Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

“Gohed Kasem Gud Samting From Love Bilong God”

 CHAPTER 2

Hao for Gohed Garem Gud Konsens

Hao for Gohed Garem Gud Konsens

“Gohed for garem gudfala konsens.” —1 PETER 3:16.

1, 2. Why nao hem gud for man iusim torchlaet taem hem wakabaot long naet, and long wanem wei nao torchlaet hem olsem konsens?

TINGIM sapos wanfala man wakabaot gogo hem naet nao. Wanem nao hem mas iusim mekem hem no foldaon and no kasem eni nogud samting? Hem mas iusim torchlaet for torchim road wea hem gogo long hem.

2 Sapos iu no iusim torchlaet, bae iu no savve lukim ples wea iu wakabaot long hem. Maet iu foldaon or eni nogud samting kasem iu. Jehovah givim iumi spesol samting wea olsem torchlaet for leadim iumi, hem nao konsens. (James 1:17) Sapos iumi no garem konsens, bae iumi no luksavve long wanem hem stret and no stret. Taem iumi followim gud konsens bilong iumi, hem savve leadim iumi for disaedem stret samting evritaem. Iumi bae story abaotem wanem nao konsens and hao nao hem savve helpem iumi. Then bae iumi storyim olketa point hia: (1) Wanem nao iumi savve duim mekem konsens helpem iumi? (2) Why nao iumi shud tingim konsens bilong narawan? and (3) Wanem gud samting nao iumi savve kasem taem konsens leadim iumi gud?

WANEM NAO KONSENS AND HAO NAO HEM SAVVE HELPEM IUMI?

3. (a) Long Greek languis, wanem nao disfala word “konsens” hem minim? (b) Wanem nao konsens savve duim?

3 Long Bible, disfala word “konsens” long Greek languis  hem minim “man savve long hemseleva.” Taem God wakem iumi, hem wakem iumi difren from olketa animal. Hem wakem iumi for luksavve sapos iumi duim stret samting or nomoa. Konsens hem olsem judge wea judgem wanem iumi duim, wei bilong iumi, and wanem iumi disaedem. Hem savve helpem iumi for disaedem gud samting or warnim iumi sapos samting wea iumi bae disaedem hem no stret. Bihaen iumi disaedem samting, konsens savve mekem iumi hapi sapos iumi disaed gud or hem savve pokem iumi sapos iumi no disaed gud.

4, 5. (a) Hao nao iumi savve Adam and Eve garem konsens, and wanem nao happen from tufala no obeyim law bilong God? (b) Wanem nao showimaot olketa man bilong God long bifor followim konsens bilong olketa?

4 God wakem firstfala man and woman for garem konsens. Samting wea Adam and Eve duim showimaot tufala garem konsens. Iumi savve long datwan bikos bihaen tufala sin, tufala barava shame. (Genesis 3:7, 8) Konsens bilong tufala no savve helpem tufala nao. Tufala disaed for no obeyim law bilong Jehovah God and tufala chus for againstim hem. From tufala perfect and savve long wanem tufala duim, tufala no savve fren bak moa witim God.

5 Adam and Eve perfect bat tufala no followim konsens bilong tufala. Bat staka wea no perfect followim konsens bilong olketa. Tingim Job wea faithful long God. Hem fit for sei olsem: “Mi bae gohed strong for duim stret samting. No enitaem heart bilong mi bae pokem mi.” * (Job 27:6) Job followim wanem konsens bilong hem talem bifor hem disaedem samting. Dastawe hem hapi tumas for sei  konsens bilong hem no pokem hem for mekem hem feel guilty and shame. Wei wea konsens bilong David helpem hem, hem difren from Job. Taem David no respectim Saul, wea hem nao king wea Jehovah markem, “bihaen, heart bilong David gohed for pokem hem.” (1 Samuel 24:5) From konsens bilong David pokem hem, datwan helpem hem for no duim moa datkaen samting.

6. Hao nao iumi savve evri man garem konsens?

6 Waswe, pipol bilong Jehovah nomoa garem konsens? Tingim wanem aposol Paul talem. Hem sei: “Taem pipol wea no Jew duim samting wea law bilong God talem nomata olketa no savve long datfala law, datwan showimaot olketa savve long samting wea stret and samting wea no stret. Olketa hia showimaot datfala law hem stap finis insaed long tingting bilong olketa. Konsens bilong olketa mekem olketa savve sapos samting wea olketa duim hem stret or nomoa.” (Rome 2:14, 15) Samfala taem, pipol wea no savve long law bilong Jehovah duim samting wea followim olketa Bible principle bikos olketa followim konsens bilong olketa.

