Skip to content

Skip to secondary menu

Olketa Jehovah’s Witness

Solomon Islands Pidgin

Wanem Nao Kingdom Bilong God?

Wanem Nao Kingdom Bilong God?

Waswe, iu tingse hem . . .

  • samting wea stap long heart bilong iu?

  • wanfala story nomoa?

  • wanfala gavman long heven?

 BIBLE HEM SEI

“God long heven bae startim wanfala kingdom wea bae nating savve finis.”—Daniel 2:44, New World Translation.

‘God givim iumi disfala pikinini. And hem nao bae garem paoa for rul long wanfala gavman.’—Isaiah 9:6; footnote.

GUD SAMTING WEA IU SAVVE KASEM FROM DISWAN

  • Diswan hem wanfala gud gavman wea savve helpem iu.—Isaiah 48:17, 18.

  • Iu savve stap long niu world wea iu bae healthy and hapi.—Revelation 21:3, 4.

 WASWE, IUMI SAVVE TRUSTIM WANEM BIBLE TALEM?

Yes. Tingim tufala reason:

  • Jesus helpem iumi for luksavve wanem Kingdom bilong God bae duim. Jesus teachim olketa disaepol bilong hem for prea for Kingdom bilong God for kam and for God duim samting wea hem laek for duim long earth. (Matthew 6:9, 10) Jesus duim samfala samting wea showimaot hao God bae ansarem datfala prea.

    Taem Jesus stap long earth, hem feedim olketa wea hangre, healim olketa wea sik, and resurrectim olketa wea dae! (Matthew 15:29-38; John 11:38-44) Olketa samting hia showimaot wanem Jesus bae duim for pipol taem hem rul long Kingdom bilong God long future.—Revelation 11:15.

  • Olketa samting wea happen long world distaem pruvim Kingdom bilong God hem klosap for kam. Long wanfala profesi Jesus sei olketa war, hangre, and earthquake bae happen and then no longtaem bihaen, datfala Kingdom bae mekem evriwan long earth stap long peace.—Matthew 24:3, 7.

    Iumi lukim olketa samting hia happen distaem. So iumi savve sure klosap nao Kingdom bilong God bae finisim evri problem olsem.

 SAMTING FOR TINGIM

Taem Kingdom bilong God hem rul, hao nao bae laef bilong pipol long datfala taem?

Bible ansarem datfala kwestin long PSALM 37:29 and ISAIAH 65:21-23.