Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER FIVE

Datfala Ransom—Nambawan Present From God

Datfala Ransom—Nambawan Present From God
  • Wanem nao datfala ransom?

  • Hao nao God provaedem datwan?

  • Wanem gud samting nao iu savve kasem from datwan?

  • Hao nao iu savve showimaot iu tinghae long datwan?

1, 2. (a) Wanem kaen present nao iu barava tinghae long hem? (b) Why nao ransom hem best present wea iu savve kasem?

WANEM nao best present wea iu kasem? Samting wea mekem iumi tinghae long wanfala present hem no kost bilong hem. Iumi bae tinghae long present sapos datwan hem samting wea iumi barava needim or wea mekem iumi hapi.

2 Iumi savve tingim staka present wea iumi laek for kasem, bat wanfala nao hem winim evri narawan. Hem present wea God givim long olketa man. Jehovah givim iumi staka samting, bat barava best samting wea hem givim long iumi hem datfala ransom sakrifaes bilong Son bilong hem, Jesus Christ. (Matthew 20:28) Disfala chapter hem showim hao datfala ransom hem best present wea iu savve kasem, bikos hem savve barava mekem iu hapi, and savve satisfaem olketa barava important need bilong iu. Ransom hem showimaot God lovem iu winim eni nara samting wea showimaot love bilong hem.

 WANEM NAO DATFALA RANSOM?

3. Wanem nao datfala ransom, and wanem nao iumi need for savve long hem for minim why iumi barava needim disfala present?

3 Ransom hem samting wea Jehovah provaedem for sevem olketa man from sin and dae. (Ephesians 1:7) For minim disfala Bible teaching, iumi need for ting go bak long samting wea happen long garden bilong Eden. Wei for savve long samting wea Adam lusim taem hem sin, bae helpem iumi minim why datfala ransom hem present wea iumi barava needim.

4. Wanem kaen laef nao Adam hem garem?

4 Taem Jehovah creatim Adam, hem givim hem samting wea barava spesol, hem nao, perfect laef. From hem garem perfect body and mind, Adam bae nating sik, olo, or dae. From hem perfect, hem garem spesol wei for fren witim Jehovah. Bible talem hao Adam hem wanfala “son bilong God.” (Luke 3:38) So Adam hem fren gud witim Jehovah God, olsem wei wea wanfala son hem fren gud witim dadi wea lovem hem. Jehovah story witim disfala son bilong hem long earth, and givim hem olketa naes waka for duim and talem hem wanem hem laekem hem for duim.Genesis 1:28-30; 2:16, 17.

5. Wanem nao Bible minim taem hem talem hao God wakem Adam long “image bilong hem”?

5 God wakem Adam long “image bilong hem.” (Genesis 1:27) Datwan no minim Adam hem luk olsem God. Olsem iumi lanem finis long Chapter 1 bilong disfala buk, Jehovah hem wanfala spirit wea man no savve lukim. (John 4:24) So Jehovah no garem body olsem iumi. From God wakem Adam long image bilong hem, hem garem olketa sem fasin wea God hem garem, olsem love, wisdom, justice, and paoa. Adam hem olsem Dadi bilong hem long nara important wei tu. Adam hem free for disaedem samting. So Adam hem no olsem olketa animal wea savve duim nomoa samting wea God markem olketa for duim taem hem creatim olketa. Hem savve disaedem samting, and hem savve chus for duim samting  wea stret or wea no stret. Sapos hem chus for obeyim God, hem bae laef for olowe long Paradaes.

6. Taem Adam no obeyim God, wanem nao hem lusim, and hao nao diswan affectim olketa pikinini bilong hem?

6 So hem klia hao taem Adam no obeyim God and kasem judgment for dae, hem lusim staka samting. From hem sin, hem lusim wei for garem perfect laef and olketa gud samting wea kamaot from datwan. (Genesis 3:17-19) Sorre nao, Adam lusim perfect laef, no for hemseleva nomoa, bat for olketa pikinini bilong hem tu. Word bilong God hem sei: “Thru long wanfala man [Adam] sin hem kam insaed long world and dae hem kam from sin, dastawe dae hem kasem evri man bikos evri man hem sin.” (Romans 5:12) Tru nao, iumi evriwan kasem sin from Adam. Dastawe Bible talem hao hem mekem hemseleva and olketa pikinini bilong hem for kamap slave long sin and dae. (Romans 7:14) No eni hope stap for Adam and Eve bikos tufala min for no obeyim God. Bat waswe long olketa pikinini bilong olketa, wea minim iumi tu?

