Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Klos Long Jehovah

 CHAPTER 4

“Jehovah Garem . . . Barava Bigfala Paoa”

“Jehovah Garem . . . Barava Bigfala Paoa”

1, 2. Wanem sapraesing samting nao Elijah lukim firstaem, bat wanem barava spesol samting nao hem lukim taem hem stap long cave long Maunt Horeb?

ELIJAH bin lukim olketa sapraesing samting bifor. Hem lukim olketa raven bird karem kam kaikai for hem tufala taem each day taem hem stap haed. Hem lukim container for flour and narawan for oil wea nating emti taem bigfala hangre go ahed. Hem lukim tu fire kamdaon from skae taem hem prea for datwan. (1 Kings, chapter 17, 18) Bat, Elijah nating lukim eniting olsem disfala next samting wea happen.

2 Taem hem standap long mouth bilong wanfala cave long Maunt Horeb, hem lukim samfala barava spesol samting. Firstaem big wind. Masbi datwan mekem bigfala noise bikos strong bilong wind hia brekem olketa maunten and pisisim olketa bigfala ston. Then wanfala earthquake, wea kamap taem strongfala paoa brek aot from deep daon insaed long earth. Bihaen, wanfala big fire hem kam. Taem fire hem go pas, Elijah masbi feelim barava strongfala hot.—1 Kings 19:8-12.

“Lukim! Jehovah hem go pas”

3. Elijah hem lukim pruv wea showimaot wanem fasin bilong God, and wea nao iumi savve lukim pruv bilong disfala sem fasin?

3 Evri difren samting hia wea Elijah lukim olketa semsem long wanfala wei—olketa showimaot barava bigfala paoa bilong God. Bat iumi no need for lukim wanfala mirakol for luksavve God hem garem disfala fasin. Diswan showaot klia finis. Bible sei creation nao pruvim “paoa bilong hem wea olowe and wei wea hem God.” (Romans 1:20) Tingim laetning and thunder wea kamap taem hem big wind and rain, wata wea foldaon long bigfala watafol, barava waed skae wea fulap witim olketa star! Waswe, iu lukim paoa bilong God long olketa samting hia? Nomata olsem, planti pipol long world distaem no really luksavve long paoa bilong God. And tu-thri nomoa garem stretfala tingting abaotem diswan. Wei for minim disfala  fasin bilong God hem givim iumi planti reason for kam klos long Jehovah. Long disfala sekson bae iumi studyim planti samting abaotem bigfala paoa bilong Jehovah.

Wanfala Main Fasin Bilong Jehovah

4, 5. (a) Hao nao nem bilong Jehovah join witim wei wea hem maeti, or paoa bilong hem? (b) Why nao hem fitim Jehovah for chusim buluka for piksarem paoa bilong hem?

4 Paoa bilong Jehovah no olsem eni narawan. Jeremiah 10:6 sei: “No eniwan olsem iu long eni wei, O Jehovah. Iu nambawan, and nem bilong iu hem maeti long bigfala wei.” Long hia nem bilong Jehovah join witim wei wea hem maeti, or paoa bilong hem. Remember hao staka pipol sei disfala nem minim “Hem Mekem Kamap.” Wanem nao mekem Jehovah fit for creatim eni samting and kamap eni samting wea hem laek for kamap? Paoa nao wanfala samting. Tru nao, wei wea Jehovah fit for duim samting, for duim will bilong hem, hem no garem spialaen. Diskaen paoa nao hem wanfala main fasin bilong hem.

5 Bikos iumi bae hard for minim full paoa bilong hem, Jehovah iusim olketa tokpiksa for helpem iumi. Olsem iumi lukim finis, hem iusim buluka for piksarem paoa bilong hem. (Ezekiel 1:4-10) Datwan hem barava fitim bikos buluka hem wanfala big and strongfala animal. Pipol long Palestine long taem bilong Bible no lukim eni nara animal wea moa strong winim buluka. Bat olketa savve long wankaen buluka wea moa strong—wild buluka, or aurochs, wea no stap distaem. (Job 39:9-12) King bilong Rome, Julius Caesar sei olketa buluka hia klosap sem size witim olketa elephant. Hem raet olsem abaotem olketa: “Olketa strong tumas and savve ran fast fogud.” Tingim wei wea iu bae feel smol and wik sapos iu standap saed long animal olsem!

