Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER TWELV

Duim Olketa Samting wea Mekem God Hapi

Duim Olketa Samting wea Mekem God Hapi
  • Hao nao iu savve kamap fren bilong God?

  • Hao nao wei wea Satan kwestinim right bilong Jehovah for rul hem affectim iu?

  • Olketa wanem fasin nao God no laekem?

  • Hao nao iu savve mekem God hapi?

1, 2. Hu nao samfala man wea Jehovah ting long olketa olsem olketa gudfala fren bilong hem?

WANEM kaen man nao iu bae laek for fren witim? For sure, iu bae laek for kaban witim samwan wea interest long olketa sem samting wea iu interest long hem, and garem sem tingting and live followim sem standard. And iu bae interest for fren witim samwan wea garem olketa gudfala fasin, olsem honest fasin and kaenfala fasin.

2 Start from taem bifor kam, God chusim samfala man for kamap olketa gudfala fren bilong hem. Olsem example, Jehovah kolem Abraham fren bilong hem. (Isaiah 41:8; James 2:23) God hem sei David hem “wanfala man wea heart bilong mi hapi long hem” bikos hem kaen man wea Jehovah lovem. (Acts 13:22) And Jehovah ting long profet Daniel olsem “samwan wea barava spesol” long hem.Daniel 9:23.

3. Why nao Jehovah chusim samfala for kamap olketa fren bilong hem?

3 Why nao Jehovah ting long Abraham, David, and Daniel olsem olketa fren bilong hem? For ansarem datwan, tingim samting hem sei long Abraham: “Iu nao lisin long voice bilong mi.” (Genesis 22:18) So Jehovah hem fren gud witim olketa wea hambol and wea duim samting wea hem laekem olketa for duim. Hem sei olsem long olketa Israelite: “Obeyim voice  bilong mi, and mi bae kamap God bilong iufala, and iufala bae kamap pipol bilong mi.” (Jeremiah 7:23) Sapos iu obeyim Jehovah, iu tu savve kamap fren bilong hem!

JEHOVAH STRONGIM OLKETA FREN BILONG HEM

4, 5. Hao nao Jehovah showimaot strong bilong hem for pipol bilong hem?

4 Tingim gudfala samting wea man kasem taem hem fren witim God. Bible talem hao Jehovah hem lukaotem olketa chance “for showimaot strong bilong hem for olketa wea lovem hem witim full heart.” (2 Chronicles 16:9) Hao nao Jehovah savve showimaot strong bilong hem for iu? Psalm 32:8 talem wanfala wei. Hem sei: “Mi [Jehovah] bae mekem iu for garem fasin for luksavve and teachim iu wei wea iu mas followim. Mi bae givim advaes long iu and gohed for lukaftarem iu.”

5 Datwan hem barava showimaot Jehovah hem kea for iumi! Hem bae givim direction wea iu needim, and protectim iu taem iu gohed for followim datwan. God laek for helpem iu deal witim olketa hard taem and test wea kasem iu. (Psalm 55:22) So sapos iu servem Jehovah witim full heart bilong iu, iu savve feel sure olsem datfala man for raetem psalm, wea sei: “Mi putim Jehovah front long mi evritaem. From hem stap long raet saed bilong mi, mi bae no seksek.” (Psalm 16:8; 63:8) Tru nao, Jehovah savve helpem iu for duim olketa samting wea mekem hem hapi. Bat iu savve finis hao wanfala enemy bilong God laek stopem iu for duim datwan.

SAMTING WEA SATAN KWESTINIM

6. Wanem nao tingting bilong Satan abaotem reason why olketa man servem God?

6 Chapter 11 long disfala buk explainim hao Satan hem kwestinim rul bilong God. Satan accusim God taem hem sei hem laea, and from samting hem talem, hem givim idea hao Jehovah hem strict tumas taem hem no letem Adam and Eve for disaedem seleva samting wea stret and samting wea no stret. Bihaen Adam and Eve sin and earth hem start for fulap witim olketa pikinini bilong olketa, Satan hem kwestinim nao samting wea muvim olketa man for lovem God. Long tingting bilong Satan,  hem no love for God nao wea muvim pipol for servem God. Hem tingse hem savve mekem eniwan for againstim God. Iumi savve Satan hem garem tingting olsem bikos long samting wea hem talem abaotem Job. Hu nao Job, and hao nao samting wea Satan talem hem affectim Job?

