Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Klos Long Jehovah

 CHAPTER 6

Paoa for Distroe—“Jehovah Hem Strongfala Man Bilong War”

Paoa for Distroe—“Jehovah Hem Strongfala Man Bilong War”

1-3. (a) Wanem danger nao olketa Israelite feisim from olketa bilong Egypt? (b) Hao nao Jehovah faet for pipol bilong hem?

OLKETA Israelite no wei nao—olketa stap midol long olketa steep maunten and sea wea hard for katkros long hem. Army bilong Egypt, barava raf sekson for killkill, aftarem olketa for killim olketa evriwan dae. * Nomata olsem, Moses encouragem pipol bilong God for no lus hope. Hem comfortim olketa taem hem sei: “Jehovah seleva bae faet for iufala.”—Exodus 14:14.

2 Nomata olsem, Moses askem help bilong Jehovah, and hem ansa olsem: “Why nao iu go ahed for singaot kam long mi? . . . Liftim ap stik bilong iu and putim aot hand bilong iu ovarem sea and divaedem.” (Exodus 14:15, 16) Piksarem evri samting wea go ahed for happen. Stretawe Jehovah givim komand long angel bilong hem, and datfala cloud muv go bihaen long olketa Israelite, maet hem kamap olsem wanfala wall wea blokem Egypt for attak. (Exodus 14:19, 20; Psalm 105:39) Moses putim aot hand bilong hem. Wanfala strong wind hem divaedem datfala sea. Wata hem kamap strong and standap olsem wall, wea mekem wanfala road wea fitim datfala full nation for wakabaot followim!—Exodus 14:21; 15:8.

3 Taem hem lukim evri samting hia wea showimaot bigfala paoa, Pharaoh shud givim order nao for army bilong hem tan bak. Bat, praodfala Pharaoh givim order for olketa attak. (Exodus 14:23) Olketa bilong Egypt full speed go bihaenem olketa Israelite, bat attak bilong olketa hem olabaot taem wheel bilong olketa chariot hem start for foldaon. Taem olketa Israelite  arrive sef long narasaed, Jehovah givim komand long Moses: “Putim aot hand bilong iu ovarem sea, mekem wata hia savve kam bak ovarem olketa bilong Egypt, olketa war chariot and olketa soldia wea raedem horse bilong olketa.” Wata hia foldaon and berem Pharaoh and olketa army bilong hem!—Exodus 14:24-28; Psalm 136:15.

Long Red Sea, Jehovah showimaot wei wea hem “strongfala man bilong war”

4. (a) Long Red Sea, Jehovah hem pruvim wanem abaotem hemseleva? (b) Hao nao diswan maet affectim wei wea samfala ting abaotem Jehovah?

4 Wei wea nation bilong Israel sev long Red Sea hem wanfala important samting wea happen long history saed long wei wea God deal witim olketa man. Long datfala taem Jehovah showimaot wei wea hem wanfala “strongfala man bilong war.” (Exodus 15:3) Bat, hao nao diswan affectim tingting bilong iu abaotem Jehovah? For tok stret, war hem kosim bigfala pain and sorre long olketa man. Waswe, wei wea God iusim paoa bilong hem for distroe hem mekem iu hol bak and no muvim iu for kam klos long hem?

War Bilong God and War Bilong Olketa Man

5, 6. (a) Why nao hem fitim God for garem title “Jehovah bilong olketa army”? (b) Hao nao war bilong God difren from war bilong olketa man?

5 Klosap thri handred taem insaed Hebrew Scripture and tufala taem insaed Christian Greek Scripture, God hem garem title “Jehovah bilong olketa army.” (1 Samuel 1:11) From hem Sovereign Ruler, Jehovah hem garem paoa ovarem wanfala big army bilong olketa angel long heven. (Joshua 5:13-15; 1 Kings 22:19) Paoa wea disfala army garem for distroe hem barava narawe. (Isaiah 37:36) For ting abaotem wei for distroem olketa man hem mekem man feel nogud. Bat, iumi mas remember hao olketa war bilong God difren tumas from olketa iusles war bilong olketa man. Olketa leader bilong army and politik maet trae for givim gudfala reason for raf samting wea olketa duim. Bat greedy and selfish fasin nao planti taem kosim war bilong olketa man.