6. Why nao Jehovah nomoa garem nem “Olmaeti Wan”?

6 Long sem wei tu, man hem smol and wik taem iumi  markem hem witim paoa bilong God, Jehovah. Long hem, olketa maeti nation olsem lelebet dust antap long scale. (Isaiah 40:15) No eniwan olsem Jehovah wea garem paoa evribit, dastawe hem nomoa garem nem “Olmaeti Wan.” * (Revelation 15:3) Jehovah hem “barava strong long paoa” and “garem staka paoa.” (Isaiah 40:26) Paoa wea kamaot from hem no savve finis. Hem no depend long eni nara samting for strong, bikos “strong hem bilong God.” (Psalm 62:11) Bat, long wanem wei nao Jehovah iusim paoa bilong hem?

Hao Jehovah Iusim Paoa Bilong Hem

7. Wanem nao holy spirit bilong Jehovah, and wanem nao olketa word long firstfala languis bilong Bible showimaot saed long mining bilong diswan?

7 Holy spirit kamaot from Jehovah and nating savve finis. Hem paoa bilong God taem hem duim samting. Tru nao, long Genesis 1:2, Bible story abaotem diswan olsem “active force” bilong God. Datfala Hebrew and Greek word wea olketa transleitim “spirit” olketa transleitim long nara ples olsem “wind,” “brith,” and “strong wind.” Samfala dictionary sei hao olketa word hia long firstfala languis minim wanfala paoa wea man no savve lukim wea duim samting. Olsem wind, iumi no savve lukim spirit bilong God, bat iumi savve lukim olketa samting wea hem duim.

8. Olketa wanem toktok nao Bible iusim for storyim spirit bilong God, and why nao diswan hem fitim?

8 Holy spirit bilong God savve change long eni wei. Jehovah savve iusim for duim eni purpose bilong hem. Dastawe Bible hem sei spirit bilong God hem olsem “finger” bilong hem, “strongfala hand,” or “arm wea hem iusim.” (Luke 11:20; Deuteronomy 5:15; Psalm 8:3) Long sem wei wea wanfala man bae iusim hand bilong hem for duim planti difren waka witim strong or wei for isisi, God tu savve iusim spirit bilong hem for duim eni purpose—olsem for creatim barava smol atom or separatem  Red Sea or mekem olketa Christian long first century fit for story long difren languis.

9. Paoa bilong Jehovah for rul hem kasem wea and ovarem hu?

9 Jehovah showimaot paoa bilong hem tu thru long wei wea hem Sovereign Bilong Universe. Tingim sapos iu rul ovarem planti million pipol wea garem savve and wea willing for obeyim evriting wea iu talem. Jehovah hem garem paoa for rul olsem. Hem garem pipol long earth wea servem hem, wea samtaem Bible kolem wanfala army. (Psalm 68:11; 110:3) Bat, man hem wik nomoa sapos iumi markem witim angel. Tru nao, taem army bilong Assyria attakim pipol bilong God, wanfala angel nomoa killim dae 185,000 soldia insaed long wanfala naet! (2 Kings 19:35) Olketa angel bilong God garem “strongfala paoa.”—Psalm 103:19, 20.

10. (a) Why nao Olmaeti Wan garem nem, Jehovah bilong olketa army? (b) Hu nao garem paoa wea moa hae winim evri creation bilong Jehovah?

