Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER EIT

Wanem Nao Kingdom Bilong God?

Wanem Nao Kingdom Bilong God?
  • Wanem nao Bible teachim iumi abaotem Kingdom bilong God?

  • Wanem nao Kingdom bilong God bae duim?

  • Wanem taem nao Kingdom bae mekem will bilong God kamap long earth?

1. Wanem prea wea staka pipol savve long hem nao bae iumi story raonem distaem?

PLANDE million pipol evriwea long world savve long prea wea staka kolem Lord’s Prea. Diswan hem wanfala example prea wea Jesus Christ givim. Hem wanfala prea wea talem olketa important samting, and wei for story raonem first thrifala samting wea Jesus talem long datfala prea bae helpem iu lanem moa samting abaotem wanem Bible hem really teachim.

2. Wanem nao thrifala samting wea Jesus teachim olketa disaepol bilong hem for askem long prea?

2 Long start bilong disfala prea, Jesus hem sei olsem long olketa wea lisin long hem: “Iufala mas prea olsem: ‘Dadi bilong mifala wea stap long heven, mifala laekem for evriwan mas ting long nem bilong iu olsem hem holy. Mekem kingdom bilong iu kam. Mekem will bilong iu kamap long heven and long earth.’” (Matthew 6:9-13) Why nao thrifala samting for askem hia hem important?

3. Iumi need for savve long wanem samting abaotem Kingdom bilong God?

3 Iumi lanem finis plande samting abaotem nem bilong God, Jehovah. And iumi storyim tu will bilong God—samting hem duim finis, and samting wea hem bae duim for olketa man. Bat wanem nao Jesus hem minim taem hem talem iumi  for prea olsem: “Mekem kingdom bilong iu kam”? Wanem nao Kingdom bilong God? Taem Kingdom hem kam hao nao bae datwan mekem pipol ting long nem bilong God olsem hem holy? And hao nao wei for Kingdom hem kam hem join witim wei for duim will bilong God?

WANEM NAO KINGDOM BILONG GOD?

4. Wanem nao Kingdom bilong God, and hu nao King bilong hem?

4 Kingdom bilong God hem wanfala gavman wea God hem startim wea garem King wea hem chusim. Hu nao King long Kingdom bilong God? Jesus Christ. Jesus hem King wea winim evri nara ruler and Bible kolem hem “King bilong olketa wea rul olsem king and Lord bilong olketa wea rul olsem lord.” (1 Timothy 6:15) Hem garem paoa for duim barava moa samting for helpem olketa man winim eni nara ruler, nomata olketa best ruler tu.

5. From wea nao Kingdom bilong God hem rul, and hem rul ovarem wanem?

5 Kingdom bilong God bae rul from wea nao? Iumi lanem finis hao olketa killim dae Jesus long wanfala post, and then hem resurrect. No longtaem bihaen, hem go long heven. (Acts 2:33) So heven nao ples wea Kingdom bilong God hem stap. Hem nao why Bible kolem hem “Kingdom bilong heven.” (2 Timothy 4:18) Nomata Kingdom bilong God hem stap long heven, hem bae rul ovarem earth.Revelation 11:15.

6, 7. Wanem nao mekem Jesus hem wanfala nambawan King?

6 Wanem nao mekem Jesus hem wanfala nambawan King? Wanfala samting wea mekem hem nambawan hem wei wea hem bae nating dae. Bible markem Jesus witim olketa man wea king and sei “hem nomoa garem wei for kanduit dae, wea hem stap long barava braet laet.” (1 Timothy 6:16) Diswan minim evri gud samting wea Jesus duim bae no finis. And iumi barava trustim hao hem bae duim staka gud samting for helpem pipol.

7 Tingim disfala profesi long Bible abaotem Jesus: “Spirit bilong Jehovah mas stap long hem, spirit bilong wisdom and  bilong wei for minim samting, spirit bilong kaonsel and bilong bigfala paoa, spirit bilong savve and wei for fraet long Jehovah; and hem bae hapi from hem fraet long Jehovah. And hem bae no judge followim samting wea eye bilong hem lukim, or givim kaonsel followim samting wea ear bilong hem herem. And hem mas judgem hambol pipol witim raeteous fasin, and hem mas givim kaonsel witim stretfala fasin for helpem hambol pipol bilong earth.” (Isaiah 11:2-4) Olketa toktok hia showimaot hao Jesus bae wanfala King wea raeteous and kaenfala. Waswe, bae iu laek for garem ruler olsem?