7. Why nao samfala taem konsens savve mekem iumi duim samting wea no stret?

7 Bat samfala taem, konsens savve mekem iumi duim samting wea no stret. Why nao olsem? Tingim tokpiksa abaotem torchlaet. Sapos battery hem flat, hem no savve torchim ples wea iumi wakabaot long hem. Konsens savve olsem torchlaet wea garem flat battery. Sapos iumi no studyim Bible, maet konsens no helpem iumi for lukim klia samting wea hem stret and samting wea hem no stret. Sapos iumi tingim tumas wanem iumiseleva laekem, konsens savve letem iumi for duim nogud samting. Sapos iumi laekem konsens for helpem iumi for duim stret samting, iumi mas letem holy spirit bilong Jehovah for leadim iumi. Paul sei: “Holy spirit nao leadim konsens bilong  mi.” (Rome 9:1) Bat wanem nao iumi savve duim mekem konsens bilong iumi followim holy spirit bilong Jehovah? Iumi mas gohed for savve long tingting bilong Jehovah.

WANEM NAO IUMI SAVVE DUIM MEKEM KONSENS HELPEM IUMI?

8. (a) Long wanem wei nao heart savve spoelem konsens? (b) Wanem nao iumi mas tingim taem iumi disaedem samting? (c) Sapos konsens no pokem iumi, waswe, datwan minim samting wea iumi duim hem stret? Storyim kam. (Lukim footnote.)

8 Wanem nao iu mas tingim taem iu disaedem samting followim konsens? Samfala pipol disaedem samting followim tingting and feeling bilong olketa nomoa. Then maet olketa sei: “Hem olraet nomoa long konsens bilong mi.” Samting wea man laekem tumas savve mekem konsens bilong hem for sei hem gud nomoa for duim datwan. Bible sei: “Heart bilong man hem laea long hem and hem laekem tumas for duim rabis samting. Hu nao hem savve gud long heart bilong man?” (Jeremiah 17:9) So taem iumi disaedem samting, hem gud for tingim firstaem wanem nao Jehovah God laekem and no samting wea heart bilong iumi laekem. *

9. Wanem nao hem minim for fraet long God, and wanem nao bae iumi duim bifor iumi disaedem samting?

9 Sapos konsens bilong iumi followim tingting bilong Jehovah, samting wea iumi disaedem bae showimaot iumi fraet long Jehovah and iumi no duim wanem iumi nomoa  laekem. Taem Nehemiah hem governor, hem fit for askem pipol long Jerusalem for peim samfala tax. Bat hem no duim datwan. Why nao olsem? Hem no laek spoelem pipol bilong God nogud God no hapi long hem. Hem sei: “Mi no duim datwan from mi fraet long God.” (Nehemiah 5:15) Hem barava important for man fraet long God, wea minim iumi no laek duim eni samting wea God no hapi long hem. So, iumi laek savve firstaem wanem nao Bible talem abaotem samting wea iumi bae disaedem.

10, 11. (a) Bifor iumi disaed for drink, olketa wanem Bible principle nao savve helpem iumi? (b) Wanem nao iumi savve duim mekem God helpem iumi for followim olketa principle hia?

10 Tingim samting wea samfala mas disaedem abaotem alcohol. Waswe, bae mi drink or nomoa? Bifor iumi disaed, iumi mas savve firstaem long olketa Bible principle abaotem datwan. Bible no stopem man for drink sapos hem no ova tumas. Bible mekhae long Jehovah wea givim kam wine for iumi. (Psalm 104:14, 15) Bat Bible stopem man for no drink tumas and no join insaed olketa wild party. (Luke 21:34; Rome 13:13) Nara samting tu, Bible sei wei for drunk hem bigfala sin olsem wei for durong. *1 Corinth 6:9, 10.

11 Olketa Bible principle olsem savve helpem Christian luksavve long wanem hem stret and no stret. So taem iumi disaed for drink or nomoa, iumi mas tingim olketa kwestin hia: ‘Diswan hem wanem kaen hapitaem? Waswe, bae gogo hem kamap wild party? Wanem nao tingting bilong mi abaotem alcohol? Waswe, mi ova tumas for laekem alcohol, and mi drink for no tingim problem bilong mi? Waswe, mi savve kontrolem miseleva for no drink tumas?’  Taem iumi ting raonem olketa Bible principle and olketa kwestin hia, hem gud tu for iumi prea long Jehovah for helpem iumi. (Readim Psalm 139:23, 24.) Taem iumi duim olsem, iumi letem holy spirit bilong Jehovah for leadim iumi, and datwan mekem konsens bilong iumi for followim olketa principle bilong God. Bat bifor iumi disaedem eni samting, iumi mas tingim nara samting tu.

WHY NAO IUMI SHUD TINGIM KONSENS BILONG NARAWAN?

Konsens wea followim Bible savve helpem iu disaed for drink or nomoa

12, 13. (a) Why nao konsens bilong evri Christian no semsem? (b) Iumi mas ting hao long datwan?