7, 8. Wanem nao tufala samting wea join witim ransom?

7 Jehovah sevem olketa man witim datfala ransom. Wanem nao wanfala ransom? Tufala samting nao insaed diswan. First samting, ransom hem samting wea samwan peim for mekem narawan kamap free, or for baem bak samting. Maet wanfala example hem taem samwan peim selen for mekem wanfala prisoner kamap free long taem bilong war. Mek-tu samting, ransom hem kost bilong samting. Hem olsem compensation wea man givim for samting wea hem spoelem. Olsem example, sapos pigpig bilong samwan spoelem garden bilong narawan, hem mas peim compensation wea fitim kost bilong samting wea pigpig hia spoelem.

8 Wanem nao bae price wea fitim for barava nogud samting wea Adam duim long iumi and for mekem iumi kamap free from sin and dae? Iumi bae storyim datfala ransom wea Jehovah provaedem and gud samting wea iu savve kasem from datwan.

 SAMTING JEHOVAH DUIM FOR PROVAEDEM DATFALA RANSOM

9. Wanem ransom nao bae fitim for changem bak samting wea Adam lusim?

9 From wanfala perfect laef hem lus, laef bilong man wea no perfect no savve baem bak datwan. (Psalm 49:7, 8) Need hem stap for peim wanfala ransom wea semsem witim samting wea lus. Diswan hem fitim principle bilong perfect justice insaed Word bilong God, wea sei: “Soul mas changem soul.” (Deuteronomy 19:21) So wanem nao bae compensation wea fitim for datfala perfect laef bilong Adam wea lus? Ransom for changem perfect laef wea Adam lusim mas narafala laef wea perfect tu.1 Timothy 2:6.

10. Hao nao Jehovah provaedem datfala ransom?

10 Hao nao Jehovah provaedem datfala ransom? Hem sendem kam long earth wanfala perfect spirit son bilong hem. Bat Jehovah no just sendem eni spirit son nomoa. Hem sendem datfala only Son wea hemseleva wakem, wea hem lovem winim evri nara son bilong hem. (1 John 4:9, 10) Disfala Son hem willing nomoa for lusim hom bilong hem long heven. (Philippians 2:7) Olsem iumi lanem finis long Chapter 4, Jehovah duim wanfala mirakol taem hem putim laef bilong Son bilong hem insaed bele bilong Mary. Thru long holy spirit bilong God, Jesus hem born olsem wanfala perfect man wea no garem sin.Luke 1:35.

Jehovah givim only Son wea hemseleva wakem olsem wanfala ransom for iumi

11. Hao nao wanfala man savve kamap ransom for plande million pipol?

11 Hao nao wanfala man savve kamap ransom for plande million pipol? For ansarem diswan, tingim nara kwestin: Hao nao olketa man kamap olketa sinner firstaem? Iumi lanem finis hao taem Adam hem sin hem lusim wei for garem perfect laef. So hem no savve givim perfect laef long olketa pikinini bilong hem nao. Only samting wea hem savve givim long olketa hem sin and  dae. Bible kolem Jesus “datfala last Adam.” Hem garem laef wea perfect and no enitaem hem sin. (1 Corinthians 15:45) So hem olsem Jesus changem Adam for mekem hem savve sevem iumi. Taem hem obeyim God evribit and sakrifaesim perfect laef bilong hem, Jesus peim price for sin bilong Adam. Long wei olsem, Jesus givim hope long iumi olketa pikinini bilong Adam.Romans 5:19; 1 Corinthians 15:21, 22.

