Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER SEVEN

Hope for Olketa Famili Member and Fren wea Dae

Hope for Olketa Famili Member and Fren wea Dae
  • Hao nao iumi savve sure pipol bae resurrect?

  • Wanem nao showimaot Jehovah hem barava laek for resurrectim olketa wea dae finis?

  • Hu nao bae resurrect?

1-3. Wanem enemy nao hem aftarem iumi evriwan, and hao nao wei for story raonem samting wea Bible teachim savve comfortim iumi?

TINGIM sapos iu ranawe from wanfala enemy wea raf tumas. Hem barava strong and fast winim iu. Iu savve hao hem raf fogud bikos iu lukim hem killim dae samfala fren bilong iu finis. Nomata iu traem best for ranawe from hem, man hia hem ran fast tumas and iu hard nao. Luk olsem iu no garem eni hope nao. Bat seknomoa, wanfala man ran kam long iu for sevem iu. Hem barava moa strong winim enemy bilong iu and hem promis for helpem iu. Iu barava hapi nao!

2 For tok stret, wanfala enemy olsem nao hem aftarem iu. Hem aftarem iumi evriwan. Long chapter six, iumi lanem hao Bible kolem dae wanfala enemy. No eniwan long iumi savve ranawe from disfala enemy. Klosap iumi evriwan lukim finis wei wea disfala enemy hem finisim laef bilong pipol wea iumi lovem. Bat Jehovah hem barava garem moa paoa winim dae. Hem nao datfala man wea love muvim hem for sevem iumi, wea showimaot finis hao hem savve winim disfala enemy. And hem promis for distroem for olowe disfala enemy, dae. Bible hem sei: “Dae, wea hem nao datfala last enemy, bae finis evribit.” (1 Corinthians 15:26) Datwan hem barava gudfala nius!

 3 Firstem, bae iumi storyim feeling bilong iumi taem wanfala fren or famili member hem dae. Diswan bae helpem iumi for minim wanfala promis wea bae mekem iumi hapi, wea datwan nao hem promis bilong Jehovah for olketa wea dae finis bae laef bak. (Isaiah 26:19) Jehovah nao bae mekem olketa laef bak. So hope hem stap for olketa wea dae bae laef bak bikos Jehovah hem promis for resurrectim olketa.

TAEM WANFALA FAMILI MEMBER OR FREN DAE

4. (a) Why nao samting wea Jesus duim taem Lazarus dae teachim iumi abaotem Jehovah? (b) Jesus hem fren gud witim hu nao?

4 Waswe, enitaem wanfala famili member or fren bilong iu hem dae? Bigfala feeling for sorre and nogud feeling wea iumi kasem from iumi no savve changem datwan savve barava hard for deal witim. Long olketa taem olsem, iumi need for kasem comfort from Word bilong God. (2 Corinthians 1:3, 4) Bible helpem iumi for minim feeling bilong Jehovah and Jesus abaotem dae. Jesus hem evritaem showimaot olketa fasin bilong Dadi bilong hem long perfect wei, and wanfala story long Bible showim hao Jesus hem sorre fogud taem fren bilong hem dae. (John 14:9) Long olketa taem wea Jesus go long Jerusalem, hem savve visitim Lazarus and olketa sista bilong hem, Mary and Martha, wea stap long Bethany, wanfala taon klosap long Jerusalem. Olketa barava fren gud. Bible hem sei: “Jesus lovem Martha and sista bilong hem and Lazarus.” (John 11:5) Bat olsem iumi lanem finis long chapter six, Lazarus hem dae.

5, 6. (a) Hao nao feeling bilong Jesus taem hem stap witim famili and olketa fren bilong Lazarus wea sorre and krae? (b) Why nao wei wea Jesus hem krae and feel sorre hem encouragem iumi?

5 Hao nao feeling bilong Jesus taem fren bilong hem dae? Jesus go for lukim olketa relative and fren bilong Lazarus wea gohed for krae and feel sorre. Bible talem hao taem hem lukim olketa hem “barava sorre tumas” and “hem krae.” (John 11:33, 35) Waswe, wei wea Jesus sorre minim hem no garem  eni hope nao? Nomoa, hem barava garem hope. For tok stret, Jesus savve hao wanfala barava spesol samting hem klosap for happen. (John 11:3, 4) Nomata olsem, hem feelim tumas sorre wea man kasem taem narawan hem dae.

6 Taem iumi ting raonem sorre wea Jesus feelim, really, datwan savve encouragem iumi. Hao nao olsem? Hem showim iumi hao Jesus and Dadi bilong hem, Jehovah, heitim dae. Bat Jehovah hem fit for faetem and win againstim datfala enemy! Tingim samting wea God mekem Jesus fit for duim long datfala taem.

