Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Lanem Pikinini Bilong Iu

 LESON 13

Timothy Laek Helpem Pipol

Timothy Laek Helpem Pipol

Timothy hem wanfala young man wea hapi for helpem pipol. Hem go long staka ples for helpem olketa narawan. From hem duim olsem, hem barava enjoyim laef bilong hem. Waswe, iu laek for herem samfala samting moa abaotem datwan?—

Mami and grani bilong Timothy teachim hem abaotem Jehovah

Timothy growap long wanfala big taon, wea nem bilong hem Lystra. Taem Timothy hem smol, grani bilong hem, Lois, and mami bilong hem, Eunice, start for teachim hem abaotem Jehovah. Start long datfala taem, hem laek helpem olketa narawan for lane abaotem Jehovah.

Nomata Timothy hem young man yet, Paul askem hem for go witim hem for tufala  preach long olketa difren ples. Timothy sei: ‘Bae mi kam!’ Hem laek for go and helpem olketa narawan.

Timothy go witim Paul long Thessalonica, wanfala taon long Macedonia. For kasem long there, tufala mas baeleg for staka hour and then go long wanfala ship. Long there tufala helpem staka pipol for lane abaotem Jehovah. Bat samfala pipol kros and trae for killim tufala. So Paul and Timothy mas go long olketa nara ples for preach.

Timothy barava hapi and enjoyim laef bilong hem

Bihaen samfala month, Paul talem Timothy for go bak long Thessalonica for lukim hao nao olketa brata and sista long there. Masbi Timothy fraet for go bak long datfala taon wea olketa laek for killim hem! Bat hem go bikos hem warim olketa. Taem hem go bak long Paul, hem talem gud nius abaotem olketa. Olketa brata and sista long Thessalonica gohed for faithful!

Paul and Timothy waka tugeta for staka year. Wantaem Paul hem sei Timothy nao best wan wea hem savve sendem for helpem olketa long kongregeson. Timothy lovem Jehovah and lovem pipol.

Waswe, iu lovem pipol and laek helpem olketa for lane abaotem Jehovah?— Sapos olsem, iu bae enjoyim laef bilong iu and iu bae barava hapi olsem Timothy!