12 Samfala taem maet iu seke long wanem nara Christian duim wea followim konsens bilong hem. Konsens bilong wanfala man sei hem olraet nomoa for hem duim wanfala samting, bat konsens bilong narawan sei hem barava no stret. Tingim wei for drinkim alcohol. Maet wanfala man hapi for drink witim olketa fren bilong hem, bat nara man tingim datwan hem no stret. Why nao tingting bilong tufala no semsem? Waswe, iumi mas tingim konsens bilong narawan taem iumi disaedem samting?

13 Staka samting mekem pipol no semsem. Pipol garem difren kaen living. Samfala garem wik point wea bifor hem no isi for olketa winim. (1 Kings 8:38, 39) Konsens bilong pipol olsem bae mekem olketa tingting gud firstaem bifor olketa drink. Sapos man olsem kam long haos and iu laek givim alcohol long hem, maet konsens bilong hem bae no letem hem for drink. Waswe, bae iu feel nogud? Waswe, bae iu forcem hem for drink? Nomoa. Nomata sapos iu savve why nao brata no laek drink or iu no savve, iu bae no forcem hem bikos iu lovem hem.

14, 15. (a) Long first century, konsens bilong olketa Christian no semsem long wanem samting? (b) Wanem nao Paul sei hem gud for olketa duim?

14 Long first century, aposol Paul luksavve konsens  bilong olketa Christian no semsem. Konsens bilong samfala Christian no letem olketa for kaikaim kaikai wea pipol sakrifaesim long idol. (1 Corinth 10:25) Bat konsens bilong Paul letem hem for kaikaim kaikai olsem wea pipol salem long market. Long tingting bilong Paul, olketa idol hem samting nating nomoa. Jehovah nao givim evri kaikai so evri kaikai hem bilong hem and no bilong olketa idol. Nomata olsem, Paul luksavve olketa narawan no garem sem tingting olsem hem. Maet samfala worshipim idol bifor olketa kamap Christian. Long tingting bilong olketa hia, eni samting wea pipol duim for worshipim idol hem nogud tumas. Wanem nao Paul duim?

15 Paul sei: “Iumi wea garem strongfala faith mas helpem olketa wea no strong for no givap long olketa samting wea traem olketa, and iumi mas no duim samting wea mekem iumiseleva nomoa hapi. Christ tu bat no duim nomoa wanem hemseleva laekem.” (Rome 15:1, 3) Paul sei iumi mas olsem Christ wea no duim wanem hemseleva nomoa laekem, bat iumi mas tingim firstaem konsens bilong olketa brata bilong iumi. Paul talem tu hem bae no kaikaim meat sapos datwan mekem brata bilong hem sin wea Christ dae for hem.—Readim 1 Corinth 8:13; 10:23, 24, 31-33.

16. Why nao man mas no judgem narawan sapos konsens bilong tufala no semsem?

16 Olketa wea konsens no letem olketa for duim samfala samting mas no tok daonem narawan. Olketa mas no forcem narawan for followim konsens bilong olketa. (Readim Rome 14:10.) Konsens bilong iumi hem for judgem iumiseleva and no for iumi judgem narawan. Tingim samting wea Jesus talem. Hem sei: “Iufala mas no judgem narawan mekem God no judgem iufala.” (Matthew 7:1) Evriwan long kongregeson shud stap klia long wei for raoa abaotem samting wea man wanwan savve disaedem followim  konsens bilong hem. Bat iumi shud traem best for stap gud witim olketa brata and sista, strongim olketa, and no spoelem olketa.—Rome 14:19.

IUMI KASEM GUD SAMTING TAEM KONSENS LEADIM IUMI GUD

Gudfala konsens savve leadim iumi, mekem iumi hapi and no wari

17. Konsens bilong staka pipol distaem hem hao?

17 Aposol Peter sei: “Gohed for garem gudfala konsens.” (1 Peter 3:16) Hem nambawan blessing for garem konsens wea Jehovah God hapi long hem. Bat staka pipol distaem no garem gudfala konsens. Paul story abaotem pipol wea hem olsem “wanfala haf iron wea hot tumas hem bonem konsens bilong olketa.” (1 Timothy 4:2) Iron wea hot tumas savve bonem skin and mekem skin garem markmark and man no savve feelim eni samting. Konsens bilong  staka pipol hem olsem. Hem mekem olketa for no feelim eni samting taem olketa duim nogud samting. Hem no warnim olketa, no stopem olketa for no duim nogud samting, and no mekem olketa guilty from nogud samting wea olketa duim. Staka pipol distaem no feel shame nomata olketa guilty.

18, 19. (a) Taem man feel guilty or shame, long wanem wei nao datwan helpem hem? (b) Wanem nao iumi savve duim sapos konsens gohed mekem iumi feel guilty nomata iumi repent finis?

