Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Klos Long Jehovah

 CHAPTER 30

“Go Ahed for Wakabaot Long Love”

“Go Ahed for Wakabaot Long Love”

1-3. Wanem nao iumi kasem taem iumi followim example bilong Jehovah for showimaot love?

“MOA HAPI kamaot from wei for give winim wei for kasem.” (Acts 20:35) Olketa toktok bilong Jesus hia strongim disfala important tru samting: Love wea no selfish bae kasem reward. Nomata iumi kasem bigfala hapi taem iumi kasem love, iumi kasem hapi wea moa big taem iumi givim, or showim, love.

2 Dadi bilong iumi long heven savve long diswan winim eni narawan. Olsem iumi lukim long olketa chapter insaed disfala sekson, Jehovah hem showimaot example bilong love wea moa hae. No eniwan showimaot love long olketa wei wea moa big and for longtaem olsem hem. So waswe, iumi sapraes taem Bible kolem Jehovah “datfala hapi God”?—1 Timothy 1:11.

3 Loving God bilong iumi wantem iumi for trae for kamap olsem hem, especially saed long wei for showimaot love. Ephesians 5:1, 2 sei olsem long iumi: “Followim wei bilong God, olsem olketa pikinini wea hem lovem, and go ahed for wakabaot long love.” Taem iumi followim example bilong Jehovah for showimaot love, iumi kasem hapi wea moa big wea kamaot from wei for give. Iumi kasem wei for satisfae tu from iumi savve iumi mekem Jehovah hapi, bikos Word bilong hem encouragem iumi “for lovem each other.” (Romans 13:8) Bat planti nara reason stap why iumi shud “go ahed for wakabaot long love.”

Why Iumi Mas Garem Love

4, 5. Why nao hem important for iumi showimaot love wea sakrifaesim seleva long olketa nara brata and sista?

4 Why nao hem important for iumi showimaot love long olketa Christian brata and sista? For tok stret, love hem main part bilong tru Christian Wei. Sapos iumi no garem love, iumi kanduit fren long klos wei witim olketa nara Christian, and moa important, long eye bilong Jehovah bae iumi kamap iusles. Tingim hao Word bilong God talem klia olketa tru samting hia.

 5 Long lastfala naet bilong laef bilong hem olsem man, Jesus sei long olketa follower bilong hem: “Mi givim iufala wanfala niu komandment, for iufala mas lovem each other; olsem mi lovem iufala, iufala mas lovem each other tu. From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:34, 35) Tru nao, datfala toktok, “Olsem mi lovem iufala,” hem komand for iumi showimaot sem love wea Jesus showim. Long Chapter 29, iumi lanem hao Jesus showimaot nambawan example bilong love wea sakrifaesim seleva, long wei for putim need and interest bilong nara pipol firstaem long olketa bilong iumiseleva. Iumi tu mas showimaot love wea no selfish long wei wea hem showaot klia gogo nomata olketa aotsaed long Christian kongregeson bat luksavve tu. Tru nao, love wea sakrifaesim seleva for olketa brata hem nao mark wea mekem pipol luksavve long iumi olsem olketa trufala follower bilong Christ.

6, 7. (a) Hao nao iumi savve Word bilong Jehovah hem mekhae long wei wea hem important tumas for showimaot love? (b) Toktok bilong Paul wea stap long 1 Corinthians 13:4-8 storyim wanem abaotem love?

Waswe sapos iumi no showimaot love? Aposol Paul sei: “Sapos mi . . . no garem love, mi kamap olsem wanfala pis brass wea mek noise or wanfala cymbal wea man bangam.” (1 Corinthians 13:1) Wanfala cymbal wea man bangam hem mekem bigfala noise wea here nogud. Waswe wanfala pis brass wea mek noise? Olketa nara transleison sei “wanfala gong wea mek noise” or “gong wea mekem strongfala noise.” Olketa tokpiksa hia barava fitim! Man wea no garem love hem olsem wanfala instrument for pleim music wea mekem laodfala noise and man les for herem. Hao nao kaen man olsem savve enjoyim wei for fren klos witim nara pipol? Paul sei tu: “Sapos mi garem bigfala faith wea savve muvim maunten, bat mi no garem love, mi samting nating nomoa.” (1 Corinthians 13: 2) Tingim diswan, man wea no garem love hem “wanfala iusles man,” nomata hem duim planti nara samting! (The Amplified Bible) Tru tumas, Word bilong Jehovah mekhae long wei wea hem important tumas for showimaot love?

