Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER FOTIN

Hao for Garem Hapi Famili

Hao for Garem Hapi Famili
  • Hao nao man savve kamap gudfala hasband?

  • Hao nao woman savve kamap gudfala waef?

  • Hao nao iu savve kamap gudfala mami or dadi?

  • Hao nao olketa pikinini savve help for mekem famili hapi?

1. Wanem nao main samting wea bae mekem famili hapi?

JEHOVAH GOD laekem famili bilong iu for hapi. Word bilong hem, Bible, givim instruction abaotem responsibility wea God markem for each member bilong famili. Taem olketa famili member duim responsibility bilong olketa long wei wea followim kaonsel bilong God, gud samting nao kamaot from datwan. Jesus hem sei: “Hapi nao olketa wea herem word bilong God and followim!”Luke 11:28.

2. For mekem famili hapi, iumi mas luksavve long wanem samting?

2 For garem hapi famili evriwan mas luksavve hao Jehovah nao startim famili arrangement. Jesus kolem Jehovah, ‘Dadi bilong iumi.’ (Matthew 6:9) From God startim famili arrangement hem barava savve long wanem nao mekem famili hem hapi. (Ephesians 3:14, 15) So wanem nao Bible hem teachim abaotem responsibility wea each member bilong famili mas duim?

GOD STARTIM FAMILI ARRANGEMENT

3. Wanem nao Bible hem sei abaotem start bilong famili arrangement, and hao nao iumi savve samting hem talem hem tru?

3 Jehovah creatim first man and woman, Adam and Eve, and mekem tufala kamap hasband and waef. Hem putim olketa long datfala Paradaes long Eden and talem olketa for garem olketa pikinini. Jehovah hem sei: “Garem plande pikinini and fulimap earth.” (Genesis 1:26-28; 2:18, 21-24) Diswan no wanfala kastom story, bikos Jesus showim hao samting wea Genesis talem abaotem  wei wea famili hem start, hem tru. (Matthew 19:4, 5) Nomata iumi feisim staka problem and laef bilong iumi hem difren from wanem God markem for iumi firstaem, bae iumi lukim hao iumi still savve garem famili wea hapi.

4. (a) Hao nao each member bilong famili savve help for mekem famili hapi? (b) Why nao wei for studyim laef bilong Jesus savve barava help for mekem famili hapi?

4 Each member bilong famili savve help for mekem famili hapi taem olketa followim example bilong God for showimaot love. (Ephesians 5:1, 2) Bat iumi no savve lukim God, so hao nao iumi savve followim example bilong hem? Iumi savve lanem olketa wei bilong Jehovah bikos hem sendem kam firstborn Son bilong hem long earth. (John 1:14, 18) Taem hem long earth, disfala Son, Jesus Christ, barava followim example bilong Dadi bilong hem long heven. From diswan, wei for lukluk and lisin long Jesus hem barava olsem man hem stap witim Jehovah and lisin long Hem. (John 14:9) So taem iumi lane abaotem love wea Jesus showimaot and followim example bilong hem, iumi each member bilong famili savve barava help for mekem famili hapi.

EXAMPLE FOR OLKETA HASBAND

5, 6. (a) Hao nao wei wea Jesus deal witim kongregeson hem gudfala example for olketa hasband followim? (b) Wanem nao iumi mas duim for kasem forgiveness for olketa sin?

5 Bible talem hao olketa hasband shud deal witim waef long sem wei wea Jesus deal witim olketa disaepol bilong hem. Tingim disfala kaonsel from Bible: “Olketa hasband, gohed for lovem waef bilong iufala, olsem Christ tu hem lovem kongregeson and givim laef bilong hem for datwan . . . Long disfala wei olketa hasband mas lovem waef bilong olketa olsem olketa seleva. Man wea lovem waef bilong hem lovem hemseleva, from no eni man heitim body bilong hemseleva; bat hem feedim and lukaftarem, olsem Christ hem duim long kongregeson.”Ephesians 5:23, 25-29.