 6 Long wei wea difren evribit, Jehovah hem balance saed long feeling. Deuteronomy 32:4 sei: “Datfala Rok, waka bilong hem perfect, from evri wei bilong hem followim justice. Wanfala God bilong faithful fasin, wea showimaot justice evribit; hem nao raeteous and stret.” Bible hem tok againstim kros wea man no kontrolem and raf fasin. (Genesis 49:7; Psalm 11:5) So Jehovah no duim eniting sapos hem no garem reason for datwan. Hem no iusim paoa for distroe long wei wea ova tumas and hem only duim datwan sapos no eni nara wei stap for stretem datfala problem. Hem sei olsem thru long profet Ezekiel: “‘Waswe, mi hapi taem samwan wea wicked hem dae,’ hem nao toktok bilong Sovereign Lord Jehovah, ‘and no for hem shud tan bak from olketa wei bilong hem and go ahed for stap laef?’”—Ezekiel 18:23.

7, 8. (a) Wanem rong tingting nao Job garem abaotem wei wea hem safa? (b) Hao nao Elihu stretem tingting bilong Job long diswan? (c) Wanem leson nao iumi lanem from samting wea kasem Job?

7 Sapos olsem, why nao Jehovah iusim paoa for distroe? Bifor iumi faendem ansa, hem gud for tingim raeteous man Job. Satan challengem sapos Job—or eni man—bae go ahed for stap faithful long taem bilong test. Jehovah ansarem datfala challenge taem hem letem Satan for testim faithful fasin bilong Job. From diswan, Job kasem bigfala sik, lusim olketa riches and pikinini bilong hem. (Job 1:1–2:8) From hem no savve long datfala challenge wea kamap, Job mistek for tingse wei wea hem safa hem from panis wea hem kasem from God. Hem askem God why nao Hem mekem hem kamap wanfala “target” and “wanfala enemy.”—Job 7:20; 13:24.

8 Wanfala young man wea nem bilong hem Elihu showimaot hao tingting bilong Job hem rong taem hem sei: “Iu sei, ‘Raeteous fasin bilong mi hem winim bilong God.’” (Job 35:2) Tru nao, hem no wise for tingse iumi savve long samting winim God or sei hem duim samting wea no stret. Elihu sei: “Hem hard for trufala God duim nogud samting, and for Olmaeti no followim justice.” Bihaen moa hem sei: “Long saed bilong Olmaeti, bae iumi no enitaem savve long hem evribit;  hem garem bigfala paoa, and hem bae no ting smol long justice and raeteous fasin.” (Job 34:10; 36:22, 23; 37:23) Iumi sure taem God faet, hem garem gudfala reason for duim olsem. From iumi savve long datwan, hem gud for lukluk long samfala reason why God bilong peace hem samtaem kamap man for faet.—1 Corinthians 14:33.

Why God Bilong Peace Hem Mas Faet

9. Why nao God bilong peace hem faet?

9 Bihaen hem praisem God olsem “strongfala man bilong war,” Moses sei: “Hu nao midolwan long olketa god hem olsem iu, O Jehovah? Hu nao hem olsem iu, wea iu showimaot iu maeti long holy fasin?” (Exodus 15:11) Profet Habakkuk tu raetem toktok wea klosap semsem: “Iu klin tumas long eye for lukim samting wea nogud; and for luk go long trabol iu no fit for duim.” (Habakkuk 1:13) Nomata Jehovah hem wanfala God bilong love, hem wanfala God bilong holy fasin, raeteous fasin, and justice tu. From olketa fasin hia, samfala taem, hem mas iusim paoa bilong hem for distroem samting. (Isaiah 59:15-19; Luke 18:7) So God no mekem holy fasin bilong hem kamap dirty taem hem faet. Nomoa, hem faet bikos hem holy.—Exodus 39:30.