10 Haomas angel nao stap? Profet Daniel lukim wanfala vision long heven wea hem lukim winim 100 million angel front long throne bilong Jehovah, bat scripture hia no sei hem lukim evri angel wea Jehovah creatim. (Daniel 7:10) So maet planti handred million moa angel stap. Dastawe God garem nem, Jehovah bilong olketa army. Disfala title hem storyim barava haefala position bilong hem olsem Komanda bilong maeti army bilong olketa angel. Hem putim wanfala angel ovarem evriwan hia, Son wea hem lovem, “firstborn long evri creation.” (Colossians 1:15) From hem datfala archangel—chief ovarem evri angel, seraph, and cherub—Jesus nao garem paoa winim evri creation bilong Jehovah.

11, 12. (a) Long wanem wei nao toktok bilong God showimaot paoa? (b) Jesus sei paoa bilong Jehovah hem fit for duim wanem?

11 Jehovah garem nara wei moa for showimaot paoa. Hebrews 4:12 sei: “Word bilong God hem laef and garem paoa.” Waswe, iu luksavve long barava spesol paoa bilong toktok bilong God, or message wea kam from hem wea stap insaed Bible distaem? Datwan savve strongim iumi, buildimap faith bilong iumi, and helpem iumi for barava changem fasin bilong iumi.  Aposol Paul warnim olketa Christian againstim pipol wea join insaed barava dirty living. Then hem sei moa: “Hem nao wei bilong samfala long iufala bifor.” (1 Corinthians 6:9-11) Tru nao, paoa bilong “word bilong God” affectim olketa and helpem olketa for change.

12 Paoa bilong Jehovah hem big tumas and wei wea hem showimaot hem win evritaem, dastawe no eni samting savve stopem hem for iusim datfala paoa. Jesus sei: “Long God evri samting hem isi nomoa.” (Matthew 19:26) Jehovah iusim paoa bilong hem for duim wanem?

Paoa wea Followim Purpose

13, 14. (a) Why nao iumi fit for sei Jehovah hem no just samting wea paoa start kam from? (b) Hao nao Jehovah iusim paoa bilong hem?

13 Spirit bilong Jehovah hem samting wea winim eni physical paoa; and Jehovah no just olsem samting wea paoa start kam from. God hem wanfala really person wea kontrolem evribit paoa bilong hemseleva. So, wanem nao muvim hem for iusim datwan?

14 Olsem iumi bae lukim, God iusim paoa for create, distroe, protect, and mekem samting kam bak moa—or for duim eniting wea fitim olketa perfect purpose bilong hem. (Isaiah 46:10) Samfala taem Jehovah iusim paoa bilong hem for showimaot olketa important part long fasin bilong hem and olketa standard bilong hem. Winim evri samting, hem iusim paoa bilong hem for fulfillim will bilong hem—for vindicatem sovereign rul bilong hem and apim holy nem bilong hem thru long datfala Messiah Kingdom. No eni samting savve stopem datfala purpose.

15. Jehovah iusim paoa bilong hem for wanem purpose saed long olketa servant bilong hem, and hao nao diswan hem showaot long samting wea kasem Elijah?

15 Jehovah iusim paoa bilong hem tu for helpem iumi olketa man wanwan. Lukim samting wea 2 Chronicles 16:9 hem talem: “Eye bilong Jehovah muv raonem full earth for showim strong bilong hem for olketa wea givim full heart long hem.”  Wanfala example nao samting wea kasem Elijah wea iumi storyim long start bilong disfala chapter. Why nao Jehovah showimaot paoa bilong Hem long datfala spesol wei? Tingim hao wicked Queen Jezebel hem sei bae hem killim dae Elijah. Profet hia hem ranawe for laef bilong hem. Hem feel olsem hem stap seleva, hem feel fraet and wiki—from luk olsem hem hard waka nating nomoa. For givim comfort long hem, Jehovah showimaot klia long Elijah paoa bilong God. Wind, earthquake, and fire showim hao barava strongfala Person long universe hem long there witim Elijah. Waswe, hem shud fraetem Jezebel, taem olmaeti God stap long saed bilong hem?—1 Kings 19:1-12. *

