Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

10-fala Kwestin wea Young Pipol Savve Garem

 KWESTIN 8

Wanem Nao Sexual Assault?

Wanem Nao Sexual Assault?

HEM GUD FOR TING RAONEM DATFALA KWESTIN

Evri year staka million pipol nao samwan rapem olketa or spoelem olketa saed long sex, and main wan nao hem olketa young wan.

WANEM NAO BAE IU DUIM?

Annette seke tumas taem wanfala man grabim hem and pushim hem go daon long graon. Annette sei, “Mi barava traem best for faetem hem. Mi trae for singaot, bat no eni toktok kamaot from mouth bilong mi. Mi pushim, kikim, hitim, and skrasem hem. Then mi feelim hem katem mi long naef. Mi no savve faet nao.”

Sapos samting olsem happen long iu, wanem nao bae iu duim?

TINGTING GUD FIRSTAEM!

Nomata iu traem best for careful, olketa nogud samting savve kasem iumi evriwan. Bible sei: “No evritaem nao olketa wea savve ran kwiktaem bae winim resis” and “no evritaem nao olketa wea garem savve bae win, bikos nogud samting wea seknomoa happen savve kasem evriwan.”—Ecclesiastes 9:11.

Samfala young wan olsem Annette, wanfala stranger nao spoelem olketa saed long sex. Olketa narawan, wanfala fren or famili member nao duim olsem long olketa. Olsem example, taem Natalie hem ten year, wanfala boy wea hem neiba bilong olketa hem spoelem Natalie saed long sex. Natalie sei: “Firstaem, mi no talem eniwan abaotem samting wea happen bikos mi fraet and mi shame tumas.”

 IU NO RONG

Annette gohed feel guilty yet long samting wea kasem hem. Hem sei: “Mi no savve forgetim samting wea happen long datfala naet. Mi tingse mi shud duim moa samting for faetem datfala man. Bat bihaen hem katem mi witim naef, mi fraet fogud and mi no savve duim eni samting nao. Nomata olsem, mi feel olsem mi shud duim moa samting.”

Natalie tu feel guilty long samting wea happen long hem. Hem sei: “Mi shud no trustim datfala man. Mami and dadi talem mi and sista finis for mas plei tugeta taem mifala plei aotsaed. So hem olsem mi givim chance long neiba hia for spoelem mi nao. Samting wea happen hem mekem famili bilong mi sorre tumas tu. Mi feel olsem mi nao kosim datwan, and datwan mekem mi barava sorre.”

Sapos iu garem sem feeling olsem Annette and Natalie, hem important for tingim hao gele wea man rapem, no willing for datfala man rapem hem. Samfala pipol savve talem excuse and sei hem normal nomoa for olketa boy duim olsem. Or maet olketa sei gele nao duim samting wea switim boy for rapem hem. Bat hem no stret for rapem eniwan. Sapos samwan rapem iu, hem no iu nao wea rong!

Nomata olsem, staka gele feel olsem olketa nao rong. Samfala no storyim feeling bilong olketa bat olketa gohed for feel guilty. Sapos iu no talem eniwan abaotem wanem hem happen, datwan no helpem iu, bat hem helpem man wea spoelem iu. Best samting wea iu savve duim nao hem for storyim samting wea kasem iu long narawan.

STORYIM SAMTING WEA HAPPEN

Taem Job barava safa long nogud samting wea kasem hem, hem sei: “Mi bae storyim wei wea mi barava sorre and feel nogud!” (Job 10:1) Hem gud for iu duim olsem tu. Wei for storyim diswan long wanfala fren wea iu trustim savve helpem iu for deal witim samting wea happen.

Hem gud for storyim feeling bilong iu long samwan. Datwan bae helpem iu for deal witim samting wea kasem iu

Hem nao samting wea helpem Annette. Hem sei: “Mi story witim wanfala fren bilong mi, and hem encouragem mi for story witim tufala elder long kongregeson. Mi hapi mi duim datwan. Tu-thri taem tufala hia story long mi and talem samting wea barava encouragem mi. Olketa sei mi nating garem blame for samting wea happen.”

Natalie story long parents bilong hem. Hem sei: “Tufala barava sapotim mi. Tufala encouragem mi for storyim datwan. Wei for duim olsem helpem mi for no sorre or kros tumas.”

Wei for prea tu hem comfortim Natalie. Hem sei: “Wei for story long God hem barava helpem mi bikos staka taem mi no laek story long eniwan. Taem mi prea, mi feel free for story. Wei for duim olsem helpem mi for no wari tumas and for garem peace.”

Gogo iu tu savve deal witim samting wea happen long iu. (Ecclesiastes 3:3) Lukaftarem iuseleva. Rest gud. And main samting, depend long Jehovah, wea bae comfortim iu.—2 Corinth 1:3, 4.

 KASEM AGE WEA IU FIT FOR FREN

Sapos iu wanfala gele, and man wea iu frenim forcem iu for duim samting wea no stret, hem bae fitim for iu tok stret olsem, “No duim datwan!” or, “Iu no tasim mi olsem!” No hol bak for talem datwan bikos iu wari nogud hem les long iu. Sapos hem lusim iu, then gud nao iu talem, bikos hem no gudfala man for iu frenim! Frenim man wea respectim iu and wea tinghae long olketa Bible principle.

SEXUAL HARASSMENT QUIZ

Coretta sei: “Taem mi long hae skul, olketa boy savve pullim bra strap bilong mi and talem olketa nogud toktok long mi. Olketa sei mi bae hapi sapos mi duim sex witim olketa.”

Iu tingse wanem nao olketa boy hia duim long Coretta?

  1. Mekfani long hem

  2. Switim hem

  3. Sexual harassment

Candice sei: “Taem mi insaed bas, wanfala boy tok nogud long mi and grabim mi. Mi aotem hand bilong hem and talem hem for go from mi. Hem tingse mi krangge nomoa.”

Iu tingse wanem nao boy hia duim long Candice?

  1. Mekfani long hem

  2. Switim hem

  3. Sexual harassment

Bethany sei: “Last year, wanfala boy evritaem talem mi hem laek frenim mi nomata staka taem mi talem hem mi no laekem hem. Samfala taem hem tasim hand bilong mi. Mi talem hem for no duim datwan, bat hem gohed nomoa. Then wanday hem hitim ass bilong mi taem mi taengem shoe bilong mi.”

Iu tingse wanem nao boy hia duim long Bethany?

  1. Mekfani long hem

  2. Switim hem

  3. Sexual harassment

Stretfala ansa for thrifala kwestin hia hem C.

Hao nao sexual harassment hem difren from wei for mekfani long man or for switim hem?

Taem man gohed duim olketa kaen samting olsem long narawan nomata hem no laekem, datwan nao hem sexual harassment.

Sexual harassment hem barava nogud samting wea savve lead go long sexual assault.