7, 8. (a) Wanem nao mekem Job hem barava difren from olketa narawan long taem bilong hem? (b) Wanem nao Satan talem wea showimaot hem kwestinim reason for why nao Job servem God?

7 Job hem laef samting olsem 3,600 year bifor. Iumi savve hem wanfala gud man, bikos Jehovah hem sei: ‘No eniwan olsem hem stap long earth. Hem man wea no garem blame and garem stretfala fasin, hem fraet long God and no duim nogud samting.’ (Job 1:8) Job hem mekem God hapi.

8 Satan kwestinim reason for why nao Job servem God. Devil hem sei long Jehovah: “Iu nao protectim [Job] and haos bilong hem and evri samting wea hem garem. Evri samting wea hem duim iu blessim, and olketa animal bilong hem staka tumas long earth. Bat, plis, iu spoelem evri samting wea hem garem, and lukim hao hem bae barava tok nogud long iu.”Job 1:10, 11.

9. Wanem nao Jehovah duim taem Satan kwestinim Job, and why nao olsem?

9 So long tingting bilong Satan, only reason why Job servem Jehovah hem bikos hem laek for kasem gud samting bak from Jehovah. Devil talem tu hao sapos Job kasem test, hem bae againstim God. Wanem nao Jehovah duim taem Satan talem datwan? From Satan kwestinim love bilong Job for God, Jehovah letem Satan for testim Job. Diswan bae showimaot klia sapos Job hem really lovem God or nomoa.

JOB KASEM TEST

10. Olketa wanem hard samting nao kasem Job, and wanem nao hem duim?

10 Satan testim Job long samfala difren wei. Pipol stealim samfala animal bilong Job and killim dae olketa narawan. Pipol killim dae klosap evri servant bilong hem. Diswan mekem Job for kasem hard taem saed long selen. Then, wanfala big wind killim dae evri pikinini bilong Job. Bat nomata long olketa  barava nogud samting hia, “Job hem no sin or talem eni nogud samting abaotem God.”Job 1:22.

11. (a) Wanem nao nara samting wea Satan accusim long Job, and wanem nao Jehovah duim? (b) Wanem nao Job no duim taem hem kasem datfala nogud sik?

11 Satan no givap. Maet long tingting bilong hem, nomata Job savve deal witim wei wea hem lusim olketa material samting, olketa servant, and olketa pikinini, hem bae againstim God sapos hem kasem wanfala sik. Jehovah letem Satan for mekem Job kasem wanfala barava nogud sik, wea mekem hem garem bigfala pain. Bat nomata olsem, datwan no mekem Job lusim faith bilong hem long God. Hem sei olsem: “Bae mi no lusim faithful fasin bilong mi go kasem taem mi dae!”Job 27:5.

Job kasem reward from wei wea hem faithful

12. Hao nao Job pruvim samting wea Devil talem hem no tru?

12 Job no savve hao Satan nao mekem hem for kasem olketa trabol hia. From hem no savve hao Satan kwestinim right bilong Jehovah for rul, Job hem wari nogud God nao mekem hem kasem olketa trabol hia. (Job 6:4; 16:11-14) Nomata olsem, hem gohed for faithful long Jehovah. Satan talem hao Job servem God from olketa selfish reason, bat wei wea Job gohed faithful pruvim hao samting wea Satan talem hem barava no tru!

13. Wanem nao kamaot from wei wea Job hem faithful long God?

13 Faithful fasin bilong Job mekem Jehovah fit for barava ansarem nao samting wea Satan kwestinim. Job hem wanfala tru fren bilong Jehovah, and God rewardim hem for faithful fasin bilong hem.Job 42:12-17.

LONG WANEM WEI NAO IU INSAED DISWAN?

14, 15. Why nao iumi fit for sei Satan no kwestinim Job nomoa, bat hem kwestinim evri man?