16. Why nao iumi savve kasem comfort taem iumi tingim bigfala paoa bilong Jehovah?

16 Nomata distaem hem no taem bilong hem for duim olketa mirakol, Jehovah no change start kam from taem bilong Elijah. (1 Corinthians 13:8) Hem willing tumas distaem for iusim paoa bilong hem for saed bilong olketa wea lovem hem. Hem tru, hem stap long wanfala haefala spiritual ples, bat hem no farawe from iumi. Paoa bilong hem no garem spialaen so hem savve go long eni ples. Tru nao, “Jehovah hem stap klosap long olketa wea kolem hem.” (Psalm 145:18) Wantaem, taem profet Daniel hem askem Jehovah for help, hem no finis prea yet bat angel kam front long hem finis! (Daniel 9:20-23) No eniting savve stopem Jehovah from wei for helpem and strongim olketa wea hem lovem.—Psalm 118:6.

Waswe, Paoa Bilong God Mekem Hard for Iumi Go Long Hem?

17. Paoa bilong Jehovah mekem iumi fraet long wanem wei, bat wanem kaen wei for fraet nao iumi no garem?

17 Waswe, paoa bilong God shud mekem iumi fraetem hem? Ansa bilong iumi hem yes and no. Yes, bikos disfala fasin givim  iumi planti reason wea fit for mekem iumi fraet long God, datkaen wei for fraet witim respect wea iumi storyim lelebet long chapter bifor diswan. Bible sei disfala wei for fraet hem “start bilong wisdom.” (Psalm 111:10) Bat iumi ansa no tu, bikos paoa bilong God no mekem iumi garem nogud fraet long hem or mekem iumi hol bak for go long hem.

18. (a) Why nao planti pipol no trustim olketa wea garem paoa? (b) Hao nao iumi savve paoa wea Jehovah garem no savve spoelem hem?

18 “Paoa maet spoelem man; bat full paoa bae spoelem hem evribit.” Hem nao toktok bilong man from England for raetem history, Lord Acton long year 1887. Planti pipol talem datfala toktok staka taem bikos maet olketa lukim hem tru. History showimaot hao planti taem olketa man wea no perfect iusim paoa long rong wei. (Ecclesiastes 4:1; 8:9) From diswan, planti no trustim olketa wea garem paoa and stap klia from olketa. Jehovah hem garem full paoa. Waswe, datwan spoelem hem long eni wei? Nomoa nao! Olsem iumi lukim finis, hem holy, and no eniting savve spoelem hem. Jehovah hem barava difren from olketa man and woman wea no perfect and wea garem paoa long disfala nogud world. Hem nating iusim paoa bilong hem long rong wei and bae hem nating duim datwan long future.

19, 20. (a) Olketa wanem nara fasin nao Jehovah evritaem iusim witim paoa bilong hem, and why nao diswan comfortim iumi? (b) Hao nao maet iu explainim wei wea Jehovah kontrolem hemseleva, and why nao iu laekem tumas datwan?

19 Remember, paoa hem no only fasin bilong Jehovah. Bae iumi studyim tu justice, wisdom, and love bilong hem. Bat iumi mas no tingse Jehovah showimaot olketa fasin bilong hem long wei wea no showimaot feeling, olsem wanfala machine, long wei for just iusim wanfala fasin each taem nomoa. Long wei wea difren evribit, iumi bae lukim long olketa chapter wea kam bihaen hao Jehovah evritaem iusim paoa bilong hem long wei wea fitim justice, wisdom, and love. Tingim nara fasin wea God garem, wea no staka ruler long world garem—fasin for kontrolem seleva.