“LAZARUS, KAMAOT!”

7, 8. Why nao maet olketa wea savve long Lazarus no garem eni hope for lukim hem moa, bat wanem nao Jesus duim?

7 Olketa berem Lazarus insaed wanfala cave, and Jesus askem olketa for aotem bigfala ston wea satem datfala cave. Martha hem wari bikos hem tingim hao masbi body bilong Lazarus hem start for rotten finis. (John 11:39) Luk olsem no eni hope nao.

Evriwan barava hapi fogud taem Lazarus hem resurrect.—John 11:38-44

8 Olketa aotem datfala ston, and Jesus singaot olsem witim laod voice: “Lazarus, kamaot!” Wanem nao happen? “Datfala man wea dae finis hem kamaot.” (John 11:43, 44) Tingim bigfala hapi bilong pipol long there! Evriwan hia, nomata olketa sista, relative, fren, or neiba bilong hem, olketa savve hao hem dae. Nomata olsem, datfala man wea olketa lovem hem standap midolwan long olketa moa. Masbi olketa barava sapraes long datwan. For sure, olketa hapi tumas. Datwan hem wei for barava win againstim dae!

Elijah resurrectim son bilong wanfala widow woman.1 Kings 17:17-24

9, 10. (a) Wanem nao Jesus duim wea showimaot, really, God nao resurrectim Lazarus? (b) Wanem nao samfala gud samting iumi kasem taem iumi read abaotem olketa resurrection long Bible?

9 Jesus no sei hem duim disfala mirakol from paoa bilong hemseleva nomoa. Long prea bilong hem bifor hem singaot go long Lazarus, hem showimaot klia hao Jehovah nao resurrectim hem. (John 11:41, 42) Hem no Lazarus nomoa wea Jehovah iusim paoa bilong hem for resurrectim. Bible storyim  nara eitfala resurrection olsem. * Hem barava interesting for read abaotem and studyim olketa resurrection hia. Olketa teachim iumi hao God no favorim eniwan, bikos hem resurrectim olketa wea young, olo, man, woman, Israelite, and man wea no Israelite tu. And wei wea hem duim datwan hem barava mekem pipol hapi! Olsem example, taem Jesus resurrectim wanfala young gele, parents bilong hem “barava hapi tumas.” (Mark 5:42) Tru nao, Jehovah givim olketa hia reason for hapi wea olketa bae nating forgetim.

Aposol Peter resurrectim datfala Christian woman Dorcas.Acts 9:36-42

10 Hem tru, olketa wea Jesus resurrectim gogo olketa dae moa. Waswe, datwan minim hem iusles nomoa for Jesus resurrectim olketa? Nomoa nao. Olketa resurrection hia showimaot hao olketa nara samting wea Bible talem abaotem dae hem tru and givim iumi hope.

LANE FROM OLKETA RESURRECTION LONG BIBLE

11. Hao nao story abaotem resurrection bilong Lazarus showimaot hao samting wea Ecclesiastes 9:5 talem hem tru?

11 Bible teachim hao olketa wea dae finis “no savve long eni samting.” Olketa no laef and olketa no stap long eni nara ples. Resurrection bilong Lazarus showimaot hao diswan hem tru. Bihaen Lazarus hem laef bak, waswe, hem storyim olketa samting abaotem heven? Or waswe, hem mekem evriwan fraet fogud taem hem storyim olketa nogud samting wea happen long hell wea bone? Nomoa. Lazarus no talem eni samting olsem. Long fofala day wea hem no laef, hem “no savve long eni samting.” (Ecclesiastes 9:5) Lazarus hem sleep long dae nomoa.John 11:11.

12. Hao nao iumi savve sure Jesus hem really resurrectim Lazarus?

12 Disfala story abaotem Lazarus teachim iumi tu hao resurrection hem wanfala really samting no wanfala kastom story nomoa. Taem Jesus resurrectim Lazarus, staka pipol lukim datwan. Nomata olketa bigman bilong religion wea heitim Jesus  tu bat no trae for denyim datwan. Olketa sei: “Wanem nao bae iumi duim, disfala man [Jesus] hem duim staka mirakol?” (John 11:47) Plande pipol go for lukim Lazarus wea resurrect. From diswan, staka moa pipol garem faith long Jesus. Olketa luksavve hao samting wea happen long Lazarus hem pruvim hao God nao sendem kam Jesus. Hard for eniwan denyim disfala pruv, dastawe samfala bigman bilong olketa Jew wea garem wicked heart plan for killim dae Jesus and Lazarus.John 11:53; 12:9-11.

