HEM GUD FOR TING RAONEM DATFALA KWESTIN

Sapos iu disaedem finis wanem iu laek for duim, datwan bae helpem iu for mekem olketa gudfala disison taem iu kasem test.

WANEM NAO BAE IU DUIM?

Tingim samting wea happen long Karen. Hem no kasem yet age wea gavman markem for man savve drinkim alcohol. Hem long wanfala hapitaem witim olketa nara young wan. Seknomoa, fren bilong hem Jessica sei long hem:

“Karen, beer long hia.”

Karen lukim Jessica holem tufala botol beer. Jessica luksavve Karen hem fraet so hem sei, “Iu hao ia, no eniting nomoa ia.”

Karen laek for sei no, bat Jessica hem fren bilong hem. Hem no laekem fren bilong hem for tingse hem boring. And tu, hem tingse Jessica hem gud gele, so sapos Jessica tu savve drink, luk olsem hem olraet nomoa for teistim lelebet beer. Hem ting raonem and hem tingting olsem: “Beer nomoa ia, hem no drug.”

Sapos iu nao Karen, wanem nao bae iu duim?

TINGTING GUD FIRSTAEM!

For iu mekem olketa gudfala disison, iu mas disaedem finis wanem iu laek for duim. Wei for duim olsem bae mekem iu fit for kontrolem laef bilong iu, and no narawan nao kontrolem iu.—1 Corinth 9:26, 27.

Wanem nao bae helpem iu for strong for duim olsem? Tingim fofala kwestin hia.

 1 WANEM NAO OLKETA GUDFALA WEI BILONG MI?

Hem gud for tingim olketa gudfala wei bilong iu and wanem iu fit for duim bikos datwan bae helpem iu for no fraet for followim wanem iu bilivim.

BIBLE EXAMPLE: Aposol Paul sei: “Nomata mi no savve toktok gud, mi garem bigfala savve.” (2 Corinth 11:6) From Paul savve gud long olketa Holy Raeting, hem no seksek taem olketa narawan testim hem. Hem no letem wei wea olketa tok spoelem hem for mekem hem fraet.—2 Corinth 10:10; 11:5.

TINGIM DISWAN: Raetem wanfala samting wea iu savve hao for duim.

Raetem wanfala gudfala wei bilong iu. (Olsem example, wei for tingim narawan, kaen, narawan savve trustim iu, or wei for organize gud.)

2 WANEM NAO OLKETA WIK POINT BILONG MI?

Wanfala chain savve strong bat sapos wanfala smol part bilong hem no strong, bae chain hia hem brek. Long sem wei, sapos iu letem olketa wik point bilong iu for kontrolem iu, maet gogo iu tu savve foldaon long eni samting.

BIBLE EXAMPLE: Paul luksavve long olketa wik point bilong hemseleva. Hem sei: “Mi barava lovem law bilong God long heart bilong mi, bat mi luksavve nara law wea stap long body bilong mi hem againstim law wea stap long mind bilong mi. Nara law hia hem law bilong sin wea stap long body bilong mi and hem bossim mi.” —Rome 7:22, 23.

TINGIM DISWAN: Wanem nao olketa wik point wea iu need for kontrolem?

 3 WANEM NAO OLKETA GOAL BILONG MI?

Waswe, bae iu go insaed wanfala taxi and talem draeva for raraon long taon go kasem taem petrol hem finis? Nomoa. Datwan bae hem krangge samting for duim and bae iu spendem staka selen tu!

Taem iu garem olketa goal datwan savve helpem iu for no olobaot, bat for duim gudfala samting long laef bilong iu. Hem mekem iu savve long wanem iu laek for duim, and hao for duim datwan.

BIBLE EXAMPLE: Paul hem sei: “Mi no ranran nating nomoa.” (1 Corinth 9:26) Paul garem olketa goal and hem duim samting for kasem olketa goal hia.—Philippi 3:12-14.

TINGIM DISWAN: Raetem thrifala goal wea iu laek for kasem insaed long disfala year.

4 WANEM NAO MI SURE LONG HEM?

Taem iu disaedem finis wanem iu laek for duim, iu bae olsem tree wea garem strongfala rut wea no foldaon nomata long taem bilong bigfala wind

Sapos iu no sure long wanem hem stret and no stret, bae iu no savve disaed gud. Bae iu followim nomoa tingting bilong olketa nara young wan.

Bat sapos iu sure long wanem hem stret and no stret, iu bae followim datwan nomata sapos olketa narawan duim difren samting.

BIBLE EXAMPLE: Taem Daniel hem young, hem “disaed finis insaed heart bilong hem” for obeyim olketa law bilong God, nomata hem stap farawe from famili bilong hem. (Daniel 1:8) Daniel savve long stret samting and hem duim datwan.

TINGIM DISWAN: Wanem nao iu bilivim? Olsem example: Waswe, iu biliv long God? Wanem nao mekem iu biliv long hem?

Waswe, iu barava sure olketa law bilong God bae mekem iu for kasem gudfala samting? Why nao olsem?

Waswe, iu laek for olsem wanfala leaf wea wind hem blowim olobaot, or iu laek for olsem strongfala tree wea no foldaon nomata long taem bilong bigfala wind. Iu bae olsem datfala tree sapos iu garem strongfala biliv and followim datwan.