Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Klos Long Jehovah

 CHAPTER 19

“Wisdom Bilong God wea Showaot Long Wanfala Holy Secret”

“Wisdom Bilong God wea Showaot Long Wanfala Holy Secret”

1, 2. Wanem “holy secret” nao iumi shud interest long hem, and why nao olsem?

OLKETA SECRET! From olketa man interest tumas long secret and konfius long hem tu, planti taem hem hard for olketa man keepim secret. Nomata olsem, Bible sei: “Glory bilong God hem wei for keepim samting secret.” (Proverbs 25:2) Tru nao, from hem Sovereign Ruler and Creator, Jehovah fit for keepim samfala samting secret from olketa man go kasem taem wea hem markem for talem long olketa.

2 Nomata olsem, Jehovah talemaot wanfala interesting secret insaed long Word bilong hem. Nem bilong diswan hem “datfala holy secret bilong will bilong [God].” (Ephesians 1:9) For lane abaotem diswan no satisfaem interest nomoa. Wei for savve long disfala secret savve lead go long salvation and givim iu lelebet idea long barava bigfala wisdom bilong Jehovah.

Isisi Showaot

3, 4. Hao nao profesi wea stap long Genesis 3:15 hem givim hope, and wanem secret, or “holy secret” nao insaed long diswan?

3 Taem Adam and Eve sin, maet luk olsem datwan spoelem purpose bilong Jehovah for wanfala paradaes earth wea olketa perfect man stap insaed. Bat stretawe God deal witim datfala problem. Hem sei: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.”—Genesis 3:15.

4 Toktok hia no klia and mekem man konfius. Hu nao disfala woman? Hu nao snek? Hu nao datfala “seed” wea bae givim kill long hed bilong snek? Adam and Eve no savve tu. Nomata olsem, toktok bilong God givim hope for eni faithful pikinini bilong tufala hia. Raeteous fasin nao bae win. Purpose bilong Jehovah bae fulfill. Bat hao nao diswan bae kamap? Datwan  nao hem wanfala secret! Bible kolem datwan “wisdom bilong God wea showaot long wanfala holy secret, datfala wisdom wea haed.”—1 Corinthians 2:7.

5. Givim example bilong why Jehovah isisi talemaot secret bilong hem.

5 From Jehovah hem “Datwan for Showimaot olketa secret,” bae gogo hem showimaot olketa important information abaotem disfala secret. (Daniel 2:28) Bat bae hem isisi duim datwan. Olsem example, maet iumi ting long wei wea wanfala loving dadi hem ansa taem smol boy bilong hem ask olsem, “Dadi, wea nao mi kam from?” Dadi wea wise talem nomoa samting wea datfala smol boy savve minim. Taem boy hia grow moa big, dadi talem samfala samting moa long hem. Long sem wei, Jehovah luksavve long taem wea pipol bilong hem redy for savve long will and purpose bilong hem.—Proverbs 4:18; Daniel 12:4.

6. (a) Wanem nao purpose bilong wanfala covenant, wea minim kontrak? (b) Why nao iumi sapraes from Jehovah mekem olketa covenant witim olketa man?

6 Hao nao Jehovah showimaot olketa secret hia? Hem iusim samfala covenant, wea minim kontrak for showimaot planti samting. Maet iu tu bin saenem wanfala kontrak—maet for baem wanfala haos or kaonem selen or givim kaon. Kaen kontrak hia hem olsem promis wea fitim law for mekem each wan fulfillim part wea olketa agree for duim. Bat why nao Jehovah need for mekem olketa covenant, wea minim kontrak, witim olketa man? Iumi no daot hao samting wea hem talem hem olsem promis wea bae sure for fulfill. Datwan hem tru, bat samfala taem God kaen tumas for saportim toktok bilong hem witim olketa kontrak wea fitim law. Olketa agreement hia givim iumi olketa man wea no perfect moa reason for garem trust long olketa promis bilong Jehovah.—Hebrews 6:16-18.