13. Wanem reason nao iumi garem for bilivim hao Jehovah savve really resurrectim olketa wea dae finis?

13 Waswe, hem mek sense for biliv long resurrection? Ia, bikos Jesus teachim hao wanday “evriwan long olketa grev wea God rememberim” bae resurrect. (John 5:28) Jehovah hem creatim evri samting wea laef, so hem no hard for bilivim hao hem savve creatim bak wanfala man. Diswan bae barava depend long memory bilong Jehovah. Waswe, hem savve rememberim olketa famili member or fren bilong iumi wea dae finis? Universe hem garem staka million star, nomata olsem, God hem nemim evri star! (Isaiah 40:26) So Jehovah savve rememberim evri samting abaotem olketa wea dae, and hem fit for mekem olketa laef bak.

14, 15. Olsem toktok bilong Job hem showimaot, hao nao iumi savve Jehovah hem barava laek for mekem olketa wea dae finis laef bak?

14 Wanem nao showimaot Jehovah barava laek for resurrectim olketa wea dae finis? Bible teachim hao hem barava laek for mekem pipol laef bak. Datfala faithful man Job hem ask: “Sapos wanfala man hem dae, waswe, hem savve laef moa?” Job hem story abaotem wei for weit long grev go kasem taem wea God bae rememberim hem. Hem sei long Jehovah: “Iu bae kolem mi, and mi bae ansarem iu. Iu bae tingim tumas samting wea hand bilong iu wakem.”Job 14:13-15.

15 Tingim datwan! Jehovah hem barava laek for resurrectim olketa wea dae finis. Hem barava muvim heart bilong iumi for savve Jehovah garem feeling olsem! Bat waswe long disfala resurrection wea bae kamap long future? Hu nao bae resurrect, and long wea nao?

 “EVRIWAN LONG OLKETA GREV”

16. Olketa wea resurrect bae laef bak insaed wanem kaen world?

16 Olketa resurrection wea happen insaed Bible teachim iumi plande samting abaotem resurrection wea bae kamap long future. Pipol wea laef bak long earth bifor, olketa stap bak witim famili and olketa fren. Resurrection wea bae kamap long future bae olsem tu—bat hem bae moabeta. Olsem iumi lanem finis long Chapter 3, plan bilong God hem for full earth kamap wanfala paradaes. So olketa wea resurrect bae no laef bak insaed world wea fulap witim war, fasin for brekem law, and sik. Olketa bae garem chance for laef olowe long disfala earth witim peace and hapi.

17. Hu nao olketa wea bae laef bak?

17 Hu nao bae resurrect? Jesus hem sei “evriwan long olketa grev wea God rememberim bae herem voice bilong hem [Jesus] and kamaot.” (John 5:28, 29) Olsem tu, Revelation 20:13 hem sei: “Sea givim kam olketa wea dae insaed long hem, and dae and Hades givim kam olketa wea dae insaed long olketa.” “Hades” hem grev bilong olketa man. (Lukim Appendix wea garem title “Wanem Nao Sheol and Hades?”) Olketa grev bae kamap emti. Staka million pipol wea rest long there bae laef bak. Aposol Paul hem sei: “Wanfala resurrection bae kamap for olketa wea raeteous and olketa wea no raeteous.” (Acts 24:15) Wanem nao diswan hem minim?

Long Paradaes, olketa wea dae finis bae laef bak and stap moa witim famili and olketa fren

18. Hu nao olketa wea “raeteous” wea bae resurrect, and hao nao disfala hope savve affectim iu?

18 Samfala long “olketa wea raeteous” hem pipol wea iumi read abaotem long Bible wea laef bifor Jesus hem kam long earth. Maet iu savve tingim Noah, Abraham, Sarah, Moses, Ruth, Esther, and staka moa. Hebrews chapter 11 storyim samfala long olketa man and woman hia wea garem strongfala faith long God. Bat olketa narawan wea “raeteous” tu hem olketa servant bilong Jehovah wea dae long taem bilong iumi. From iumi garem hope long disfala resurrection, iumi no fraet for dae.Hebrews 2:15.