20 Tingim sapos iu meetim wanfala man wea big fogud and  garem staka paoa wea mekem iu feel wik tumas. Bat gogo iu lukim hem garem kaenfala fasin. Hem evritaem redy and willing for iusim paoa bilong hem for helpem and protectim pipol, especially olketa wea no garem eniting for protectim olketa seleva or isi tumas for pipol spoelem olketa. Hem no savve iusim strong bilong hem long rong wei. Iu lukim taem samfala tok laea againstim hem nomata olketa no garem eni reason for duim datwan, hem strong bat hem no kros, hem showimaot respect, and kaen tu. Iu start for ting, waswe, bae mi fit for showimaot sem kaen isisi wei, especially sapos mi strong olsem hem? Waswe, taem iu go ahed for savve gud long man olsem, bae iu start for feel moa klos long hem? Iumi garem planti reason moa for kam klos long olmaeti Jehovah. Tingim full sentence wea title bilong disfala chapter kam from: “Jehovah no savve kros kwiktaem and hem garem bigfala paoa.” (Nahum 1:3) Jehovah no kwiktaem for iusim paoa bilong hem againstim pipol, nomata wicked pipol tu. Hem garem kwaet fasin and hem kaen. Hem “no savve kros kwiktaem” nomata planti trae for mekem hem kros.—Psalm 78:37-41.

21. Why nao Jehovah no forcem pipol for duim will bilong hem, and wanem nao diswan teachim iumi abaotem hem?

21 Tingim nara wei for lukim hao Jehovah showimaot fasin for kontrolem seleva. Sapos iu garem barava bigfala paoa,  waswe, iu ting samfala taem iu maet laekem pipol for duim samting followim idea bilong iu? Nomata Jehovah garem barava bigfala paoa, hem no forcem pipol for servem hem. Nomata wei for servem God hem only wei for kasem laef olowe, Jehovah no forcem iumi for serve long wei olsem. Bat, hem showimaot respect long each wan taem hem givim olketa freedom for chus. Hem warnim olketa abaotem samting wea kamaot from wei for chusim nogud samting and olketa reward bilong wei for chus gud. Bat hem letem iumiseleva nao for chus. (Deuteronomy 30:19, 20) Jehovah barava no interest long man wea serve from samwan forcem hem or from hem barava fraetem bigfala paoa bilong hem. Hem luk aotem olketa wea willing for servem hem, from love nao muvim olketa.—2 Corinthians 9:7.

22, 23. (a) Wanem nao showimaot Jehovah hem hapi for givim paoa long nara pipol? (b) Wanem nao iumi bae studyim long next chapter?

22 Iumi lukim lastfala reason why iumi no need for fraetem Olmaeti God. Olketa man wea garem bigfala paoa planti taem fraet for sharem paoa witim nara pipol. Bat Jehovah hapi for givim paoa long olketa loyal worshiper bilong hem. Hem givim bigfala paoa long samfala, olsem Son bilong hem. (Matthew 28:18) Jehovah givim paoa long olketa servant bilong hem long nara wei tu. Bible explainim olsem: “Bilong iu nao, O Jehovah, hem wei for nambawan and maeti paoa and wei for luk naes tumas and bigfala honor and respect; from evri samting long heven and long earth hem bilong iu. . . . Insaed hand bilong iu hem paoa and strong, and hand bilong iu fit for mekem nambawan samting and givim strong long evriwan.”—1 Chronicles 29:11, 12.

23 Tru nao, Jehovah hem hapi for givim iu strong. Hem givim “paoa wea winim wanem iumi garem” long olketa wea want for servem hem. (2 Corinthians 4:7) Waswe, iu laek for klos long strongfala God olsem, wea iusim paoa bilong hem long olketa kaenfala wei wea followim hae standard? Long next chapter bae iumi lukim hao Jehovah iusim paoa bilong hem for create.

^ par. 6 Greek word wea olketa transleitim “Olmaeti” hem really minim “Rul Ovarem Evriwan; Datwan wea Garem Evri Paoa.”

^ par. 15 Bible sei “Jehovah hem no insaed datfala wind . . . , datfala earthquake . . . , datfala fire.” Olketa servant bilong Jehovah no luk for hem insaed paoa bilong nature, olsem pipol wea worshipim olketa nature god bilong kastom story. Hem hae tumas for stap insaed long eni samting wea hem creatim.—1 Kings 8:27.