Covenant Witim Abraham

7, 8. (a) Wanem covenant nao Jehovah mekem witim Abraham, and wanem nao diswan showimaot saed long datfala holy secret? (b) Hao nao Jehovah isisi showimaot laen wea promis Seed bae kamaot from?

7 Winim tu thousand year bihaen Jehovah aotem olketa man  from Paradaes, Hem sei long faithful servant bilong hem Abraham: “Mi bae barava blessim iu and mi bae barava mekem seed bilong iu kamap staka olsem olketa star long skae . . . and thru long seed bilong iu evri nation bilong earth bae barava blessim olketa seleva bikos iu nao lisin long voice bilong mi.” (Genesis 22:17, 18) Datwan hem no just wanfala promis; Jehovah mekem olsem wanfala covenant saed long law and saportim datwan witim serious promis wea kanduit fail. (Genesis 17:1, 2; Hebrews 6:13-15) Hem barava spesol samting hao Sovereign Lord seleva mekem kontrak for blessim olketa man!

“Mi bae barava mekem seed bilong iu kamap staka olsem olketa star long skae”

8 Covenant bilong Abraham showimaot datfala promis Seed bae kam olsem wanfala man, bikos hem kam from laen bilong Abraham. Bat bae hem hu nao? Gogo, Jehovah talem hao seed bae kamaot from laen bilong Isaac, son bilong Abraham. Long tufala son bilong Isaac, hem chusim Jacob. (Genesis 21:12; 28:13, 14) Bihaen, Jacob talem olketa profesi toktok hia for wanfala long 12-fala son bilong hem: “Datfala iron stik bilong king bae no lusim Judah, and stik bilong komanda mas stap witim hem, go kasem taem Shiloh [“Man wea Bilong Hem”] hem kam; and olketa pipol bae obeyim hem.” (Genesis 49:10) Diswan showimaot klia hao datfala Seed bae hem wanfala king, wan wea kam from laen bilong Judah!

Datfala Covenant Witim Israel

9, 10. (a) Wanem covenant nao Jehovah mekem witim nation bilong Israel, and long wanem wei nao datfala covenant protectim olketa? (b) Hao nao datfala Law showimaot need wea olketa man garem for wanfala ransom?

9 Long 1513 B.C.E., Jehovah mekem wanfala arrangement wea redyim wei for moa samting showaot abaotem datfala holy secret. Hem mekem wanfala covenant witim olketa pikinini bilong Abraham, datfala nation bilong Israel. Nomata diswan no go ahed distaem, Law covenant bilong Moses hem wanfala important part long purpose bilong Jehovah for mekem promis Seed kamap. Long wanem wei? Tingim thrifala wei. First wei, datfala Law hem olsem wanfala wall for protectim  man. (Ephesians 2:14) Olketa raeteous law bilong hem olsem wanfala wall midolwan olketa Jew and Gentile. So datfala law help for keepim sef laen bilong promis Seed. From datfala protection, nation bilong olketa Jew go ahed kasem taem bilong God for Messiah hem born long tribe bilong Judah.

10 Mek-tu wei, Law hem barava showimaot man needim wanfala ransom. From Law hia perfect, hem showimaot man wea sin hem hard tumas for followim evribit. So hem “showimaot klia olketa sin, go kasem taem wea seed bae kam wea long datwan nao Hem talem promis bifor.” (Galatians 3:19) Thru long olketa animal sakrifaes, datfala Law hem kavarem for lelebet taem olketa sin. Bat, olsem Paul hem raetem, “blood bilong olketa buluka and olketa goat no fit for aotem sin evribit,” olketa sakrifaes hia piksarem ransom sakrifaes bilong Christ. (Hebrews 10:1-4) So, for olketa faithful Jew, datfala covenant hem kamap ‘olsem samting wea leadim olketa go long Christ.’—Galatians 3:24.