12. Wei wea Jesus safa hem pruvim wanem samting?

12 Bible talem plande samting abaotem bigfala safa and pain wea kasem Jesus bifor hem dae. Olketa whipim hem nogud and nilam hem long wanfala post wea mekem hem garem bigfala pain go kasem hem dae. (John 19:1, 16-18, 30; Appendix wea garem title “Why Olketa Tru Christian No Iusim Cross Long Worship”) Why nao Jesus mas barava safa olsem? Long nara chapter insaed disfala buk, iumi bae lanem hao Satan hem kwestinim sapos eni servant bilong Jehovah bae faithful long hem taem olketa kasem hard taem or test. Wei wea Jesus hem gohed for faithful nomata hem kasem bigfala wei for safa givim barava best ansa for samting wea Satan kwestinim. Jesus pruvim hao wanfala perfect man wea free for disaed savve showimaot perfect wei for faithful long God nomata wanem nao Devil hem duim. Masbi Jehovah hem barava hapi for lukim Son bilong hem wea hem lovem tumas, hem faithful olsem!Proverbs 27:11.

13. Hao nao Jesus peim datfala ransom?

13 Hao nao Jesus peim datfala ransom? Long mek-14 day long Nisan, wea hem nao wanfala month long kalenda bilong olketa Jew, long year 33 C.E., God letem olketa man for killim dae Son bilong hem wea perfect and wea no sin. So Jesus sakrifaesim perfect laef bilong hem “wantaem for olowe.” (Hebrews 10:10) Long mek-thri day bihaen Jesus hem dae, Jehovah mekem hem laef bak olsem wanfala spirit moa. Long heven, Jesus givim long God perfect laef wea hem sakrifaesim  olsem ransom for baem bak olketa pikinini bilong Adam. (Hebrews 9:24) Jehovah acceptim sakrifaes bilong Jesus olsem ransom wea hem mas peim for sevem olketa man from wei for slave long sin and dae.Romans 3:23, 24.

GUD SAMTING IU SAVVE KASEM FROM RANSOM

14, 15. Wanem nao iumi mas duim for kasem “forgiveness for olketa sin bilong iumi”?

14 Nomata iumi olketa sinner, disfala ransom savve mekem iumi kasem staka nambawan blessing. Wanem nao samfala gud samting wea iumi savve kasem distaem and long future from disfala nambawan present from God?

15 Forgiveness for olketa sin. From iumi kasem wei for no perfect from Adam, iumi barava stragol for duim samting wea stret. Iumi evriwan sin long samting iumi talem and duim. Bat ransom sakrifaes bilong Jesus mekem wei for iumi savve kasem “forgiveness for olketa sin bilong iumi.” (Colossians 1:13, 14) Bat for kasem forgiveness, iumi mas barava repent. And tu, Jehovah bae forgivim iumi sapos iumi askem hem long hambol wei for hem duim datwan, and sapos iumi showimaot faith long ransom sakrifaes bilong Jesus.1 John 1:8, 9.

16. Wanem nao mekem iumi fit for worshipim God witim klin conscience, and why nao hem gud for garem conscience olsem?

16 Garem klin conscience front long God. Sapos man garem guilty conscience, datwan savve mekem hem feel olsem hem iusles and no garem eni hope. Bat from iumi savve kasem forgiveness thru long ransom, Jehovah mekem wei for iumi savve worshipim hem witim klin conscience nomata iumi no perfect. (Hebrews 9:13, 14) Diswan mekem wei for iumi savve feel free for story witim Jehovah long prea. (Hebrews 4:14-16) Wei for keepim conscience bilong iumi klin bae givim iumi peace long mind, iumi bae feel gud from iumi duim stret samting, and iumi bae hapi.

17. Dae bilong Jesus mekem wei for iumi savve kasem olketa wanem blessing?

 17 Hope for laef olowe long paradaes. Long Romans 6:23 hem sei: “Pei bilong sin hem dae.” Bat datfala sem verse hem sei: “Bat present wea God givim hem laef olowe thru long Lord bilong iumi, Christ Jesus.” Long Chapter 3 bilong disfala buk, iumi storyim finis olketa blessing wea iumi bae kasem long datfala Paradaes. (Revelation 21:3, 4) Dae bilong Jesus mekem wei for iumi savve kasem evri blessing hia long future, wea wanfala nao hem perfect health and laef olowe. For kasem olketa blessing hia, iumi need for showimaot iumi tinghae long disfala present from God, wea hem nao datfala ransom.