19. Hu nao olketa wea “no raeteous,” and from Jehovah hem kaen tumas, wanem chance nao hem givim long olketa?

 19 Waswe long pipol wea no servem or obeyim Jehovah bikos olketa nating savve long hem taem olketa laef? Jehovah bae no forgetim staka million pipol hia wea “no raeteous.” Olketa tu bae resurrect and bae garem inaf taem for lane abaotem tru God and servem hem. Insaed wan thousand year, olketa wea dae finis bae laef bak and kasem chance for join witim olketa narawan long earth wea faithful for servem Jehovah. Datwan bae wanfala barava nambawan taem. Bible kolem datfala wan thousand year, Judgment Day. *

20. Wanem nao Gehenna, and hu nao go long there?

20 Waswe, diswan hem minim evriwan wea dae bae resurrect? Nomoa. Bible talem hao samfala stap long “Gehenna.” (Luke 12:5) Gehenna hem wanfala ples aotsaed long Jerusalem bifor wea olketa torowem olketa rabis. Olketa bonem rabis long there and olketa body bilong pipol wea dae. Olketa Jew sei olketa wicked criminal wea olketa torowem body bilong olketa long there no fit for eniwan berem olketa or for kasem resurrection. So Gehenna hem piksarem wei for finis for olowe. Jehovah nao datfala nambawan judge. Hem bae no resurrectim olketa wea wicked and wea no willing for change.

RESURRECTION FOR GO LONG HEVEN

21, 22. (a) Wanem nao nara resurrection wea Bible storyim? (b) Hu nao first man wea resurrect olsem wanfala spirit?

21 Bible storyim tu nara resurrection, hem nao wei for laef bak olsem wanfala spirit long heven. Only example bilong diswan insaed Bible hem resurrection bilong Jesus Christ.

22 Bihaen olketa killim dae Jesus, Jehovah no letem faithful Son bilong Hem for stap olowe insaed grev. (Psalm 16:10; Acts 13:34, 35) God resurrectim hem, bat no olsem wanfala man. Aposol Peter hem sei olsem abaotem Christ: “Wei wea hem man hem finis taem olketa killim hem dae, bat God mekem  hem laef moa olsem wanfala spirit.” (1 Peter 3:18) Diswan hem wanfala barava nambawan mirakol. Jesus hem laef moa olsem wanfala maeti spirit! (1 Corinthians 15:3-6) Jesus hem barava first man for kasem kaen resurrection olsem. (John 3:13) Bat plande moa kasem semkaen resurrection bihaen.

23, 24. Hu nao olketa wea insaed “smolfala sekson bilong sheep” bilong Jesus, and olketa haomas?

23 From Jesus savve hem klosap for go bak long heven, hem talem olketa faithful follower bilong hem hao hem bae “redyim wanfala ples” for olketa long there. (John 14:2) Jesus kolem olketa wea bae go long heven “smolfala sekson bilong sheep” bilong hem. (Luke 12:32) Haomas man nao bae insaed disfala smol grup bilong olketa faithful Christian? Long Revelation 14:1, aposol John hem sei: “Samting mi lukim nao hem datfala Pikinini Sheep [Jesus Christ] hem standap antap long Maunt Zion, and wan handred and foti-foa thousand stap witim hem wea olketa raetem nem bilong hem and nem bilong Dadi bilong hem long forhed bilong olketa.”

24 Wan handred and foti-foa thousand Christian hia, wea insaed diswan hem olketa aposol bilong Jesus wea faithful, olketa tu resurrect go long heven. Wanem taem nao olketa resurrect? Aposol Paul talem hao datwan bae kamap insaed taem wea Jesus rul olsem king. (1 Corinthians 15:23) Olsem Chapter 9 bae storyim, iumi insaed long datfala taem. So olketa last wan bilong datfala 144,000 wea laef yet bae stretawe resurrect go long heven taem olketa dae. (1 Corinthians 15:51-55) Bat long future, barava bigfala haf bilong olketa man garem chance for laef bak long Paradaes long earth.

25. Wanem nao bae iumi storyim long next chapter?

25 Tru nao, Jehovah bae win againstim disfala enemy bilong iumi, dae, and hem bae finis for olowe! (Isaiah 25:8) Bat maet iu laek for savve, ‘Wanem nao olketa wea go long heven bae duim long there?’ Olketa bae kamap part bilong wanfala nambawan Kingdom gavman long heven. Iumi bae lanem moa samting abaotem datfala gavman long next chapter.

^ par. 9 Olketa nara resurrection hem long 1 Kings 17:17-24; 2 Kings 4:32-37; 13:20, 21; Matthew 28:5-7; Luke 7:11-17; 8:40-56; Acts 9:36-42; and 20:7-12.

^ par. 19 For moa information abaotem Judgment Day, plis lukim Appendix wea garem title “Wanem Nao Judgment Day?