Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wanem Nao Really Samting wea Bible Teachim?

 CHAPTER EITIN

Baptism and Wei wea Iu Fren Witim God

Baptism and Wei wea Iu Fren Witim God
  • Wanem nao stretfala wei for baptaesim man wea laek for kamap Christian?

  • For kasem mark for baptaes, wanem nao iu need for duim?

  • Wanem nao man mas duim for dedicatem hemseleva long God?

  • Wanem nao spesol reason for man baptaes?

1. Why nao wanfala bigman from Ethiopia ask for baptaes?

“LUKIM! Wanfala pool wata long hia; waswe, eni samting stopem mi for baptaes?” Hem nao samting wea wanfala bigman bilong Ethiopia askem long first century. Wanfala Christian wea nem bilong hem Philip pruvim long hem hao  Jesus nao datfala Messiah wea God promis for sendem kam. Samting wea datfala man from Ethiopia lanem from Bible muvim heart bilong hem for duim samting. Hem showimaot hao hem laek for baptaes!Acts 8:26-36.

2. Why nao iu shud tingting strong abaotem wei for iu savve baptaes?

2 Sapos iu studyim disfala buk kam kasem disfala chapter witim wanfala Jehovah’s Witness, maet iu redi for ask olsem, ‘Waswe, eni samting stopem mi for baptaes?’ Iu lanem finis promis long Bible for laef olowe long Paradaes. (Luke 23:43; Revelation 21:3, 4) Iu lanem tu truth abaotem samting wea happen long olketa wea dae finis, and abaotem datfala resurrection hope. (Ecclesiastes 9:5; John 5:28, 29) Maet distaem iu kaban witim Olketa Jehovah’s Witness long olketa kongregeson meeting bilong olketa and iu lukim hao olketa worship long stretfala wei. (John 13:35) Bat barava important samting nao, maet iu start finis for fren gud witim Jehovah God.

3. (a) Wanem komand nao Jesus givim olketa follower bilong hem? (b) Wanem nao stretfala wei for baptaesim wanfala man?

3 Hao nao iu savve showimaot iu laek for servem God? Jesus hem sei olsem long olketa follower bilong hem: “Go and mekem pipol long evri nation for kamap disaepol bilong mi, baptaesim olketa.” (Matthew 28:19) Jesus nao showimaot example long diswan taem hem baptaes long wata. Olketa no just kapsaetem lelebet wata long hem, and olketa no pourimaot wata long hed bilong hem tu. (Matthew 3:16) Datfala word “baptaes” kam from wanfala Greek word wea minim for putim andanit long wata. So Christian wei for baptaesim man hem for barava putim hem andanit long wata.

4. Wanem nao wei for baptaes long wata hem showimaot?

4 Evriwan wea laek for fren witim Jehovah God mas baptaes long wata. Wei for baptaes showimaot long pablik hao iu laek for servem God. Hem showimaot hao iu barava hapi for duim will bilong Jehovah. (Psalm 40:7, 8) Bat for kasem mark for baptaes iu mas duim olketa important samting firstaem.

 NEEDIM SAVVE AND FAITH

5. (a) Wanem nao first samting wea man mas duim for kasem mark for baptaes? (b)  Why nao olketa Christian meeting hem important?

5 Iu start for duim first samting finis taem iu kasem savve abaotem Jehovah God and Jesus Christ, maet from wei for studyim Bible evri week. (John 17:3) Bat iu need for lanem plande moa samting. Olketa Christian mas “fulap witim stretfala savve abaotem will bilong [God].” (Colossians 1:9) Wei for attendim olketa meeting bilong Olketa Jehovah’s Witness bae barava helpem iu for duim datwan. Hem important for attendim olketa meeting hia. (Hebrews 10:24, 25) Wei for evritaem attendim olketa meeting bae helpem iu for kasem moa savve abaotem God.