6 Love bilong Jesus for kongregeson hem perfect example for olketa hasband followim. Jesus “lovem olketa go kasem end” long wei wea hem sakrifaesim laef bilong hem for olketa, nomata olketa no perfect. (John 13:1; 15:13) Olsem tu, Bible barava  encouragem olketa hasband for “gohed for lovem waef bilong [olketa] and no kros tumas long olketa.” (Colossians 3:19) Wanem nao bae helpem hasband for followim kaonsel olsem, especially sapos samfala taem waef bilong hem duim samting wea no wise? Hem shud remember hao hem tu savve duim olketa mistek, and tu, hem shud tingim samting wea hem mas duim for kasem forgiveness from God. Wanem nao datwan? Hem mas forgivim olketa wea sin againstim hem, wea minim hem mas forgivim waef tu. Waef tu mas duim sem samting. (Matthew 6:12, 14, 15) Waswe, iu minim nao why samfala sei marit wea win hem marit wea tufala evriwan, hasband and waef, willing for forgivim each other?

7. Wanem nao Jesus luksavve long hem, wea datwan showimaot wanem example for olketa hasband?

7 Olketa hasband shud tingim tu hao Jesus evritaem tingim and luksavve long olketa disaepol bilong hem. Hem luksavve long wanem olketa no savve duim and long physical need bilong olketa. Olsem example, long wanfala taem wea olketa taed, hem sei: “Kam, iufala seleva nomoa, iumi go long wanfala kwaet ples and rest lelebet.” (Mark 6:30-32) Fitim tu for hasband garem sem wei for tingim waef. Bible talem hao waef hem “no strong olsem man,” and hao God komandim olketa hasband for “honorim olketa.” Why nao olsem? Bikos tufala evriwan, hasband and waef, “bae kasem laef wea man no fit for kasem.” (1 Peter 3:7) Olketa hasband shud no forgetim hao samting wea mekem Jehovah tinghae long samwan nao, hem wei wea hem faithful long hem, no sapos hem wanfala man or wanfala woman nomoa.—Psalm 101:6.

8. (a) Long wanem wei nao hasband “wea lovem waef” hem “lovem hemseleva”? (b) Long wanem wei nao hasband and waef olsem wanfala body nomoa?

8 Bible hem sei hasband “wea lovem waef bilong hem, hem lovem hemseleva.” Olsem Jesus hem talem, diswan hem bikos bihaen tufala marit olketa “no tufala body, bat wanfala body nomoa.” (Matthew 19:6) So olketa mas no duim sex witim difren man. (Proverbs 5:15-21; Hebrews 13:4) Olketa savve faithful long each other sapos olketa tingim need bilong each other,  no need bilong olketa seleva. (1 Corinthians 7:3-5) Tingim disfala important toktok long Bible: “No eni man heitim body bilong hemseleva; bat hem feedim and lukaftarem.” Hasband mas lovem waef long sem wei wea hem lovem hemseleva, and no forgetim hao sapos hem no duim datwan, hem mas givim ansa long hed bilong hem, Jesus Christ.Ephesians 5:29; 1 Corinthians 11:3.

9. Philippians 1:8 storyim wanem fasin bilong Jesus, and why nao olketa hasband shud showimaot datfala fasin long waef bilong olketa?

9 Aposol Paul storyim ‘feeling and love wea Christ Jesus hem garem.’ (Philippians 1:8) Love bilong Jesus hem samting wea strongim olketa narawan, and olketa woman wea kamap disaepol bilong hem barava tinghae long datwan. (John 20:1, 11-13, 16) And olketa waef barava needim hasband for lovem olketa.

EXAMPLE FOR OLKETA WAEF

10. Long wanem wei nao Jesus showimaot example for olketa waef?

10 Famili hem needim wanfala hed for mekem evri samting gohed gud. Nomata Jesus tu bat garem wanfala hed wea hem stap anda long hem. “God hem hed bilong Christ,” and “man hem hed bilong woman.” (1 Corinthians 11:3) Wei wea Jesus stap anda long God hem wanfala gud example, bikos iumi evriwan mas stap anda long samwan wea hem hed bilong iumi.