8. Hu nao bae rul witim Jesus?

8 Nara tru samting abaotem Kingdom bilong God hem wei wea Jesus bae no rul seleva. Olketa narawan bae rul witim hem. Olsem example, aposol Paul talem Timothy: “Sapos iumi gohed and no givap, iumi bae rul tugeta olsem olketa king.” (2 Timothy 2:12) Tru nao, God chusim Paul, Timothy, and olketa narawan wea faithful for rul tugeta witim Jesus long Kingdom long heven. Haomas man nao bae garem datfala privilege?

9. Haomas man nao bae rul witim Jesus, and wanem taem nao God start for chusim olketa?

9 Iumi lukim finis long Chapter 7 bilong disfala buk hao aposol John hem kasem wanfala vision. Hem lukim “datfala Pikinini Sheep [Jesus Christ] hem standap antap long Maunt Zion [wea hem nao position bilong hem long heven olsem king], and wan handred and foti-foa thousand stap witim hem wea olketa raetem nem bilong hem and nem bilong Dadi bilong hem long forhed bilong olketa.” Hu nao 144,000 hia? John hem sei: “Olketa nao olketa wea followim datfala Pikinini Sheep long evri ples wea hem go long hem. God baem olketa from midolwan long olketa man olsem olketa firstfrut for God and for datfala Pikinini Sheep.” (Revelation 14:1, 4) Tru nao, olketa hia olketa faithful follower bilong Jesus Christ wea God chusim olketa for rul long heven witim Jesus. Bihaen olketa resurrect go long heven, “olketa bae rul olsem olketa king ovarem earth” witim Jesus. (Revelation 5:10) Start kam  long taem bilong olketa aposol, God hem gohed for chusim olketa faithful Christian for mekem namba bilong olketa wea hem chusim kasem 144,000.

10. Why nao wei for Jesus and datfala 144,000 rul ovarem olketa man hem wanfala arrangement wea showimaot love?

10 Wei wea God markem Jesus and 144,000 for rul hem showimaot love bilong hem. Hao nao olsem? Jesus stap olsem man bifor, so hem savve long olketa samting iumi mas deal witim and wei for safa. Paul talem hao Jesus hem “no man wea no minim olketa wik point bilong iumi, bat hem man wea kasem test long evri samting olsem iumi, bat wea no garem sin.” (Hebrews 4:15; 5:8) Olketa wea rul witim hem tu kasem hard taem and safa taem olketa stap long earth. And tu, olketa stragol witim wei for no perfect and deal witim olketa difren kaen sik. For sure olketa hia bae minim olketa problem wea olketa man feisim!

WANEM NAO KINGDOM BILONG GOD BAE DUIM?

11. Why nao Jesus hem sei olketa disaepol bilong hem shud prea for will bilong God mas kamap long heven?

11 Taem Jesus hem sei olketa disaepol shud prea for Kingdom bilong God for kam, hem sei tu hao olketa shud prea for will bilong God kamap “long heven and long earth.” God hem long heven, and olketa faithful angel olowe duim will bilong hem long there. Bat long Chapter 3 bilong disfala buk, iumi lanem hao wanfala wicked angel stop for duim will bilong God and hem kosim Adam and Eve for sin. Long Chapter 10, iumi bae lanem moa samting from Bible abaotem datfala wicked angel, wea nem bilong hem Satan. God letem Satan and olketa angel wea chus for followim hem, wea Bible kolem olketa demon, for stap long heven for lelebet taem. So no evriwan long heven long datfala taem duim will bilong God. Datwan hem change taem Kingdom bilong God hem start for rul. Datfala niu King, Jesus Christ, hem faet againstim Satan.Revelation 12:7-9.

12. Revelation 12:10 storyim wanem tufala important samting wea happen?

 12 Olketa profesi toktok wea kam bihaen storyim samting wea happen: “Mi herem wanfala laod voice long heven hem sei: ‘Salvation and paoa and kingdom bilong God bilong iumi and paoa bilong Christ bilong hem, hem kamap nao, from olketa torowem go daon datwan wea accusim olketa brata bilong iumi, wea accusim olketa day and naet front long God bilong iumi!’” (Revelation 12:10) Waswe, iu lukim tufala barava important samting wea happen long datfala scripture? First wan, Kingdom bilong God wea Jesus Christ rulim hem start for rul. Mek-tu, Jesus aotem Satan from heven and torowem hem kam daon long earth.