10. (a) Long wanem taem and hao nao need hem kamap for God mas faet? (b) Wanem nao only wei wea feeling for enemy long Genesis 3:15 bae finis, and wanem gudfala samting nao olketa man wea raeteous bae kasem?

10 Tingim samting wea happen bihaen first man and woman, Adam and Eve, bighed for againstim God. (Genesis 3:1-6) Sapos hem letem rong samting wea tufala duim for go ahed, position bilong Jehovah olsem Sovereign bilong Universe bae kamap wik. Olsem wanfala raeteous God, hem mas judgem tufala for dae. (Romans 6:23) Long first Bible profesi, hem sei feeling for enemy bae stap midolwan olketa servant bilong hemseleva and olketa wea followim datfala “snek,” Satan. (Revelation 12:9; Genesis 3:15) Gogo, only wei for finisim disfala feeling for enemy hem for distroem Satan. (Romans 16:20) Datfala akson bilong judgment bae mekem olketa man  wea raeteous kasem olketa bigfala blessing, taem hem aotem evri paoa bilong Satan and openem wei for wanfala paradaes kamap evriwea long earth. (Matthew 19:28) Go kasem datfala taem, olketa wea saed witim Satan bae go ahed for againstim pipol bilong God for spoelem olketa long physical saed and long spiritual saed. Samfala taem Jehovah bae need for helpem olketa.

Akson Bilong God for Aotem Wicked Fasin

11. Why nao God feel hem mas mekem wanfala flood kamap long full earth?

11 Flood long taem bilong Noah hem wanfala example bilong wei wea God tek akson. Genesis 6:11, 12 hem sei: “Earth hem kamap nogud tumas long eye bilong trufala God and earth hem fulap witim raf fasin. So God lukim earth and, lukim! hem nogud nao, bikos olketa man spoelem gogo bilong olketa long earth.” Waswe, God bae letem wicked pipol for finisim evri last gudfala fasin wea stap long earth? Nomoa. Jehovah hem feel hao hem mas mekem wanfala flood kamap long full earth for finisim olketa wea go ahed strong for duim raf fasin and dirty fasin.

12. (a) Wanem nao Jehovah talem saed long “seed” bilong Abraham? (b) Why nao olketa Amorite mas dae?

12 Diswan semsem tu long judgment bilong God againstim pipol bilong Canaan. Jehovah showimaot hao thru long Abraham, wanfala “seed” bae kamap wea bae mekem evri famili bilong earth kasem blessing. For fitim datfala purpose, God sei olketa pikinini bilong Abraham mas tekem land bilong Canaan, wanfala land wea olketa Amorite stap insaed. Hao nao hem fitim justice for God raosem aot pipol hia from land bilong olketa? Jehovah sei hem bae no raosem olketa from datfala land for samting olsem 400 year—go kasem taem wea “rong bilong olketa Amorite” hem “kasem last namba.” * (Genesis 12:1-3; 13:14, 15; 15:13, 16; 22:18) Long datfala taem,  nogud fasin bilong olketa Amorite kamap moa worse. Canaan kamap wanfala land wea pipol worshipim idol, killim dae nara pipol, and garem barava nogud fasin saed long sex. (Exodus 23:24; 34:12, 13; Numbers 33:52) Pipol long datfala ples sakrifaesim olketa pikinini long fire. Waswe, wanfala holy God savve letem pipol bilong hem for stap witim wicked pipol olsem? Nomoa nao! Hem sei: “Datfala land hem no klin, and mi bae mekem hem kasem panis for sin bilong hem, and datfala land bae toroaotem pipol wea stap insaed.” (Leviticus 18:25) Nomata olsem, Jehovah no killkill krangge nomoa. Pipol bilong Canaan wea garem gudfala fasin, olsem Rahab and olketa Gibeonite, no dae.—Joshua 6:25; 9:3-27.