11. Hao nao waef shud ting long hasband bilong hem, and hao nao fasin bilong hem savve affectim hasband?

11 Olketa man savve isi tumas for duim olketa mistek and olketa hard for kamap hed wea perfect. So, wanem nao waef shud duim? Hem shud no tok daonem samting wea hasband duim or trae for bossim hem and famili. Waef shud no forgetim hao God hem barava tinghae long kwaet fasin and hambol fasin. (1 Peter 3:4) Taem hem showimaot olketa fasin olsem, bae hem moa isi for hem stap anda long hasband long wei wea God markem, nomata long olketa taem wea datwan hem no isi tu. And tu, Bible hem sei: “Waef mas garem bigfala respect for hasband bilong hem.” (Ephesians 5:33) Bat waswe sapos hasband no acceptim Christ olsem Hed bilong hem? Bible hem barava encouragem olketa waef olsem: “Stap anda long hasband bilong iufala, mekem  sapos hasband no obeyim toktok bilong God, maet gogo hem laek for obey, no from samting iufala talem, bat bikos long fasin bilong iufala, from olketa lukim klinfala fasin bilong iufala and wei wea iufala showimaot bigfala respect.”1 Peter 3:1, 2.

12. Why nao hem no rong for waef savve talem tingting bilong hem long wei wea showimaot respect?

12 Nomata sapos hasband bilong hem worshipim God or nomoa, waef savve talem tingting bilong hem long wei wea tingim feeling bilong hasband and showimaot respect long hem. Maet tingting bilong waef nao stret, and full famili bae kasem gud samting sapos hasband lisin long samting wea waef talem. Wantaem, Sarah talem wanfala idea long Abraham abaotem hao for stretem problem wea kamap insaed famili bilong tufala, and nomata Abraham no agree witim samting wea Sarah talem, God sei olsem long hem: “Lisin long voice bilong hem.” (Genesis 21:9-12) Nomata olsem, taem hasband mekem wanfala disison wea no againstim law bilong God, waef bilong hem bae showimaot hem stap anda long hasband taem hem sapotim datfala disison.Acts 5:29; Ephesians 5:24.

Wanem gudfala example nao Sarah showimaot for olketa waef?

13. (a) Wanem nao Titus 2:4, 5 barava encouragem olketa woman for duim? (b) Wanem nao Bible talem abaotem wei for separate and divorce?

13 Waef savve fulfillim responsibility bilong hem for kea for famili long plande difren wei. Olsem example, Bible showimaot hao olketa woman ‘mas lovem hasband bilong olketa, lovem pikinini bilong olketa, garem stretfala tingting, klin long fasin, duim waka long haos, gudfala, and stap anda long hasband bilong olketa.’ (Titus 2:4, 5) Evriwan long famili bae lovem and respectim waef and mami wea olsem. (Proverbs 31:10, 28) Bat from marit hem joinim man and woman tugeta wea no perfect, maet bigfala problem savve kamap wea gogo mekem tufala separate or divorce. Bible letem wei for separate, bat diswan hem fitim nomoa taem wea samfala nogud samting hem happen. Nomata olsem, wei for separate hem wanfala serious samting, from Bible hem sei: “Waef shud no lusim hasband bilong hem; . . . and hasband shud no lusim waef bilong hem.” (1 Corinthians 7:10, 11) And only reason for divorce wea Bible letem nao hem taem hasband or waef duim adultery.Matthew 19:9.