For kasem mark for baptaes, important samting for duim nao hem for kasem savve abaotem Word bilong God

6. Haomas savve abaotem Bible nao iu mas garem bifor iu bae fit for baptaes?

6 Iu no need for savve long evri samting insaed Bible bifor iu fit for baptaes. Datfala bigman from Ethiopia garem lelebet savve, bat hem needim help for minim samfala scripture. (Acts 8:30, 31) Olsem tu, iu garem plande samting for lanem yet. For tok stret, iu bae nating finis for lane abaotem God. (Ecclesiastes 3:11) Bat bifor iu savve baptaes, iu need for savve and acceptim samfala main teaching long Bible. (Hebrews 5:12) Samfala long olketa teaching hia hem truth abaotem wanem hem happen long olketa wea dae finis, and olketa reason why nem bilong God and Kingdom bilong hem important.

7. Wei for studyim Bible shud affectim iu long wanem wei?

7 Bat hem no inaf for garem savve nomoa, bikos “sapos man no garem faith, hem hard nao for mekem [God] hapi.” (Hebrews 11:6) Bible talem iumi hao taem samfala long taon bilong Corinth bifor herem datfala Christian message, olketa “start for biliv and baptaes.” (Acts 18:8) Olsem tu, wei for studyim Bible shud mekem iu garem faith hao hem nao Word bilong God. Wei for studyim Bible shud helpem iu garem faith hao olketa promis bilong God bae fulfill, and hao  sakrifaes bilong Jesus savve sevem iu.Joshua 23:14; Acts 4:12; 2 Timothy 3:16, 17.

TALEM TRUTH INSAED BIBLE LONG NARAWAN

8. Wanem nao bae muvim iu for talem olketa narawan abaotem samting wea iu lanem?

8 Taem faith hem kamap strong insaed heart bilong iu, bae iu laekem tumas for talem olketa narawan abaotem samting wea iu lanem. (Jeremiah 20:9) Diswan bae barava muvim iu for story abaotem God and olketa plan bilong hem long olketa narawan.2 Corinthians 4:13.

Faith shud muvim iu for storyim samting iu bilivim witim olketa narawan

9, 10. (a) Maet hu nao olketa first wan wea iu savve storyim Bible truth long olketa? (b) Wanem nao iu shud duim sapos iu laek for joinim kongregeson for duim preaching waka?

9 Maet firstaem, iu savve start for isisi storyim truth long Bible witim olketa relative, fren, neiba, and pipol wea iu waka witim. Gogo, bae iu laek for joinim preaching waka wea kongregeson arrangem. Long datfala taem, feel free for storyim diswan witim Witness wea teachim Bible long iu. Sapos hem luk olsem iu fit for join insaed preaching waka, bae olketa arrange for iu and pablisa wea study witim iu for meet witim tufala elder long kongregeson.

10 Diswan bae helpem iu for savve long samfala elder wea shepherdim olketa sheepsheep bilong God. (Acts 20:28; 1 Peter 5:2, 3) Sapos olketa elder hia lukim hao iu minim and bilivim olketa main teaching insaed Bible, iu live followim olketa principle wea God givim, and iu barava want for kamap wanfala Jehovah’s Witness, olketa bae talem iu hao iu fit for share long preaching waka olsem wanfala anbaptaes pablisa.

11. For mekem iu fit for duim preaching waka witim kongregeson, wanem nao maet samfala change wea iu need for duim firstaem?

11 Long narasaed, maet iu need for changem samfala wei bilong iu mekem iu fit for duim preaching waka witim kongregeson. Maet insaed diswan, hem for lusim wei for duim samfala samting wea iu haedem from olketa narawan bifor.  So, bifor iu ask for kamap wanfala anbaptaes pablisa, iu need for finis for duim olketa bigfala rong, olsem dirty fasin, fasin for drunk, and iusim olketa nogud drug.1 Corinthians 6:9, 10; Galatians 5:19-21.