 7 Bat, hao nao iumi savve showimaot disfala fasin taem iumi deal witim nara pipol? For ansarem datwan, bae iumi lukluk long toktok bilong Paul wea stap long 1 Corinthians 13:4-8. Olketa verse hia no point go long love wea God garem for iumi or love bilong iumi for God. Bat, long hia Paul point go long hao iumi shud showimaot love long each other. Hem storyim olketa samting wea insaed long love and wanem no insaed long love.

Wanem Insaed Long Love

8. Hao nao long-safaring savve helpem iumi taem iumi deal witim nara pipol?

8 “Love hem long-safaring.” Long-safaring hem minim for patient witim each other. (Colossians 3:13) Waswe, iumi needim patient fasin olsem? From iumi evriwan wea servem Jehovah iumi no perfect, samfala taem olketa Christian brata bilong iumi maet mekem iumi feel kros and maet iumi tu duim sem samting long olketa. Bat patient fasin and fasin for bossim seleva  savve helpem iumi for deal witim olketa sismol wei for feel nogud wea kamap taem iumi deal witim nara pipol—and diswan no spoelem peace bilong kongregeson.

9. Wanem nao samfala difren kaen wei iumi savve showimaot kaenfala fasin long nara pipol?

9 “Love hem . . . kaen.” Kaenfala fasin showaot long wei for helpem nara pipol and thru long toktok wea tingim feeling bilong nara pipol. Love muvim iumi for luk aotem olketa wei for showimaot kaenfala fasin, diswan hem moa tru for olketa wea barava needim. Olsem example, wanfala olo brata or sista maet feel lonely and needim samwan for visitim hem. Wanfala singol mami or sista wea part long famili wea divaed saed long religion maet needim samfala help. Samwan wea sik or feisim problem maet need for herem olketa kaenfala toktok from wanfala loyal fren. (Proverbs 12:25; 17:17) Taem iumi duim samting firstaem for showimaot kaenfala fasin long olketa wei olsem, iumi showimaot wei wea love bilong iumi hem tru.—2 Corinthians 8:8.

10. Hao nao love helpem iumi for saportim and talem truth, nomata taem hem no isi for duim datwan?

10 “Love . . . hem hapi witim tru samting.” Narafala transleison sei: “Love . . . hapi for saed witim tru samting.” Love muvim iumi for saportim tru samting and for “talem tru samting long each other.” (Zechariah 8:16) Olsem example, sapos wanfala wea iumi lovem hem duim bigfala sin, love for Jehovah—and for datwan wea duim rong samting—bae helpem iumi for followim olketa standard bilong God and no trae for haedem, givim excuse, or laea abaotem datfala rong. Hem tru, maet hem hard for acceptim samting wea happen. Bat from iumi wantem best samting for datwan wea iumi lovem, bae iumi laekem hem for kasem and acceptim loving discipline bilong God. (Proverbs 3:11, 12) From iumi olketa loving Christian, iumi laekem tu for “duim evri samting long honest wei.”—Hebrews 13:18.

11. From love hem “karem evri samting,” wanem nao iumi shud traem best for duim saed long olketa wik point bilong olketa nara brata and sista?

11 “Love . . . karem evri samting.” Datfala toktok hem really minim “hem kavarem evriting.” (Kingdom Interlinear) Wan Peter 4:8 hem sei: “Love hem kavarem planti sin.” Tru nao, wanfala  Christian wea love bossim hem bae no laek for showimaot klia evri wik point bilong olketa Christian brata bilong hem. Planti taem, olketa mistek and rong bilong olketa brata smol nomoa and iumi savve kavarem witim love.—Proverbs 10:12; 17:9.

Love muvim iumi for showimaot iumi trustim olketa brata

12. Hao nao aposol Paul showimaot hem bilivim gud samting abaotem Philemon, and wanem nao iumi lanem from example bilong Paul?

12 “Love . . . bilivim evri samting.” Moffat’s transleison sei love hem “evritaem want for bilivim gud samting.” Iumi no ova tumas for no trustim olketa brata and sista, daotem evri samting wea muvim olketa. Lovem helpem iumi for “bilivim gud samting” abaotem olketa brata bilong iumi and for trustim olketa. * Lukim wanfala example long leta wea Paul raetem for Philemon. Paul hem raet for encouragem Philemon for welkamim Onesimus, slave bilong hem wea ranawe, wea kamap wanfala Christian. Hem no trae for forcem Philemon, bat Paul askem hem for duim saed long love. Hem showimaot hem sure Philemon bae duim stret samting, taem hem sei: “Mi sure iu bae duim diswan, mi raet long iu, from mi savve iu bae duim moa samting winim wanem mi talem.” (Verse 21) Taem love muvim iumi for showimaot iumi trustim olketa brata, iumi muvim olketa for duim best bilong olketa.