13. Wanem nao kamaot from wei wea Jesus aotem Satan from heven?

13 Wanem nao kamaot from tufala samting hia? Revelation hem sei olsem abaotem samting wea happen long heven: “So iufala hapi nao, heven and iufala wea stap long there!” (Revelation 12:12) Tru nao, olketa angel long heven wea faithful hapi bikos Satan and olketa demon bilong hem no stap long heven nao. Olketa garem peace and wan mind wea gohed olowe long there. Distaem, will bilong God gohed long heven.

Wei wea Jesus aotem Satan and olketa demon from heven mekem trabol kamap long earth. Klosap nao trabol hia bae finis

14. Wanem nao happen long earth from Jesus torowem Satan kam daon?

14 Bat waswe long earth? Bible hem sei: “Trabol for earth and for sea, bikos Devil hem kam daon long iufala and hem kros tumas from hem savve hem garem shortfala taem nomoa.” (Revelation 12:12) Satan hem kros from Jesus aotem hem from heven and from hem garem shortfala taem nomoa. From hem kros hem kosim trabol long earth. Bae iumi lanem moa samting abaotem datfala “trabol” long next chapter. Bat taem iumi tingim hao Jesus torowem Satan kam daon long earth, iumi laek for savve, Hao nao Kingdom savve mekem will bilong God for kamap long earth?

15. Wanem nao will bilong God for disfala earth?

15 Waswe, iu rememberim wanem nao will bilong God for  earth? Iu lane abaotem datwan finis long Chapter 3. Long Eden, God showim hao hem will bilong hem for earth bae wanfala paradaes wea evriwan raeteous and no dae. Satan kosim Adam and Eve for sin, and datwan hem affectim wei wea will bilong God for earth hem fulfill, bat God no changem will bilong hem. Hem still plan bilong God for ‘olketa wea raeteous kasem earth olsem present, and stap olowe long hem.’ (Psalm 37:29) And Kingdom bilong God nao bae duim datwan. Long wanem wei?

16, 17. Wanem nao Daniel 2:44 talem iumi abaotem Kingdom bilong God?

16 Tingim datfala profesi long Daniel 2:44. Long there hem sei: “Long taem bilong olketa king hia God bilong heven bae startim wanfala kingdom wea bae nating savve finis. And bae no eni nara pipol tekova long datfala kingdom. Diswan bae smasem and finisim evri kingdom hia, and hem nomoa bae stap for olowe.” Wanem nao diswan hem helpem iumi for minim abaotem Kingdom bilong God?

17 First samting, Kingdom bae start “long taem bilong olketa king hia,” wea minim taem olketa nara kingdom stap yet. Mek-tu, Kingdom bilong God bae gohed for olowe. No eni nara gavman bae finisim or changem hem. Mek-thri, war bae kamap midolwan Kingdom bilong God and olketa kingdom bilong disfala world. Kingdom bilong God nao bae win. Gogo, Kingdom nao bae only gavman wea rulim olketa man. Long datfala taem, olketa man bae stap gud anda long disfala gavman wea winim eni nara gavman wea olketa stap anda bifor.

18. Wanem nao nem bilong datfala war midolwan Kingdom bilong God and olketa gavman bilong disfala world?

18 Bible talem staka samting abaotem datfala war midolwan Kingdom bilong God and olketa gavman bilong disfala world. Olsem example, hem teachim iumi hao taem end hem kakam klosap, olketa wicked spirit bae talem olketa laea for trikim “olketa king bilong full earth.” Why nao olsem? “For hipimap olketa [olketa king hia] for war bilong bigfala day bilong God Olmaeti.” Olketa king bilong earth bae hipap “long ples wea  olketa kolem Armageddon long Hebrew languis.” (Revelation 16:14, 16) From samting wea tufala verse hia talem, nem bilong datfala last faet midolwan olketa gavman bilong man and Kingdom bilong God hem Armageddon.

19, 20. Wanem nao stopem will bilong God for kamap long earth distaem?

