Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

“Gohed Kasem Gud Samting From Love Bilong God”

 APPENDIX

Wanem Bible Talem Abaotem Divorce and Wei for Separate

Wanem Bible Talem Abaotem Divorce and Wei for Separate

Jehovah laekem olketa wea marit for no brekem marit promis. Taem Jehovah mekem firstfala man and woman for marit, hem sei: “Man . . . bae stap olowe witim waef bilong hem. Tufala bae kamap wanfala body nomoa.” Jesus Christ talem datfala sem toktok, and hem sei: “No eni man mas aotem samting wea  God joinim finis.” (Genesis 2:24; Matthew 19:3-6) So long tingting bilong Jehovah and Jesus, tufala wea marit mas stap tugeta for full laef bilong tufala and dae nomoa savve finisim datwan. (1 Corinth 7:39) Marit hem holy samting, so iumi shud no ting nating nomoa long wei for divorce. Jehovah heitim wei for divorce wea no followim wanem Bible talem.—Malachi 2:15, 16.

Wanem taem nao Bible sei man and woman savve divorce? Jehovah barava heitim adultery and wei for durong. (Genesis 39:9; 2 Samuel 11:26, 27; Psalm 51:4) Dastawe hem letem wei for divorce sapos hasband or waef durong. (Sapos iu laek for minim datfala word durong, lukim paragraf 7 long Chapter 9.) Jehovah letem hasband or waef wea no durong for disaed sapos hem laek gohed stap witim marit partner, or divorcem hem. (Matthew 19:9) Sapos hem disaed for divorce, Jehovah bae no heitim divorce olsem. Bat Christian kongregeson no encouragem eniwan for divorce. Maet samfala samting mekem hasband or waef wea no durong disaed for gohed stap witim marit partner. Maet hem disaed olsem bikos marit partner repent. Bat important samting nao, olketa wea divorce followim samting wea Bible talem, olketa mas disaed seleva and acceptim nomoa eni samting wea kamaot from wanem olketa disaedem.—Galatia 6:5.

Samfala samting savve happen wea nogud tumas wea savve mekem samfala Christian disaed for separate or divorce nomata hasband or waef no durong. Sapos olsem, Bible talem stret for ‘hem mas gohed for stap singol nomoa, or go bak long hasband or waef bilong hem.’ (1 Corinth 7:11) Christian olsem no free for maritim eni difren wan moa. (Matthew 5:32) Tingim tu-thri samting wea long tingting bilong samfala hem reason for hasband and waef separate.

Hasband no sapotim famili. Famili savve poor sapos hasband no provaedem wanem famili needim nomata hem fit for duim datwan. Bible sei: “Sapos eniwan hem no provaedem need bilong . . . olketa wea stap long haos bilong hem, hem showimaot hem no garem faith and hem worse winim man wea no biliv.”  (1 Timothy 5:8) Sapos hasband gohed for no sapotim waef and olketa pikinini, waef seleva savve disaed for go long kot for separate mekem hasband savve helpem hem and olketa pikinini. Sapos samwan accusim wanfala brata and sei hem no provaedem need bilong famili, olketa elder bae lukluk gud long datwan. Hasband wea nating willing for provaedem need bilong famili savve disfellowship.

Marit partner killim hem nogud. Samwan wea killim nogud marit partner bilong hem savve spoelem health bilong hem, or killim hem dae tu. Sapos hem Christian, olketa elder mas lukluk long datwan for savve sapos hem tru or nomoa. Man savve disfellowship sapos hem savve kros fogud and hem garem wei for raf tumas.—Galatia 5:19-21.

Marit partner stopem hem for no worshipim Jehovah. Marit partner savve mekem hem hard for Christian worshipim trufala God, or forcem hem for duim samting wea brekem law bilong God. Bible sei: “God nao hem ruler wea mifala mas obeyim and no olketa man.” Taem samting olsem happen, maet Christian disaed for separate mekem hem savve followim wanem datfala scripture talem.—Acts 5:29.

Sapos eni nogud samting olsem kamap, no eniwan shud talem hasband or waef wea no duim eni rong samting for separate or gohed stap witim marit partner. Nomata olketa mature Christian and olketa elder storyim wanem Bible talem and encouragem olketa, olketa no savve long evri samting wea happen long datfala hasband and waef. Jehovah nomoa savve. Bat samting wea no showimaot respect for marit and God, hem sapos waef or hasband extram story abaotem wanem marit partner duim for garem excuse for separate from marit partner. Jehovah bae savve sapos hasband or waef laea abaotem marit partner. Tru nao, “hem savve barava lukim klia evri samting wea iumi duim and iumi mas ansa long hem.” (Hebrew 4:13) Bat sapos samting wea nogud tumas gohed insaed marit and gogo Christian disaed for separate, no eniwan mas judgem hem. Important samting nao, “iumi evriwan bae standap front long God for hem judgem iumi.”—Rome 14:10-12.