11. Wanem nambawan chance nao datfala Law covenant givim long Israel, bat why nao datfala full nation no kasem datwan?

11 Mek-thri wei, datfala covenant givim wanfala nambawan chance for nation bilong Israel. Jehovah sei sapos olketa stap faithful long datfala covenant, olketa bae kamap “wanfala kingdom bilong olketa priest and wanfala holy nation.” (Exodus 19:5, 6) Gogo samfala from datfala nation bilong Israel kamap firstfala member bilong kingdom bilong olketa priest long heven. Bat, olsem wanfala full sekson, Israel go againstim datfala Law covenant, olketa rejectim datfala Messiah Seed, and lusim datfala chance. So, hu nao bae mekem datfala kingdom bilong olketa priest kasem full namba. And hao nao datfala nation bae join witim datfala promis Seed? Olketa kwestin hia abaotem datfala holy secret bae showaot long taem wea God markem.

Kingdom Covenant Witim David

12. Wanem covenant nao Jehovah mekem witim David, and diswan showimaot wanem samting saed long holy secret bilong God?

12 Long mek-11 century B.C.E., Jehovah mekem datfala holy  secret kamap moa klia taem hem mekem narafala covenant. Hem promisim faithful King David olsem: “Bae mi mekem seed bilong iu kamap bihaen long iu, . . . and mi bae mekem kingdom bilong hem standap strong. . . . Mi bae mekem throne bilong kingdom bilong hem stap for olowe.” (2 Samuel 7:12, 13; Psalm 89:3) Distaem hem showimaot klia hao datfala promis Seed bae kam from laen bilong David. Bat waswe, wanfala man nomoa savve rul “for olowe”? (Psalm 89:20, 29, 34-36) And waswe, king wea hem man savve sevem olketa man from sin and dae?

13, 14. (a) Olsem Psalm 110 talem, wanem promis nao Jehovah talem saed long anointed King bilong hem? (b) Olketa profet bilong Jehovah showimaot wanem samting moa abaotem datfala Seed?

13 God muvim David for raet: “Toktok bilong Jehovah for Lord bilong mi, hem olsem: ‘Sidaon long raet saed bilong mi go kasem taem mi putim olketa enemy bilong iu olsem stul for putim leg bilong iu.’ Jehovah hem promis (and hem bae nating change): ‘Iu nao priest for taem olowe olsem Melchizedek!’” (Psalm 110:1, 4) Toktok bilong David point go evribit long datfala promis Seed, or Messiah. (Acts 2:35, 36) Disfala King bae rul, no from Jerusalem, bat from heven long “raet saed” bilong Jehovah. Datwan bae givim hem paoa no ovarem land bilong Israel nomoa bat ovarem full earth tu. (Psalm 2:6-8) Diswan showimaot nara samting. Lukim hao Jehovah talem wanfala promis hao datfala Messiah bae “wanfala priest . . . olsem Melchizedek.” Long sem wei Melchizedek wea king and priest long taem bilong Abraham, datfala Seed wea kam bae kasem appointment from God for waka olsem King and Priest!—Genesis 14:17-20.

14 Insaed olketa year wea go pas, Jehovah iusim olketa profet for showimaot moa samting abaotem datfala holy secret. Olsem example, Isaiah showimaot hao datfala Seed bae dae olsem wanfala sakrifaes. (Isaiah 53:3-12) Micah profesi abaotem ples wea datfala Messiah bae born. (Micah 5:2) Daniel talem profesi tu long barava taem wea datfala Seed bae kam and dae.—Daniel 9:24-27.

 Datfala Holy Secret Hem Showaot Klia!

15, 16. (a) Hao nao Son bilong Jehovah hem “born from wanfala woman”? (b) Wanem nao Jesus kasem from mami and dadi bilong hem long earth, and wanem taem nao hem kam olsem datfala Seed wea God promisim?

