Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Lanem Pikinini Bilong Iu

 LESON 6

David Hem No Fraet

David Hem No Fraet

Taem iu fraet, wanem nao iu savve duim?— Maet iu askem mami and dadi bilong iu for helpem iu. Bat narawan hem stap wea savve helpem iu tu. Hem garem bigfala paoa and hem strong winim eni narawan. Iu savve hu nao hem?— Hem Jehovah God. Bible storyim wanfala young man wea nem bilong hem David. Hem savve Jehovah bae evritaem helpem hem, so hem no fraet.

Dadi and mami bilong David start for teachim hem for lovem Jehovah taem hem born. Datwan helpem David for no fraet taem hem kasem samfala hard samting. Hem savve Jehovah hem Fren bilong hem and Hem bae helpem hem. David savve lukaftarem olketa sheepsheep. Wanday, wanfala big lion kam tekem wanfala sheepsheep! Iu savve wanem nao David duim? Hem ronem datfala lion and luk olsem hem iusim hand bilong hem nomoa for killim hem dae! Long narataem wanfala bear attakim olketa sheepsheep, and David killim dae datfala bear tu! Iu tingse hu nao helpem David?— Ia, Jehovah nao helpem hem.

Nara taem wea David showimaot hem nating fraet, hem taem wea olketa Israelite faetem olketa Philistine. Wanfala soldia bilong olketa Philistine wea nem bilong hem Goliath, hem big and tol olsem wanfala giant! Hem tok daonem Jehovah and olketa soldia bilong Israel. Goliath askem eniwan long olketa for kam faetem hem. Bat olketa soldia hia fraet tumas for faetem hem. Taem David herem wanem Goliath duim, hem sei long Goliath: ‘Mi nao bae faetem iu! Jehovah bae helpem mi, and mi bae winim iu!’ Waswe, iu tingse samting wea David duim showimaot hem trustim Jehovah?— Ia, hem barava trustim Jehovah. Iu laek for savve wanem nao happen bihaen?

David tekem sling bilong hem and faevfala smooth ston, and hem go for faetem datfala giant. Taem Goliath lukim David hem young boy nomoa, hem tok spoelem David. Bat David sei long hem: ‘Iu kam for faetem mi witim sword, bat mi bae faetem iu witim nem bilong Jehovah!’ Then hem putim ston insaed long sling bilong  hem and hem ran go long Goliath. Hem swingim sling, and hem sut nao! Ston hia bangam forhed bilong Goliath and datfala giant foldaon and hem dae nao! Taem olketa Philistine lukim datwan, olketa fraet fogud and evriwan ranawe. Hao nao wanfala young boy olsem David savve winim wanfala giant?— Jehovah helpem hem, and Jehovah nao strong winim datfala giant!

David no fraet bikos hem savve Jehovah bae helpem hem

Wanem nao iu savve lanem from disfala story abaotem David?— Jehovah hem garem bigfala paoa and hem strong winim eni narawan. And Jehovah hem Fren bilong iu. So sapos enitaem iu fraet, hem gud for trustim Jehovah for helpem iu.

READIM OLKETA SCRIPTURE HIA:

  • Psalm 56:3, 4

  • 1 Samuel 17:20-54