14 Hem no Job nomoa wea Satan kwestinim faithful fasin bilong hem. Hem kwestinim faithful fasin bilong iu tu. Diswan hem showaot klia long Proverbs 27:11 wea sei: “Kamap wise, son bilong mi, and mekem heart bilong mi hapi, mekem mi savve givim ansa long datwan wea tok daonem mi.” Toktok hia, wea Solomon raetem plande year bihaen Job hem dae, showimaot hao Satan still gohed for  tok daonem God and accusim olketa servant bilong Hem. Taem iumi duim olketa samting wea mekem Jehovah hapi, iumi help for givim ansa for samting wea Satan talem, and datwan hem mekem heart bilong God hapi. Hao nao tingting bilong iu abaotem datwan? Waswe, iu agree hao hem bae nambawan for savve share for pruvim hao samting wea Satan talem hem no tru, nomata sapos datwan minim iu mas changem samfala samting long laef bilong iu?

15 Tingim hao Satan hem sei: “Evri samting wea man garem hem bae givim for sevem soul bilong hem.” (Job 2:4) Taem hem sei “man,” Satan showimaot klia hao hem no kwestinim Job nomoa, bat hem kwestinim evri man. Datwan hem barava important point. Satan hem kwestinim faithful fasin bilong iu. Devil bae laekem iu for no obeyim God and for no duim samting wea raeteous taem olketa hard samting hem kamap. Hao nao maet Satan hem trae for duim diswan?

16. (a) Wanem nao samfala wei wea Satan trae for mekem pipol no obeyim God? (b) Hao nao maet Devil iusim olketa wei hia for mekem iu no faithful?

16 Chapter 10 storyim finis olketa wei wea Satan iusim for trae mekem pipol no obeyim God. Hem attakim iumi “olsem wanfala lion wea singaot strong and lukaotem samwan for kaikaim.” (1 Peter 5:8) So maet Satan iusim olketa fren, relative, or olketa narawan for trae stopem wei wea iu studyim and followim Bible. * (John 15:19, 20) Long narasaed, Satan “gohed for changem hemseleva for kamap wanfala angel bilong laet.” (2 Corinthians 11:14) Devil savve iusim olketa wei wea haed for trikim iu and stopem iu for duim olketa samting wea mekem God hapi. Hem savve trae tu for mekem iu wikdaon, maet long wei for mekem iu feel olsem iu no fit for mekem God hapi. (Proverbs 24:10) Nomata sapos Satan hem act olsem wanfala “lion wea singaot” or “wanfala angel bilong laet,” tingting bilong hem no change: Hem tingse iu bae stop for servem God sapos iu feisim olketa  hard taem or temptation. Hao nao iu savve givim ansa for diswan and pruvim iu faithful long God, olsem Job hem duim?

OBEYIM OLKETA KOMANDMENT BILONG JEHOVAH

17. Wanem nao main reason for obeyim olketa komandment bilong Jehovah?

17 Iu savve givim ansa for samting Satan talem taem iu duim olketa samting wea mekem God hapi. Hao nao iu savve duim datwan? Bible hem sei: “Iu mas lovem God bilong iu Jehovah witim full heart bilong iu and full soul bilong iu and full strong bilong iu.” (Deuteronomy 6:5) Taem love bilong iu for Jehovah hem kamap strong, iu bae barava laek for duim samting wea hem askem iu for duim. Aposol John hem sei olsem: “Samting wea showimaot iumi lovem God nao hem wei wea iumi obeyim olketa komandment bilong hem.” Sapos iu lovem Jehovah witim full heart bilong iu, bae iu lukim hao “hem no wanfala hevi for obeyim olketa komandment bilong hem.”1 John 5:3.

18, 19. (a) Wanem nao samfala komandment bilong Jehovah? (Lukim box wea garem title “ Rejectim Samting wea Jehovah Heitim.”) (b) Hao nao iumi savve God no askem iumi for duim samting wea iumi no fit for duim?