REPENT AND TAN RAON

12. Why nao iu mas repent?

12 Iu mas duim olketa nara samting bifor iu savve fit for baptaes. Aposol Peter hem sei: “Repent, and tan raon mekem iufala kasem forgiveness for olketa sin bilong iufala.” (Acts 3:19) For repent hem minim for barava sorre long samting wea iu duim. Hem barava fitim for man repent sapos long bifor hem duim olketa bigfala rong olsem dirty fasin, bat nomata sapos hem no duim olketa samting olsem, bae fitim for hem repent. Why nao olsem? Bikos iumi evriwan sin and needim God for forgivim iumi. (Romans 3:23; 5:12) Bifor iu studyim Bible, iu no savve wanem nao will bilong God. From diswan, iu no savve barava duim will bilong hem. Dastawe, iu mas repent.

13. Wanem nao hem minim for tan raon?

13 Bihaen iu repent, iu mas tan raon. Iu need for duim moa samting winim for sorre nomoa long samting iu duim bifor. Iu need for rejectim olketa wei bilong iu bifor and barava disaed strong for duim stret samting. Bifor iu savve baptaes, iu mas repent and tan raon.

DEDICATEM IUSELEVA

14. Wanem important samting nao iu mas duim bifor iu baptaes?

14 Bifor iu savve baptaes, iu mas duim nara important samting. Iu mas dedicatem iuseleva long Jehovah God (wea minim iu givim iuseleva long Jehovah God).

Waswe, iu prea long God for dedicatem iuseleva long hem?

15, 16. Hao nao iu savve dedicatem iuseleva long God, and wanem nao muvim man for duim diswan?

15 Iu dedicatem iuseleva long Jehovah taem iu talem hem insaed wanfala spesol prea hao iu promis for worshipim hem nomoa for olowe. (Deuteronomy 6:15) Bat why nao man bae  laek for duim datwan? For ansarem datwan, tingim sapos wanfala boy laek for frenim wanfala gele. Taem hem start for savve gud long hem and lukim olketa nambawan fasin bilong hem, datwan bae mekem hem barava laekem datfala gele. Gogo hem bae laekem tumas for maritim hem. Hem tru, wei for maritim datfala gele bae mekem hem garem olketa bigfala responsibility. Bat wei wea hem lovem datfala gele bae muvim hem for duim datwan.

16 Taem iu savve gud long Jehovah and lovem hem, datwan bae muvim iu for servem hem witim full heart bilong iu, no long wei for hafhaf nomoa. Eniwan wea laek for followim Son bilong God, Jesus Christ, mas “rejectim wei for tingim nomoa wanem hemseleva laekem.” (Mark 8:34) Iumi duim diswan taem iumi mek sure olketa goal bilong iumi and samting wea iumi laekem no stopem iumi for obeyim God evribit. So bifor iu savve baptaes, wei for duim will bilong Jehovah God mas kamap main samting long laef bilong iu.1 Peter 4:2.

NO FRAETEM WEI FOR MAET FAIL

17. Why nao maet samfala hol bak for dedicate long God?

17 Samfala hol bak for dedicate long Jehovah bikos olketa fraet for duim datfala barava important samting. Maet olketa fraetem wei wea olketa Christian wea dedicate mas ansa long God for wanem olketa duim. From olketa fraet nogud olketa fail and mekem Jehovah no hapi, olketa disaedem hao hem moabeta for no dedicate long hem.

18. Wanem nao savve muvim iu for dedicatem iuseleva long Jehovah?

18 Taem love bilong iu for Jehovah hem kamap moa big, datwan bae muvim iu for dedicate long hem and duim best bilong iu for live followim datwan. (Ecclesiastes 5:4) Bihaen iu dedicate long hem, for sure iu bae laek for “wakabaot fitim Jehovah witim goal for mekem hem hapi evribit.” (Colossians 1:10) From iu lovem God, bae iu no tingse hem hard  tumas for duim will bilong hem. Bae iu agree witim aposol John wea sei: “Samting wea showimaot iumi lovem God nao hem wei wea iumi obeyim olketa komandment bilong hem; bat hem no wanfala hevi for obeyim olketa komandment bilong hem.”1 John 5:3.