 PERFECT EXAMPLE FOR PARENTS

14. Hao nao Jesus deal witim olketa pikinini, and wanem nao olketa pikinini needim from parents?

14 Jesus showimaot perfect example for parents long wei wea hem deal witim olketa pikinini. Taem olketa narawan trae stopem olketa pikinini for kam long Jesus, hem sei: “Letem olketa smol pikinini kam long mi; no trae for stopem olketa.” Bible talem hao “hem holem olketa pikinini hia insaed arm bilong hem and start for blessim olketa, long wei for putim hand bilong hem long olketa.” (Mark 10:13-16) Jesus spendem taem witim olketa pikinini, wea diswan hem strongim wei wea parents shud duim sem samting witim olketa son and dota bilong olketa. Olketa needim iu for spendem staka taem witim olketa. Iu need for garem inaf taem for teachim olketa, bikos hem nao wanem Jehovah talem parents for duim.Deuteronomy 6:4-9.

15. Wanem nao parents savve duim for protectim olketa pikinini?

15 World hem barava kamap moa wicked. From diswan, parents mas protectim olketa pikinini from pipol wea trae for spoelem olketa saed long sex. Tingim wei wea Jesus protectim olketa disaepol bilong hem, wea hem kolem olketa, “olketa smol pikinini.” Taem olketa soldia kam for tekem Jesus bikos hem klosap taem for hem dae, hem mekem arrangement for olketa disaepol savve ranawe. (John 13:33; 18:7-9) Sapos iu wanfala mami  or dadi, iu need for luksavve long olketa wei wea Devil trae for spoelem pikinini bilong iu. Iu need for warnim olketa firstaem. * (1 Peter 5:8) Distaem, winim enitaem bifor, plande samting stap wea savve spoelem olketa pikinini long physical wei and spiritual wei, and saed long fasin.

Wanem nao parents savve lanem from wei wea Jesus deal witim olketa pikinini?

16. Wanem nao parents savve lanem from wei wea Jesus deal witim olketa wik point bilong olketa disaepol?

16 Long naet bifor Jesus hem dae, olketa disaepol bilong hem raoa abaotem hu nao hem nambawan. Winim wei for kros long olketa, Jesus gohed for showimaot love taem hem trae for helpem olketa thru long samting hem talem and example bilong  hem. (Luke 22:24-27; John 13:3-8) Sapos iu wanfala mami or dadi, waswe, iu lukim wei wea iu savve followim example bilong Jesus taem iu need for stretem olketa pikinini bilong iu? Hem tru, iu bae need for panisim pikinini samfala taem, bat datfala panis shud no ova tumas, hem shud fitim nao rong wea pikinini duim. And tu, iu shud no givim datfala panis witim wei for barava kros. Iu mas tingting gud firstaem, mekem samting iu talem hem no “olsem sword wea katem man.” (Jeremiah 30:11; Proverbs 12:18) Sapos iu panisim pikinini long stretfala wei, hem bae fit for luksavve bihaen hao datfala panis hem barava fitim.Ephesians 6:4; Hebrews 12:9-11.

EXAMPLE FOR OLKETA PIKININI

17. Long olketa wanem wei nao Jesus showimaot perfect example for olketa pikinini?

17 Waswe, olketa pikinini savve lane from Jesus tu? Ia! Example bilong Jesus taem hem young showimaot nao wei wea olketa pikinini shud obeyim parents bilong olketa. Jesus hem sei: “Mi talemaot nomoa olketa samting wea Father hem teachim long mi.” Then hem sei: “Mi evritaem duim olketa samting wea mekem hem hapi.” (John 8:28, 29) Jesus obeyim Dadi bilong hem long heven, and Bible talem olketa pikinini for obeyim parents bilong olketa tu. (Ephesians 6:1-3) Jesus hem wanfala perfect pikinini, bat hem obeyim parents bilong hem, Joseph and Mary, nomata tufala no perfect. Masbi datwan hem barava help for mekem olketa nara member long famili bilong hem hapi!Luke 2:4, 5, 51, 52.

18. Why nao Jesus hem evritaem obeyim Dadi bilong hem long heven, and hu nao savve hapi taem olketa pikinini obeyim parents bilong olketa?