Faet for Nem Bilong Hem

13, 14. (a) Why nao Jehovah hem mas mekem nem bilong hem kamap holy? (b) Hao nao Jehovah aotem shame from nem bilong hem?

13 Bikos Jehovah hem holy, nem bilong hem holy. (Leviticus 22:32) Jesus teachim olketa disaepol bilong hem for prea: “Letem nem bilong iu kamap holy.” (Matthew 6:9) Bighed fasin long Eden hem barava spoelem nem bilong God, and mekem daot kamap abaotem nem bilong God and wei bilong hem for rul. Jehovah kanduit acceptim laea toktok and bighed fasin hia wea againstim hem. Hem mas aotem shame wea kasem nem bilong hem.—Isaiah 48:11.

14 Tingim moa olketa Israelite. Taem olketa stap olsem slave long Egypt, datfala promis bilong God for Abraham hao thru long Seed bilong hem evri famili long earth bae kasem blessing, hem olsem emti toktok nomoa. Bat taem hem sevem olketa and mekem olketa kamap wanfala nation, Jehovah aotem shame from nem bilong hem. Profet Daniel storyim moa datwan long prea: “O God bilong mifala Jehovah, iu tekem aot pipol bilong iu from land bilong Egypt witim strong hand and mekem pipol savve long nem bilong iu.”—Daniel 9:15.

15. Why nao Jehovah sevem olketa Jew from wei for prisoner long Babylon?

15 Interesting samting, Daniel prea olsem long taem olketa  Jew needim Jehovah for duim samting moa for saed long nem bilong Hem. From olketa Jew no obey olketa kamap prisoner moa, distaem long Babylon. Taon bilong olketa, Jerusalem, hem distroe. Daniel savve hao wei for tekem bak olketa Jew long homland bilong olketa bae mekem nem bilong Jehovah kamap hae. Dastawe Daniel prea olsem: “O Jehovah, forgivim mifala. O Jehovah, lukluk gud and duim samting. No delay, for saed bilong iuseleva, O God bilong mi, from nem bilong iu stap long taon bilong iu and pipol bilong iu.”—Daniel 9:18, 19.

Faet for Pipol Bilong Hem

16. Explainim hao wei wea Jehovah interest for defendim nem bilong hem no minim hem no garem feeling and hem selfish.

16 Waswe, wei wea Jehovah interest for defendim nem bilong hem minim hem no garem feeling and hem selfish? Nomoa, bikos taem hem duim samting wea fitim holy fasin bilong hem and from hem lovem justice, hem protectim pipol bilong hem. Lukim Genesis chapter 14. Long there iumi read abaotem fofala king wea kasholem son bilong brata bilong Abraham, Lot and famili bilong hem. Witim help bilong God, Abraham go and winim datfala strongfala sekson! Story abaotem disfala wei for win hem first story insaed “buk bilong Olketa War bilong Jehovah,” wea maet hem wanfala buk wea storyim tu samfala faet wea no stap insaed long Bible. (Numbers 21:14) Hem winim planti moa war bihaen.

17. Wanem nao showimaot Jehovah hem faet for olketa Israelite bihaen olketa go insaed long land bilong Canaan? Talem samfala example.

17 No longtaem bifor olketa Israelite go insaed long land bilong Canaan, Moses promisim olketa: “God bilong iufala Jehovah nao go front long iufala. Hem bae faet for iufala olsem hem duim for iufala long Egypt.” (Deuteronomy 1:30) Start long Joshua, man wea changem Moses, and long full taem bilong olketa Judge and rul bilong olketa faithful king bilong Judah, Jehovah barava faet for pipol bilong hem, and mekem olketa win long planti spesol wei ovarem olketa enemy bilong olketa.—Joshua 10:1-14; Judges 4:12-17; 2 Samuel 5:17-21.

18. (a) Why nao iumi tinghae long wei wea Jehovah no change? (b) Wanem nao bae happen taem feeling for enemy wea Genesis 3:15 storyim hem kasem full strong bilong hem?