18 Sapos iumi feel guilty, maet hem from konsens talem samting wea iumi duim hem no stret. Taem man feel guilty, datwan savve mekem hem repent and God savve forgivim hem nomata hem duim bigfala sin. Tingim King David. Hem duim bigfala sin bat God forgivim hem bikos hem repent. Start long datfala taem, hem heitim  nogud samting wea hem duim and hem disaed strong for obeyim law bilong Jehovah. From hem duim olsem, hem luksavve Jehovah hem “gud and willing for forgive.” (Psalm 51:1-19; 86:5) Bat waswe sapos iumi gohed for barava feel guilty and shame nomata iumi repent finis and God forgivim iumi?

19 Samfala taem konsens savve gohed judgem man wea duim sin nomata hem repent finis. Long taem olsem, nomata iumi tingse iumi nogud, Jehovah hem no ting olsem bikos hem luksavve iumi laek for duim stret samting. Iumi mas luksavve God lovem iumi and forgivim iumi, and iumi helpem olketa narawan tu for luksavve long datwan. (Readim 1 John 3:19, 20.) Bat man wea konsens bilong hem gud bak moa bae no wari and bae hem hapi tumas, no olsem staka pipol distaem. Staka wea duim bigfala sin bifor bat wea repent, olketa hapi and no feel guilty. Olketa worshipim Jehovah God and gohed for garem gudfala konsens.—1 Corinth 6:11.

20, 21. (a) Disfala buk bae helpem iu for duim wanem? (b) God letem iumi olketa Christian for duim wanem samting, bat wanem nao iumi mas keakea for no duim?

20 Disfala buk savve helpem iu for hapi and gohed garem gudfala konsens long olketa last day bilong nogud world bilong Satan. Bat hem no storyim evri law and principle long Bible wea iu mas ting raonem and followim taem iu disaedem samting. Nara samting tu, no tingse law hem stap for evri samting wea iumiseleva mas disaedem. Disfala buk bae helpem iu for studyim Bible and followim wanem iu lanem long laef bilong iu. Taem iu duim olsem, konsens bae talem iu sapos samting hem stret or no stret. Law bilong Moses and “law bilong Christ” no semsem. Law bilong Moses garem olketa rul, bat pipol wea followim “law bilong Christ” duim samting wea followim Bible principle and konsens bilong olketa. (Galatia 6:2)  Jehovah letem olketa Christian for disaedem samting seleva. Nomata olsem, Bible talem iumi for no iusim datwan olsem “excuse for duim nogud samting.” (1 Peter 2:16) Wei wea iumi free for disaed olsem hem chance for showimaot iumi lovem Jehovah.

21 Wei for ting raonem hao for followim Bible principle, prea abaotem datwan, and duim wanem iu disaedem, hem important samting for gohed duim. Iu start for duim datwan taem iu lane abaotem Jehovah. Taem iu gohed duim olsem, iu bae fit for luksavve long samting wea stret and no stret bikos iu ‘iusim evritaem tingting bilong iu for luksavve long samting.’ (Hebrew 5:14) Konsens bilong iu bae helpem iu evriday. Hem bae olsem torchlaet wea torchim road for iu wakabaot long hem. Konsens bae helpem iu for disaedem stret samting wea bae mekem Dadi bilong iu long heven hem hapi. Sapos iu duim olsem, iu bae gohed for kasem gud samting from love bilong God.

^ par. 5 Olketa Hebrew Scripture no garem eni word for “konsens.” Nomata olsem, wanem Job talem long Job 27:6 showimaot hem garem konsens. Staka taem, disfala word “heart” savve minim tingting, feeling, and wei bilong man. Bat long Job 27:6, disfala word “heart” hem minim konsens. Long olketa Greek Scripture, Greek word wea English transleitim “conscience” hem kamap samting olsem 30 taem.

^ par. 8 Bible storyim hao samfala taem konsens bilong man no pokem hem nomata hem duim samting wea no stret. Paul sei: “Mi no savve tingim eni samting wea mi duim wea hem no stret. Nomata olsem, datwan no mekem mi wanfala raeteous man, bat Jehovah nomoa hem judgem mi.” (1 Corinth 4:4) Samfala man spoelem olketa Christian olsem Paul duim bifor, bat konsens no pokem olketa bikos olketa tingse God hapi long wanem olketa duim. Important samting nao, wanem iumi disaedem followim konsens bilong iumi mas followim wanem God laekem.—Acts 23:1; 2 Timothy 1:3.

^ par. 10 Staka doctor sei man wea bifor hem savve drink olowe (alcoholic) bae no savve kontrolem haomas hem drinkim. So nomata Bible sei for no ova tumas long alcohol, hem gud sapos man olsem no drinkim eni alcohol.