Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

10-fala Kwestin wea Young Pipol Savve Garem

 KWESTIN 4

Hao Sapos Mi Duim Eni Mistek?

Hao Sapos Mi Duim Eni Mistek?

HEM GUD FOR TING RAONEM DATFALA KWESTIN

Taem iu duim samting wea iu no min for duim, hem gud for talemaot datwan. Olketa narawan bae trustim iu sapos iu duim olsem.

WANEM NAO BAE IU DUIM?

Taem Timothy plei soccer witim olketa fren bilong hem, hem kikim ball and ball hia brekem glass long trak bilong wanfala man.

Sapos iu nao Timothy, wanem nao bae iu duim?

TINGTING GUD FIRSTAEM!

WHICH WAN NAO BAE IU FOLLOWIM?

  1. Ranawe.

  2. Blamem narawan.

  3. Talem man wea ownim trak wanem hem happen, and sei bae iu peim niu glass for hem.

Maet iu laek for ranawe, bat staka gudfala reason stap for iu talemaot wanem iu duim nomata sapos iu brekem glass bilong trak, or iu duim eni nara samting wea iu no min for duim.

 THRIFALA REASON FOR TALEMAOT SAMTING WEA IU DUIM

  1. Hem stretfala samting for duim.

    Bible sei: “Mifala laek for honest long evri samting wea mifala duim.”—Hebrew 13:18.

  2. Pipol savve willing for forgivim man wea no trae for haedem mistek bilong hem.

    Bible sei: “Man wea haedem sin bilong hem bae no win, bat man wea talemaot sin bilong hem and no duim moa bae kasem mercy.”—Proverbs 28:13.

  3. Barava important samting, hem mekem God hapi.

    Bible sei: “Jehovah les long man wea laea, bat hem fren gud witim man wea duim stret samting.”—Proverbs 3:32.

Karina, wea hem 20 year, hem speed long trak bilong hem and police talem hem for peim fine for datwan. Hem trae for haedem datwan, bat samting olsem wan year bihaen, dadi bilong hem faendaot abaotem datfala fine and hem kros tumas.

Wanem nao Karina lanem from diswan? Hem sei: “Iu savve kasem olketa nogud samting nomoa taem iu trae for haedem olketa mistek bilong iu. Gogo iu bae ansa for samting wea iu duim.”

LANE FROM OLKETA MISTEK BILONG IU

Bible sei: “Iumi evriwan savve foldaon staka taem.” (James 3:2, footnote) And olsem iumi storyim finis, man wea hambol and garem mature tingting bae no haedem olketa mistek bilong hem.

And tu, hem important for iu lane from olketa mistek bilong iu. Wanfala gele wea nem bilong hem Vera sei: “Mi trae for lane from olketa mistek bilong mi, mekem mi no duim datwan moa and for duim stret samting.” Hao nao iu savve duim sem samting?

Iu tekem baesikol bilong brata bilong iu, bat iu foldaon and spoelem wheel bilong hem. Wanem nao bae iu duim?

  • Trae for haedem datwan and hope brata bilong iu bae no luksavve

  • Talem brata bilong iu wanem hem happen.

  • Talem brata bilong iu wanem hem happen bat blamem narawan.

Iu fail long skul exam bikos iu no study gud for datwan. Wanem nao bae iu duim?

  • Sei olketa kwestin long exam hem hard tumas.

  • Luksavve iu nao rong bikos iu no study gud firstaem.

  • Sei teacher no laekem iu so hem daonem mark bilong iu.

Wei for evritaem tingim nogud samting wea iu duim bifor hem olsem iu gohed for luk go bak taem iu draevem trak

 Tingim tufala example hia wea iumi storyim finis. Hao nao bae brata and teacher bilong iu ting long iu sapos iu willing for talemaot iu nao rong? Hao nao bae olketa ting long iu sapos iu blamem narawan, or iu trae for haedem samting wea iu duim?

Tingim wanfala mistek wea iu duim insaed year wea go pas and ansarem olketa kwestin hia.

Wanem nao datfala mistek? Wanem nao iu duim?

  • Mi haedem.

  • Mi blamem narawan.

  • Mi stretawe talemaot wanem mi duim.

Sapos iu no talemaot mistek bilong iu, hao nao feeling bilong iu?

  • Gud tumas bikos no eniwan faendaot!

  • Mi feel guilty. Mi shud talemaot wanem mi duim.

Sapos samting olsem happen moa, wanem nao bae iu duim?

Wanem nao iu lanem from mistek bilong iu?

WANEM NAO TINGTING BILONG IU?

Why nao samfala pipol no laek talemaot mistek bilong olketa?

Hao nao pipol bae ting long iu sapos iu talemaot mistek bilong iu, and hao nao bae olketa ting long iu sapos iu evritaem trae for haedem mistek bilong iu?—Luke 16:10.