15 Wei wea olketa profesi hia bae fulfill hem olsem wanfala secret go kasem taem wea datfala Seed hem kam. Galatians 4:4 hem sei: “Taem hem kasem barava taem, God sendem kam Son bilong hem, wea born from wanfala woman.” Long year 2 B.C.E., wanfala angel sei olsem long wanfala young Jew girl: “Lukim! iu bae garem pikinini insaed long bele bilong iu and bornem wanfala son, and iu mas kolem nem bilong hem Jesus. Diswan bae kamap nambawan and olketa bae kolem hem Son bilong Most Hae; and Jehovah God bae givim hem throne bilong David, dadi bilong hem . . . Holy spirit bae kam long iu, and paoa bilong Most Hae bae ovarem iu. Dastawe, olketa bae kolem diswan wea bae hem born holy, Son bilong God.”—Luke 1:31, 32, 35.

16 Bihaen, Jehovah putim laef bilong Son bilong hem from heven insaed long bele bilong Mary, dastawe hem born from wanfala woman. Mary hem wanfala woman wea no perfect. Nomata olsem, Jesus no kasem wei for no perfect from hem, bikos hem “Son bilong God.” Long semtaem, from dadi and mami bilong Jesus long earth kam from laen bilong David, diswan mekem Hem fit saed long famili laen and saed long law for rul long throne bilong David. (Acts 13:22, 23) Taem Jesus baptaes long 29 C.E., Jehovah anointim hem witim holy spirit and sei: “Diswan nao Son bilong mi, wea mi lovem.” (Matthew 3:16, 17) Tru nao, datfala Seed hem kam nao! (Galatians 3:16) Hem taem for showimaot moa samting abaotem datfala holy secret.—2 Timothy 1:10.

17. Hao nao mining bilong Genesis 3:15 hem kamaot klia?

17 Taem hem duim ministry bilong hem, Jesus talemaot hao snek wea Genesis 3:15 storyim hem Satan and seed bilong datfala snek hem olketa wea followim Satan. (Matthew 23:33; John 8:44) Bihaen, hem showim hao olketa hia bae finis  for olowe. (Revelation 20:1-3, 10, 15) And datfala woman nao hem “Jerusalem antap,” organization bilong Jehovah long heven wea olsem waef bilong hem wea insaed hem olketa angel. *Galatians 4:26; Revelation 12:1-6.

Datfala Niu Covenant

18. Wanem nao purpose bilong datfala “niu covenant”?

18 Maet samting wea showaot klia wea moa spesol hem happen long naet bifor Jesus hem dae taem hem talem olketa faithful disaepol abaotem wanfala “niu covenant.” (Luke 22:20) Olsem datfala Law covenant bilong Moses wea kamap bifor, niu covenant hia bae garem “wanfala kingdom bilong olketa priest.” (Exodus 19:6; 1 Peter 2:9) Bat, disfala niu covenant bae startim, no wanfala nation long earth, bat wanfala spiritual nation, “datfala Israel bilong God,” wea olketa faithful anointed follower bilong Christ nomoa bae insaed. (Galatians 6:16) Olketa hia wea insaed long disfala niu covenant bae share witim Jesus for blessim olketa man!

19. (a) Why nao datfala niu covenant no fail for mekem “wanfala kingdom bilong olketa priest”? (b) Why nao Bible kolem olketa anointed Christian “wanfala niu creation,” and wanem nao namba bilong olketa wea bae serve long heven witim Christ?

19 Bat why nao datfala niu covenant hem win for mekem “wanfala kingdom bilong olketa priest” kamap for blessim olketa man? Bikos hem no judgem olketa disaepol bilong Christ olsem sinner, bat hem openem wei for olketa kasem forgiveness from sin thru long sakrifaes bilong Christ. (Jeremiah 31:31-34) Taem olketa kasem wei for standap raeteous front long Jehovah, hem adoptim olketa for kamap part long famili bilong hem long heven and anointim olketa witim holy spirit. (Romans 8:15-17; 2 Corinthians 1:21) So olketa kasem “niufala wei for born for wanfala really hope . . . long heven.”  (1 Peter 1:3, 4) From wei for garem hae position olsem hem niu samting for man, Bible kolem olketa anointed Christian hia, wea born long spirit, “wanfala niu creation.” (2 Corinthians 5:17) Bible showimaot hao gogo 144,000 nao bae share for rul long heven ovarem olketa man wea Jesus baem bak.—Revelation 5:9, 10; 14:1-4.