18 Waswe, olketa pikinini savve lukim samfala wei wea olketa savve kamap moabeta long hao olketa followim example bilong Jesus, wea datwan bae mekem parents bilong olketa hapi? Hem tru, samfala taem olketa pikinini savve faendem hem hard lelebet for obeyim parents, bat hem nao wanem God laekem olketa pikinini for duim. (Proverbs 1:8; 6:20) Jesus hem evritaem obeyim Dadi bilong hem long heven, nomata long taem wea hem  no isi for duim datwan tu. Wanfala taem, hem will bilong God for Jesus duim samting wea bae barava no isi for duim. Jesus hem sei: “Tek aotem disfala kap [samting wea God askem] from mi.” Nomata olsem, Jesus duim samting wea God askem, bikos hem luksavve hao Dadi bilong hem savve long best samting for hem duim. (Luke 22:42) Taem olketa pikinini lane for obey, olketa mekem parents bilong olketa and Dadi bilong olketa long heven barava hapi. *Proverbs 23:22-25.

Wanem nao olketa young pipol shud tingim taem olketa kasem temptation?

19. (a) Long wanem wei nao Satan hem testim olketa pikinini? (b) Sapos pikinini duim nogud samting, hao nao datwan savve affectim parents bilong hem?

19 Devil hem testim Jesus, and iumi savve sure hem bae trae for switim olketa young wan for duim samting wea rong tu. (Matthew 4:1-10) Satan savve iusim hevi from olketa nara young wan, wea datwan savve barava hard for deal witim. Dastawe hem barava important for olketa pikinini mas no kaban witim olketa wea duim nogud samting! (1 Corinthians 15:33) Dota bilong Jacob, Dinah, kaban witim olketa wea no worshipim Jehovah, and gogo, datwan mekem bigfala trabol kamap. (Genesis 34:1, 2) Sapos wanfala member long famili duim dirty fasin, tingim wei wea datwan savve affectim hapi bilong full famili!Proverbs 17:21, 25.

 MAIN SAMTING WEA MEKEM FAMILI HAPI

20. For mekem famili hapi, wanem nao each member bilong famili mas duim?

20 Hem moa isi for deal witim olketa problem long famili sapos iumi followim kaonsel insaed long Bible. Tru nao, wei for duim datwan hem main samting wea bae mekem famili hapi. So olketa hasband, lovem waef bilong iu, and deal witim hem long sem wei wea Jesus deal witim kongregeson. Olketa waef, stap anda long hasband bilong iu and followim example bilong datfala gud waef wea Proverbs 31:10-31 storyim. Parents, trainim olketa pikinini bilong iu. (Proverbs 22:6) Olketa dadi, ‘leadim famili bilong iu long gudfala wei.’ (1 Timothy 3:4, 5; 5:8) And olketa pikinini, obeyim parents bilong iu. (Colossians 3:20) No eniwan insaed famili hem perfect, evriwan savve duim olketa mistek. So iumi mas hambol, and askem narawan for forgivim iumi.

21. Olketa wanem nambawan samting bae kamap long future, and hao nao iumi savve garem hapi famili distaem?

21 Tru nao, Bible garem staka gudfala kaonsel and instruction for help mekem famili hem hapi. And tu, hem teachim iumi abaotem niu world bilong God and wanfala paradaes long earth wea bae fulap witim pipol wea worshipim Jehovah. (Revelation 21:3, 4) Olketa nambawan samting bae kamap long future! Bat nomata distaem tu, iumi savve garem hapi famili taem iumi followim olketa instruction bilong God insaed Word bilong hem, Bible.

^ par. 15 Iu savve kasem help for protectim pikinini long chapter 32 bilong buk Lane From Datfala Nambawan Teacher, wea Olketa Jehovah’s Witness pablisim.

^ par. 18 Only long taem wea mami or dadi askem pikinini for duim samting wea brekem law bilong God nao bae hem stret for pikinini no obeyim olketa.Acts 5:29.