Lukluk long olketa man long piksa. Nem bilong olketa nao Matthew, Mark, Luke, John, Peter, James, Jude, and Paul. Olketa laef long taem wea Jesus stap long earth, and olketa raet abaotem Jesus. Iumi bae story abaotem olketa distaem.

Storyim samting wea iu savve long hem abaotem olketa man hia

Thrifala long olketa hem olketa aposol wea preach witim Jesus. Iu savve hu nao thrifala hia?— Hem Matthew, John, and Peter. Aposol Matthew and John savve gud  long Jesus, and each wan raetem wanfala buk abaotem laef bilong Jesus long Bible. Aposol John raetem tu buk bilong Revelation and thrifala leta wea iumi kolem 1 John, 2 John, and 3 John. Aposol Peter raetem tufala leta wea stap long Bible. Tufala leta hia hem 1 Peter and 2 Peter. Long mek-tu leta bilong Peter, hem raet abaotem datfala taem wea Jehovah story kam from heven and sei olsem abaotem Jesus: ‘Hem nao Son bilong mi. Mi lovem hem, and mi hapi long hem.’

Olketa nara man long piksa raetem samfala buk long Bible tu wea teachim iumi abaotem Jesus. Wanfala long olketa nao hem Mark. Taem olketa arrestim Jesus, luk olsem hem stap long there tu and hem lukim evri samting wea happen. Narawan hem Luke. Hem wanfala doctor and luk olsem hem kamap wanfala Christian bihaen Jesus hem dae.

Bae iu savve lukim long piksa, nara tufala brata bilong Jesus wea born bihaen long hem. Iu savve long nem bilong tufala?— Hem James and Jude. Long firstaem, tufala no biliv long Jesus and tufala sei hem no garem stret tingting. Bat gogo tufala biliv long Jesus and kamap Christian.

Last wan long olketa hem Paul. Bifor hem kamap Christian, nem bilong hem Saul. Hem heitim olketa Christian and hem barava spoelem olketa. Iu savve wanem nao happen wea mekem Paul laek for kamap Christian?— Long wanfala day, taem Paul klosap kasem Damascus, hem herem Jesus story kam long hem from heven. Jesus askem Paul: ‘Why nao iu spoelem pipol wea biliv long mi?’ Bihaen datwan, Paul hem changem laef bilong hem and kamap Christian. Paul raetem 14-fala buk long Bible, wea hem nao buk bilong Rome go kasem buk bilong Hebrew.

Iumi readim Bible evriday, iaman?— Taem iumi readim Bible, iumi lanem staka samting abaotem Jesus. Waswe, iu laek for lanem moa samting abaotem Jesus?—