18 Wanem nao olketa komandment bilong Jehovah? Samfala nao hem olketa samting wea iumi shud stap klia long hem. Olsem example, lukim box wea garem title “ Rejectim Samting wea Jehovah Heitim.” Bae iu lukim long there list bilong olketa samting wea Bible barava againstim. Maet firstaem iu tingse samfala samting long list hem no barava nogud. Bat bihaen iu ting raonem olketa scripture long there, datwan bae helpem iu for savve hao olketa law bilong Jehovah olketa wise. Maet samting wea hard winim eni nara samting iu feisim bifor, hem wei for iu changem samfala fasin bilong iu. Nomata olsem, wei for duim olketa samting wea mekem God hapi bae barava mekem iumi hapi and feel gud. (Isaiah 48:17, 18) And hem samting wea iu savve duim. Hao nao iumi savve sure long datwan?

19 Jehovah nating askem iumi for duim samting wea iumi no fit for duim. (Deuteronomy 30:11-14) Hem savve wanem iumi fit for duim, and wanem iumi no fit for duim, winim  iumi. (Psalm 103:14) And tu, Jehovah savve givim iumi strong wea iumi needim for obeyim hem. Aposol Paul hem sei: ‘God hem faithful, and hem bae no letem eni temptation kasem iu wea iu no fit for winim, bat witim datfala temptation hem bae mekem wei for iu savve gohed and no givap.’ (1 Corinthians 10:13) For helpem iu gohed and no givap, Jehovah savve givim iu “paoa wea winim wanem iumi garem.” (2 Corinthians 4:7) Bihaen hem gohed strong thru long plande hard taem, Paul hem fit for sei: “Mi kasem strong for duim evri samting from datwan wea givim paoa long mi.”Philippians 4:13.

 GAREM OLKETA FASIN WEA MEKEM GOD HAPI

20. Olketa wanem fasin wea God lovem nao iu shud garem, and why nao olketa fasin hia hem important?

20 Moa samting hem insaed wei for mekem Jehovah hapi winim for just stap klia long olketa samting wea hem heitim nomoa. Iu mas lovem tu samting wea hem lovem. (Romans 12:9) Iumi laek for fren witim pipol wea interest and tinghae long olketa sem samting wea iumi interest and tinghae long hem. Jehovah hem olsem tu. So lane for lovem olketa sem samting wea hem lovem. Psalm 15:1-5 storyim samfala samting hia wea God lovem. Disfala scripture story abaotem olketa wea God  ting long olketa olsem fren bilong hem. Olketa fren bilong Jehovah showimaot samting wea Bible kolem “olketa frut bilong spirit.” Insaed diswan hem olketa fasin olsem “love, hapi, peace, long-safaring, kaenfala fasin, gudfala fasin, faith, kwaet fasin, fasin for kontrolem seleva.”Galatians 5:22, 23.

21. Wanem nao bae helpem iu for garem olketa fasin wea God lovem?

21 Wei for readim and studyim Bible evritaem bae helpem iu for garem olketa fasin wea Jehovah lovem. And taem iu lanem olketa samting wea God laekem iu for duim, datwan bae helpem iu for mekem tingting bilong iu hem semsem olsem tingting bilong God. (Isaiah 30:20, 21) Taem iu strongim go moa love bilong iu for Jehovah, iu bae barava laek for duim olketa samting wea mekem God hapi.

22. Sapos iu duim olketa samting wea mekem God hapi, wanem nao bae kamaot from datwan?

22 Iumi mas waka hard for trae duim olketa samting wea mekem Jehovah hapi. Bible hem sei, for changem laef bilong iumi, iumi mas aotem oldfala fasin bilong iumi olsem wei for aotem wanfala kaleko, and werem wanfala niu kaleko, wea minim niufala fasin. (Colossians 3:9, 10) Bat saed long olketa komandment bilong Jehovah, man wea raetem olketa psalm hem sei: “Wei for obeyim olketa bae givim bigfala reward.” (Psalm 19:11) Bae iu tu lukim hao wei for duim olketa samting wea mekem God hapi bae mekem iu barava hapi and kasem gudfala samting. Taem iu duim datwan, iu givim ansa for samting wea Satan hem kwestinim and iu mekem heart bilong Jehovah hapi!

^ par. 16 Diswan no minim Satan hem kontrolem olketa wea againstim iu. Bat Satan hem god bilong disfala world, and full world stap anda long paoa bilong hem. (2 Corinthians 4:4; 1 John 5:19) So iu shud no sapraes sapos samfala man no laekem iu for duim olketa samting wea mekem God hapi, or maet againstim iu.