HAO NAO IU SAVVE SHOWIMAOT IU TINGHAE?

18. Why nao iumi shud thankiu long Jehovah for wei wea hem provaedem datfala ransom?

18 Why nao iumi shud barava thankiu long Jehovah for datfala ransom? Tingim diswan: Samting wea mekem iumi tinghae long wanfala present hem sapos man wea givim datwan hem iusim taem bilong hem, hem waka hard, or hem spendem selen for givim iumi datwan. Hem barava muvim heart bilong iumi taem iumi lukim hao wanfala present hem showimaot bigfala love wea man garem for iumi. Datfala ransom  hem present wea winim eni narafala present, bikos God mekem barava bigfala sakrifaes for provaedem datwan. Long John 3:16 hem sei: “God lovem world tumas dastawe hem givim only Son wea hemseleva nao wakem.” Ransom hem barava pruvim winim eni nara samting hao Jehovah lovem iumi. Hem pruvim tu hao Jesus lovem iumi, bikos hem willing for givim laef bilong hem for iumi. (John 15:13) So disfala ransom shud barava mekem iumi sure hao Jehovah and Son bilong hem lovem iumi wanwan.Galatians 2:20.

Wei for kasem moa savve abaotem Jehovah hem wanfala wei wea iu savve showimaot iu tinghae long ransom

19, 20. Long olketa wanem wei nao iu savve showimaot iu tinghae long ransom wea God givim olsem present?

19 Hao nao iu savve showimaot iu tinghae long disfala present from God? First samting, iu mas savve gud long disfala Nambawan man for givim samting, Jehovah. (John 17:3) Wei for iusim disfala buk for studyim Bible bae helpem iu duim datwan. Taem iu kasem moa savve abaotem Jehovah, love wea iu garem for hem bae kamap moa big, wea datwan bae muvim iu for laek mekem hem hapi.1 John 5:3.

20 Showimaot faith long ransom sakrifaes bilong Jesus. Bible hem sei olsem abaotem Jesus: “Man wea showimaot faith long Son bae laef olowe.” (John 3:36) Hao nao iumi savve showimaot faith long Jesus? Iumi no savve showimaot faith thru long samting wea iumi talem nomoa. Long James 2:26 hem sei: “Faith wea no muvim man for duim samting hem dae finis.” Tru nao, iumi showimaot tru faith thru long wei for “duim samting.” Wanfala wei for showimaot iumi garem faith long Jesus hem for duim best bilong iumi for followim example bilong hem, no just long samting iumi talem nomoa, bat long samting iumi duim tu.John 13:15.

21, 22. (a) Why nao iumi shud attendim celebration bilong Evening Kaikai Bilong Lord wea kamap evri year? (b) Chapter 6 and 7 bae explainim wanem samting?

21 Attendim celebration bilong Evening Kaikai Bilong Lord wea kamap evri year. Long naet bilong Nisan 14, 33 C.E., Jesus startim wanfala spesol celebration wea Bible kolem “evening kaikai bilong Lord.” (1 Corinthians 11:20; Matthew  26:26-28) Nara nem for disfala celebration hem Memorial bilong dae bilong Christ. Jesus startim diswan for helpem olketa aposol bilong hem and evri tru Christian wea kamap bihaen for tingim olowe hao hem givim laef bilong hem olsem wanfala ransom taem hem dae olsem wanfala perfect man. Jesus talem disfala komand abaotem celebration hia: “Gohed for duim olsem for rememberim mi.” (Luke 22:19) Wei for celebratem Memorial hem remindim iumi long bigfala love wea Jehovah and Jesus showim long iumi. Iumi savve showimaot iumi tinghae long ransom taem iumi celebratem Memorial bilong dae bilong Jesus evri year. *

22 Tru nao, disfala ransom wea Jehovah provaedem hem wanfala nambawan present. (2 Corinthians 9:14, 15) Disfala nambawan present savve helpem tu olketa wea dae finis. Chapter 6 and 7 bae explainim hao nao olsem.

^ par. 21 For moa information abaotem mining bilong Evening Kaikai Bilong Lord, lukim Appendix wea garem title “Evening Kaikai Bilong Lord—Wanfala Celebration wea Honorim God.”