19. Why nao iu shud no fraet for dedicatem iuseleva long God?

19 Iu no need for perfect bifor iu dedicate long God. Jehovah savve long wanem iu no savve duim and hem no expectim iu for duim datwan. (Psalm 103:14) Hem laekem iu for win and hem bae sapotim and helpem iu. (Isaiah 41:10) Iu savve sure hao sapos iu trust long Jehovah witim full heart bilong iu, hem “bae mekem olketa wei wea iu followim stret.”Proverbs 3:5, 6.

 SHOWIMAOT IU DEDICATE LONG WEI FOR BAPTAES

20. Why nao iumi mas showimaot long nara pipol hao iumi dedicate long Jehovah?

20 Wei for ting raonem olketa samting wea iumi storyim hia savve helpem iu for prea long Jehovah for dedicatem iuseleva long hem. Evriwan wea really lovem God mas ‘talemaot faith bilong hem long pablik’ tu, ‘mekem hem savve kasem salvation.’ (Romans 10:10) Hao nao iu savve duim datwan?

Wei for baptaes minim for dae long tokpiksa wei, wea minim iumi finis for duim olketa old wei bilong iumi and then iumi laef moa for duim will bilong God

21, 22. Hao nao iu savve ‘talemaot faith bilong iu long pablik’?

 21 Talem chairman bilong olketa elder bilong iu hao iu laek for baptaes. Hem bae arrange for samfala elder reviewim witim iu olketa kwestin abaotem olketa main teaching insaed Bible. Sapos olketa elder hia agree iu fit for baptaes, olketa bae talem iu hao iu savve baptaes long next assembly or convention. * Plande taem olketa givim wanfala tok long olketa assembly and convention hia for reviewim mining bilong baptism. Then datfala speaker askem olketa wea bae baptaes for ansarem tufala simpol kwestin, wea datwan hem wanfala wei for olketa ‘talemaot faith bilong olketa long pablik.’

22 Wei for baptaes hem showimaot long pablik hao iu dedicatem iuseleva long God, and hao start long datfala taem iu wanfala Jehovah’s Witness. Olketa putim olketa wea bae baptaes andanit long wata for showimaot long evriwan hao olketa hia dedicatem olketa seleva long Jehovah.

MINING BILONG BAPTISM BILONG IU

23. Wanem nao hem minim for baptaes “long nem bilong Father and bilong Son and bilong holy spirit”?

23 Jesus talem hao olketa disaepol bilong hem bae baptaes “long nem bilong Father and bilong Son and bilong holy spirit.” (Matthew 28:19) Diswan minim man wea baptaes luksavve long position and paoa bilong Jehovah God and Jesus Christ. (Psalm 83:18; Matthew 28:18) Hem luksavve tu long olketa wei wea God iusim holy spirit bilong hem, wea datwan nao hem paoa bilong hem.Galatians 5:22, 23; 2 Peter 1:21.

24, 25. (a) Wanem nao wei for baptaes hem piksarem? (b) Wanem kwestin nao iumi need for ansarem?

24 Bat baptism hem no just wei for go insaed wata nomoa. Diswan piksarem samting wea barava important. Wei for go andanit long wata hem olsem iu dae long tokpiksa wei, wea  minim iu finis for duim olketa old wei bilong iu bifor. Taem iu kamaot from wata datwan piksarem hao iu startim wanfala niu laef for duim will bilong God. No forgetim tu, hao iu dedicatem iuseleva long Jehovah God, no long wanfala waka, no long olketa man, and no long wanfala organization. Wei wea iu dedicate and baptaes hem start bilong wei for barava fren gud witim God.Psalm 25:14.

25 Wei for baptaes no minim iu sev nao. Aposol Paul hem sei: “Gohed waka hard for kasem salvation, and duim diswan witim wei for fraet and seksek.” (Philippians 2:12) Wei for baptaes hem samting iu duim long start bilong Christian laef bilong iu. Bat wanem nao iu mas duim for mekem iu gohed for kasem love bilong God? Last chapter bilong iumi bae ansarem datwan.

^ par. 21 Olketa baptism kamap long olketa assembly and convention bilong Olketa Jehovah’s Witness evri year.