 18 Jehovah hem no change; and purpose bilong hem for mekem disfala earth kamap wanfala paradaes bilong peace tu hem no change. (Genesis 1:27, 28) God hem still heitim wicked fasin. Long semtaem hem lovem tumas pipol bilong hem and klosap nao bae duim samting for olketa. (Psalm 11:7) Tru nao, feeling for enemy wea Genesis 3:15 storyim bae klosap finis long bigfala and strong wei. For mekem nem bilong hem holy and protectim pipol bilong hem, Jehovah bae kamap “strongfala man bilong war”!—Zechariah 14:3; Revelation 16:14, 16.

19. (a) Explainim why nao wei wea God iusim paoa bilong hem for distroe savve mekem iumi kam klos long hem? (b) Hao nao wei wea God willing for faet hem shud affectim iumi?

19 Tingim wanfala tokpiksa: Sapos wanfala barava raf animal hem attakim famili bilong wanfala man and datfala man hem jamp go and killim dae datfala raf animal. Waswe, iu ting waef and olketa pikinini bilong hem bae feel nogud long hem from disfala samting wea hem duim? Nomoa nao, wei wea hem no selfish for showimaot love long olketa bae barava muvim olketa. Olsem tu, iumi shud no feel nogud long wei wea God  iusim paoa bilong hem for distroe. Wei wea hem willing for faet for protectim iumi shud mekem love bilong iumi for hem grow. Respect wea iumi garem for bigfala paoa bilong hem shud kamap moa strong tu. So, iumi savve “givim holy service wea God acceptim witim fasin for fraet long hem and respect.”—Hebrews 12:28.

Kam Klos Long “Strongfala Man Bilong War”

20. Taem iumi readim olketa story insaed Bible abaotem olketa war wea God faet insaed, wea iumi maet no minim evribit, wanem nao iumi shud duim, and why nao olsem?

20 Tru, Bible no explainim evri information abaotem olketa disison bilong Jehovah saed long olketa war wea hem faet insaed. Bae iumi savve evritaem sure long diswan: No enitaem Jehovah hem iusim paoa bilong hem for distroe long wei wea no followim justice, wea ova tumas or long raf wei. Planti taem, wei for readim olketa verse wea stap raonem wanfala story bilong Bible savve helpem iumi for garem stretfala tingting. (Proverbs 18:13) Nomata taem iumi no savve long evri information, wei for lanem moa samting abaotem Jehovah and for ting raonem olketa nambawan fasin bilong hem savve helpem iumi for aotem eni daot wea maet kamap. Taem iumi duim olsem, bae iumi lukim hao iumi garem planti reason for trustim God bilong iumi, Jehovah.—Job 34:12.

21. Nomata hem “strongfala man bilong war” samfala taem, wanem nao main fasin bilong Jehovah?

21 Nomata Jehovah hem “strongfala man bilong war” taem need kamap for faet, diswan no minim hem laekem war. Long vision bilong Ezekiel abaotem chariot long heven, Jehovah hem redy for faet againstim olketa enemy bilong hem. Nomata olsem, Ezekiel lukim wanfala rainbow hem stap raonem God—wea piksarem peace. (Genesis 9:13; Ezekiel 1:28; Revelation 4:3) Tru tumas, Jehovah hem kwaet and laekem peace. Aposol John hem raet olsem: “God hem love.” (1 John 4:8) Evri fasin bilong Jehovah balance long perfect wei. Dastawe hem bigfala privilege for iumi kam klos long God olsem wea strong tumas bat long semtaem hem loving!

^ par. 1 Josephus, man for raetem history, sei sekson wea aftarem olketa Hebrew garem “600 chariot and 50,000 man wea raedem horse and 200,000 soldia wea baeleg and karem staka samting for faet.”—Jewish Antiquities, II, 324 [xv, 3].

^ par. 12 Luk olsem datfala toktok “olketa Amorite” long hia minim evri pipol bilong Canaan.—Deuteronomy 1:6-8, 19-21, 27; Joshua 24:15, 18.