus hem Ruler insaed Kingdom bilong God long heven, hem bae healim evriwan wea laef, no just samfala pipol, olsem hem duim taem hem stap long earth bifor. (Matthew 9:35; Mark 1:40-42; John 5:5-9) Long datfala taem “no eniwan bae sei: ‘Mi sik.’”Isaiah 33:24; 35:5, 6

23. Why nao resurrection bae barava mekem iumi hapi?

23 Olketa famili member and fren wea dae finis bae laef bak and garem chance for no dae moa. Evriwan wea dae finis and wea God rememberim bae laef bak. Tru nao, “wanfala resurrection bae kamap for olketa wea raeteous and olketa wea no raeteous.”Acts 24:15; John 5:28, 29.

24. Hao nao tingting bilong iu abaotem chance for laef insaed Paradaes long earth?

24 Olketa wea chus for lane abaotem and servem Nambawan Creator bilong iumi, Jehovah God, bae garem barava gudfala future! Jesus hem storyim datfala Paradaes wea bae kam taem hem talem disfala promis long criminal wea dae witim hem: “Iu bae stap witim mi long Paradaes.” (Luke 23:43) Hem barava important for lanem moa samting abaotem Jesus Christ, bikos God iusim hem for mekem evri blessing hia kamap.