19 Armageddon bae mekem wei for Kingdom bilong God duim wanem samting? Tingim moa will bilong God for disfala earth. Hem plan bilong Jehovah God for earth mas fulap witim pipol wea raeteous and perfect and wea servem hem long Paradaes. Wanem nao stopem datwan for kamap distaem? First samting, iumi olketa sinner, and iumi savve sik and dae. Bat iumi lanem finis long Chapter 5 hao Jesus dae for iumi mekem iumi savve laef for olowe. Maet iu rememberim datfala toktok long Gospel buk bilong John wea sei: “God lovem world tumas dastawe hem givim only Son wea hemseleva nao wakem, mekem evriwan wea showimaot faith long hem no need for dae bat kasem laef olowe.”John 3:16.

20 Nara problem, hem wei wea staka pipol duim olketa wicked samting. Olketa laea, ravem narawan, and duim dirty fasin. Olketa no laek for duim will bilong God. Pipol wea duim olketa wicked samting bae finis long datfala war bilong God, Armageddon. (Psalm 37:10) Nara reason why will bilong God hem no kamap long earth hem bikos olketa gavman no encouragem pipol for duim datwan. Plande gavman no fit for helpem pipol, olketa raf, and olketa raverave. Bible hem tok stret taem hem sei: “Taem man rulim narawan hem spoelem hem.”Ecclesiastes 8:9.

21. Hao nao Kingdom bae mekem will bilong God for kamap long earth?

21 Bihaen Armageddon, olketa man bae stap anda long wanfala gavman nomoa, Kingdom bilong God. Datfala Kingdom bae duim will bilong God and mekem olketa man for kasem olketa nambawan blessing. Olsem example, hem bae aotem Satan and olketa demon from earth. (Revelation 20:1-3) Sakrifaes bilong Jesus bae mekem wei for olketa wea faithful bae  no sik or dae. Anda long Kingdom olketa savve laef for olowe. (Revelation 22:1-3) Earth bae kamap wanfala paradaes. So disfala Kingdom bae mekem will bilong God for kamap long earth, and bae mekem kamap wei wea evriwan ting long nem bilong God olsem hem holy. Wanem nao diswan hem minim? Hem minim, gogo, evriwan wea stap anda long Kingdom bilong God bae honorim nem bilong Jehovah.

WANEM TAEM NAO KINGDOM BAE DUIM DISWAN?

22. Hao nao iumi savve Kingdom bilong God hem no kam taem Jesus hem long earth or stretawe bihaen hem resurrect?

22 Taem Jesus talem olketa follower bilong hem for prea for ‘Kingdom bilong God for kam,’ hem klia hao Kingdom no kam yet long datfala taem. Waswe, hem kam taem Jesus go bak long heven? Nomoa, bikos Paul and Peter talem hao bihaen Jesus hem resurrect, datfala profesi long Psalm 110:1 hem fulfill, wea sei: “Toktok bilong Jehovah for Lord bilong mi, hem olsem: ‘Sidaon long raet saed bilong mi go kasem taem mi putim olketa enemy bilong iu olsem stul for putim leg bilong iu.’” (Acts 2:32-35; Hebrews 10:12, 13) Jesus mas weit firstaem.

Anda long rul bilong Kingdom, will bilong God bae kamap long earth olsem hem kamap long heven

23. (a) Wanem taem nao Kingdom bilong God hem start for rul? (b) Wanem nao bae iumi storyim long next chapter?

23 Hao long nao hem mas weit? Long last part bilong mek-19 century and first part bilong mek-20 century, olketa Bible student start for luksavve disfala taem wea Jesus mas weit bae finis long 1914. (For moa information  abaotem disfala date, lukim Appendix wea garem title “1914—Wanfala Important Year Long Bible Profesi.”) Olketa samting wea start for happen long world long 1914 showimaot hao samting wea olketa talem hem stret. Wei wea olketa profesi insaed Bible fulfill showimaot hao long 1914, Christ kamap King and Kingdom bilong God long heven hem start for rul. So diswan minim iumi stap insaed datfala ‘short taem’ wea Satan garem. (Revelation 12:12; Psalm 110:2) Iumi savve sure tu hao klosap nao Kingdom bilong God bae duim will bilong God long earth. Waswe, diswan hem here gud long iu? Waswe, iu bilivim diswan? Next chapter bae helpem iu for lukim hao Bible hem really teachim olketa samting hia.