20. (a) Wanem nao showaot saed long datfala holy secret long 36 C.E.? (b) Hu nao bae kasem olketa blessing wea God promisim long Abraham?

20 Olketa anointed wan hia kamap “seed bilong Abraham,” witim Jesus tu. * (Galatians 3:29) Olketa first wan kam from nation bilong olketa Jew. Bat long 36 C.E., narafala part bilong datfala holy secret hem showaot: olketa Gentile, olketa wea no Jew, bae garem tu datfala hope for stap long heven. (Romans 9:6-8; 11:25, 26; Ephesians 3:5, 6) Waswe, olketa anointed Christian nomoa bae kasem olketa blessing wea God promisim long Abraham? Nomoa, bikos sakrifaes bilong Jesus helpem full world. (1 John 2:2) Gogo, Jehovah showimaot hao wanfala “big crowd” wea man no savve kaontem bae sev thru long end bilong disfala system bilong Satan. (Revelation 7:9, 14) Planti pipol tu bae resurrect witim hope for laef olowe insaed wanfala Paradaes!—Luke 23:43; John 5:28, 29; Revelation 20:11-15; 21:3, 4.

Wisdom Bilong God and Datfala Holy Secret

21, 22. Wanem nao olketa wei wea holy secret bilong Jehovah showimaot wisdom bilong hem?

21 Iumi sapraes hao datfala holy secret hem showimaot “wisdom bilong God wea garem planti difren saed.” (Ephesians 3:8-10) Jehovah garem nambawan wisdom taem hem tingim disfala secret, and tu taem hem isisi showimaot! Long wise wei hem luksavve hao man hem short long planti samting, bat diswan mekem wei for man showimaot tru samting insaed heart bilong hem.—Psalm 103:14.

 22 Jehovah showimaot tu bigfala wisdom taem hem chusim Jesus for King. Iumi no fit for trustim eniwan long universe winim Son bilong Jehovah. Taem hem laef olsem wanfala man long earth, Jesus kasem planti difren kaen problem. Hem minim evribit olketa problem bilong olketa man. (Hebrews 5:7-9) And waswe long olketa wea bae rul witim Jesus? Insaed planti handred year, olketa man and woman—from evri difren kaen kala skin, languis, and living—kasem anointing. Evriwan long olketa hia bin feisim and winim evri difren kaen problem. (Ephesians 4:22-24) Wei for stap anda long rul bilong olketa king and priest hia wea garem mercy bae mekem man hapi tumas!

23. Wanem privilege nao olketa Christian garem saed long holy secret bilong Jehovah?

23 Aposol Paul hem raet olsem: “Disfala holy secret wea stap haed from olketa system long bifor and from olketa genereson bifor . . . hem showaot long olketa holy wan bilong hem.” (Colossians 1:26) Tru nao, olketa anointed holy wan bilong Jehovah minim planti samting abaotem datfala holy secret, and olketa sharem datfala savve witim planti million pipol. Iumi evriwan garem bigfala privilege! Jehovah “talemaot long iumi disfala holy secret bilong will bilong hem.” (Ephesians 1:9) Iumi mas sharem disfala nambawan secret witim nara pipol, helpem olketa tu for lukluk insaed long barava bigfala wisdom bilong Jehovah God!

^ par. 17 “Holy secret bilong . . . fasin for lovem God” hem showaot klia long Jesus tu. (1 Timothy 3:16) For longfala taem ansa long nara kwestin hem olsem secret; waswe, eni man savve keepim faithful fasin long Jehovah long perfect wei? Jesus nao showimaot klia ansa. Hem stap faithful long evri test wea Satan duim long hem.—Matthew 4:1-11; 27:26-50.

^ par. 20 Jesus mekem tu “wanfala covenant . . . for wanfala kingdom” witim disfala sem sekson. (Luke 22:29, 30) Diswan minim Jesus mekem wanfala kontrak witim “smol flock” hia for rul witim hem long heven olsem mek-tu part bilong seed bilong Abraham.—Luke 12:32.