Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

10-fala Kwestin wea Young Pipol Savve Garem

 KWESTIN 3

Hao Nao Mi Savve Story Gud Witim Dadi and Mami?

Hao Nao Mi Savve Story Gud Witim Dadi and Mami?

HEM GUD FOR TING RAONEM DATFALA KWESTIN

Iu bae hapi sapos iu fren gud witim dadi and mami bilong iu.

WANEM NAO BAE IU DUIM?

Tingim samting wea happen long Geoffrey, wea hem 17 year. Long wanfala evening bihaen hem duim finis samfala waka wea dadi talem hem for duim, then hem relax nao! Hem sidaon and lukluk long TV.

Seknomoa, Dadi kam and tok kros long hem and sei:

“Geoffrey, iu weistim taem for lukluk long TV. Mi talem iu finis for helpem brata bilong iu for duim homwok bilong hem. Iu hao ia?”

Geoffrey wiki, and sei: “Toktok tumas!”

Dadi hem sei: “Wanem nao iu talem?”

Geoffrey brith big and sei: “No eniting nomoa.”

Dadi kros fogud and sei: “Iu no tok olsem long mi!”

Sapos iu nao Geoffrey, wanem nao bae iu duim mekem iu no raoa olsem witim parents bilong iu?

TINGTING GUD FIRSTAEM!

Wei for story witim dadi and mami bilong iu hem olsem iu draev followim wanfala road. Sapos olketa blokem datfala road, iu savve faendem nara road for followim mekem iu kasem ples wea iu go for hem.

 TINGIM DISFALA EXAMPLE:

Wanfala gele wea nem bilong hem Leah sei: “Hem no isi for mi story witim dadi bilong mi. Samfala taem mi story witim hem, bat mi luksavve hem no herem mi nomoa.”

THRIFALA SAMTING WEA LEAH SAVVE TRAEM.

  1. Tok strong long dadi.

    Leah tok big olsem: “Sei, important samting nao mi laek talem. Iu nating lisin long mi nomoa!”

  2. No story witim dadi.

    Leah hem givap nomoa for storyim problem bilong hem long dadi.

  3. Weit for story witim dadi long taem wea fitim.

    Leah savve story witim dadi, or hem savve raetem wanfala leta long hem.

Which wan long thrifala idea hia nao bae iu talem Leah for traem?

TINGIM: Dadi bilong Leah gohed for tingim difren samting taem Leah trae for story witim hem, dastawe hem no herem gud samting wea Leah talem. So sapos Leah chusim Idea Namba 1, maet dadi bilong hem seke taem Leah tok strong long hem. Dadi bae feel nogud long Leah bikos taem hem duim olsem hem no showimaot respect long dadi. (Ephesus 6:2) So datwan hem no stret samting for duim.

Olsem iu mas faendem nara road taem olketa blokem road, iu savve faendem tu eni nara wei for story gud witim dadi and mami

Maet hem isi for followim Idea Namba 2, bat datwan bae no helpem tufala evriwan. Why nao olsem? Bikos Leah mas story witim dadi mekem dadi helpem hem long olketa problem bilong hem. And dadi mas herem samting wea Leah laek for talem mekem hem savve helpem Leah.

Idea Namba 3 nao hem gud for Leah followim, bikos nomata dadi no lisin gud long hem, datwan no stopem hem for story witim dadi bilong hem long narafala taem moa. And sapos hem disaed for storyim datfala problem insaed wanfala leta, maet stretawe datwan bae mekem hem feel gud.

Taem Leah raetem wanfala leta datwan savve helpem hem for ting raonem hao for explainim gud samting wea hem laek talem long dadi. Taem dadi readim leta bae hem minim gud problem bilong Leah. So Idea Namba 3 nao helpem Leah and dadi bilong hem. Nomata Leah story witim dadi or raetem leta long hem, hem followim disfala advaes long Bible: “Traem best for stap gud witim nara pipol.”—Rome 14:19.

Waswe, eni nara idea stap wea Leah savve followim?

Tingim eni nara idea. Then tingim samting wea savve kamaot from datwan sapos hem followim datfala idea.

 NO GIVIM RONG MESSAGE

Samfala taem parents bae minim rong samting wea iu talem.

TINGIM DISFALA EXAMPLE:

Dadi and mami tingse iu feel nogud long wanfala samting, and tufala askem iu abaotem datwan. Iu sei: “No eniting nomoa ia.”

So long tingting bilong mami and dadi, hem olsem iu sei long tufala: “Mi no trustim iutufala. Mi bae storyim samting wea mi feel nogud abaotem long olketa fren bilong mi and no long iutufala.”

Tingim sapos iu garem problem and dadi and mami laek for helpem iu. Bat iu sei: “Bae mi olraet nomoa.”

  • Maet hao nao tingting bilong dadi and mami taem tufala herem datwan?

  • Wanem nao maet hem gud for iu sei?