Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Lanem Pikinini Bilong Iu

 LESON 12

Wanfala Young Man wea No Fraet

Wanfala Young Man wea No Fraet

Bae iumi lane abaotem wanfala young man wea sevem laef bilong uncle bilong hem. Uncle bilong datfala young man hem aposol Paul. Iumi no savve long nem bilong hem, bat iumi savve hem no fraet taem hem duim wanfala samting. Waswe, iu laek for herem datfala story?—

Olketa arrestim Paul bikos hem preach abaotem Jesus and then putim hem long prison long Jerusalem. Samfala rabis man heitim Paul, so olketa mekem wanfala nogud plan. Olketa sei: ‘Iumi askem komanda for talem olketa soldia bilong hem for tekem kam Paul long kot. Iumi bae haed long saed road, and taem olketa tekem Paul go pas, iumi bae killim hem dae!’

Disfala young man storyim datfala nogud plan long Paul and long komanda

Boy bilong sista bilong Paul hem herem plan bilong olketa. Wanem nao hem duim? Hem go lukim Paul long prison and storyim datwan long hem. Stretawe, Paul talem hem for go long komanda and storyim datfala nogud plan. Waswe, iu tingse hem isi nomoa for datfala young man go story long komanda hia?— Nomoa. Hem no isi, bikos datfala komanda hem wanfala bigman bilong army. Bat hem no fraet and hem story long datfala komanda.

Datfala komanda savve wanem hem bae duim. Hem iusim samting olsem 500 soldia for protectim Paul! Hem talem olketa for tekem Paul long datfala naet go long Caesarea. Waswe, datwan sevem laef bilong Paul?— Ia, olketa rabis man no savve attakim hem! Nogud plan bilong olketa nating waka.

Wanem nao iu savve lanem from disfala story?— Iu savve followim example bilong datfala young man for no fraet. Iumi shud no fraet taem iumi story long olketa narawan abaotem Jehovah. Waswe, bae iu no fraet and gohed story abaotem Jehovah?— Sapos iu duim olsem, maet iu sevem laef bilong samwan.