Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Lanem Pikinini Bilong Iu

 LESON 1

Wanfala Secret wea Bae Mekem Iumi Hapi

Wanfala Secret wea Bae Mekem Iumi Hapi

Waswe, enitaem eniwan talem iu samting wea hem no talem long olketa narawan?— * Datwan hem wanfala secret. Bible hem storyim wanfala spesol secret wea olketa kolem “datfala holy secret.” Hem holy bikos hem kam from God. And hem wanfala secret bikos no eniwan savve abaotem datwan. Nomata olketa angel tu olketa laek for savve long datfala secret. Waswe, iu laek for savve long datfala secret?—

Iu tingse olketa angel laek for savve long wanem?

Long bifor kam, God wakem firstfala man and woman. Nem bilong tufala Adam and Eve. Tufala stap long garden bilong Eden, wea hem nao wanfala naes ples God givim long tufala. Sapos Adam and Eve obeyim God, tufala and olketa pikinini bilong tufala savve mekem full earth wanfala paradaes, olsem datfala garden. And olketa savve stap olowe long Paradaes tu. Bat iu savve wanem nao Adam and Eve duim?—

Adam and Eve no obeyim God. Dastawe iumi no stap long paradaes distaem. Bat God talem finis hem bae mekem full earth wanfala paradaes, wea pipol bae laef olowe and olketa bae hapi. Hao nao bae hem duim diswan? From hem wanfala secret, staka pipol no savve long diswan.

Taem Jesus kam long earth, hem talem pipol samting abaotem datfala secret. Hem sei secret hia hem abaotem Kingdom bilong God. Jesus talem pipol for prea for datfala Kingdom for kam. Datfala kingdom bae mekem earth kamap paradaes.

Waswe, iu laek for savve olketa nara samting abaotem datfala secret?— Tingim, pipol wea obeyim Jehovah nomoa bae stap long Paradaes. Bible garem staka story abaotem olketa man and woman wea obeyim Jehovah. Waswe, iu laek for lane abaotem olketa?— Bae iumi storyim samfala long olketa and hao nao iumi savve followim example bilong olketa.

READIM OLKETA SCRIPTURE HIA:

^ par. 3 Long evri story insaed disfala brochure bae iu lukim disfala mark (—) bihaen long samfala kwestin. Taem iu kasem diswan, hem gud for iu stop lelebet and letem pikinini bilong iu for ansa.