13. Hao nao iumi savve showimaot iumi hope for best samting for olketa brata bilong iumi?

13 “Love . . . hope long evri samting.” Long sem wei wea love mekem man garem trust, hem mekem man garem hope tu. From love nao muvim iumi, iumi hope for best samting for olketa brata bilong iumi. Olsem example, sapos wanfala brata “go rong lelebet taem hem no minim yet,” iumi hope hem bae followim olketa loving kaonsel wea hem kasem for helpem hem. (Galatians 6:1) Iumi hope tu olketa wea wik long faith bae kamap gud moa. Iumi patient witim olketa olsem, and duim samting for helpem olketa kamap strong long faith. (Romans 15:1; 1 Thessalonians 5:14) Nomata sapos wanfala wea iumi lovem hem go rong, iumi no givap hope hao wanday bae hem kasem  bak stretfala tingting and kam bak long Jehovah, olsem olabaot son long tokpiksa bilong Jesus.—Luke 15:17, 18.

14. Wanem nao olketa samting wea savve testim fasin bilong iumi for go ahed strong insaed long kongregeson, and hao nao love bae helpem iumi long diswan?

14 “Love . . . go ahed strong thru long evri samting.” Fasin for go ahed strong hem mekem iumi fit for stand strong nomata iumi feel wikdaon or feisim olketa hard samting. Olketa test wea man kasem saed long wei for go ahed strong no kam from olketa aotsaed long kongregeson nomoa. Samfala taem, iumi maet kasem test from olketa insaed kongregeson tu. From iumi evriwan no perfect, samfala taem olketa brata bilong iumi maet mekem iumi feel wikdaon. Lelebet toktok wea no tingim feeling maet mekem iumi feel nogud. (Proverbs 12:18) Maet samting long kongregeson no go ahed long wei wea iumi ting olketa shud duim. Fasin bilong wanfala brata wea evriwan respectim maet mekem iumi feel nogud, and mekem iumi ting, ‘Hao nao wanfala Christian fit for duim samting olsem?’ Taem iumi feisim kaen samting olsem, waswe, bae iumi no go ahed for kaban witim kongregeson and no go ahed for servem Jehovah? Sapos iumi garem love, bae iumi no duim datwan! Yes, love stopem iumi for letem olketa wik point bilong brata bilong iumi for mekem iumi blind gogo iumi no savve lukim eni gud samting long hem or long full kongregeson. Love mekem iumi fit for stap faithful long God and saportim kongregeson nomata wanem narawan wea no perfect talem or duim.—Psalm 119:165.

Wanem No Insaed Long Love

15. Wanem nao nogud jealous fasin, and hao nao love helpem iumi for stap klia long disfala feeling wea savve spoelem man?

15 “Love hem no jealous.” Nogud jealous fasin savve mekem iumi jealous long samting wea nara pipol garem—wanem olketa ownim, olketa privilege, or savve bilong olketa. Jealous fasin olsem hem feeling wea selfish and savve spoelem man sapos hem no kontrolem, and tu hem savve spoelem peace bilong kongregeson. Wanem nao bae helpem iumi for againstim “feeling for jealous”? (James 4:5) Ansa hem, love. Disfala spesol fasin savve  mekem iumi hapi long olketa wea garem gudfala samting long living wea iumi no garem. (Romans 12:15) Love helpem iumi for no feel olketa againstim iumi taem samwan kasem praise from bigfala savve wea hem garem or hem duim spesol samting.

16. Sapos iumi really lovem olketa brata bilong iumi, why nao iumi bae stap klia long wei for tokplas abaotem wanem iumi duim long service bilong Jehovah?

16 “Love . . . hem no tok praod, hem no bighed.” Love hem mekem iumi hol bak for mekhae long savve bilong iumi or olketa samting wea iumi duim. Sapos iumi really lovem olketa brata, waswe, bae iumi evritaem tok praod long olketa gud samting iumi duim long ministry or olketa privilege insaed long kongregeson? Kaen wei for tokplas olsem savve mekem narawan wikdaon, from olketa feel olketa no kasem level bilong iumi. Love no mekem iumi tok praod abaotem olketa privilege wea God givim iumi long service bilong hem. (1 Corinthians 3:5-9) And tu, love “hem no bighed,” or olsem The New Testament in Modern English talem, hem no “tinghae long olketa idea wea mekhae long seleva.” Love stopem iumi for garem hae tingting abaotem iumiseleva.—Romans 12:3.

17. Love muvim iumi for showim wanem kaen wei long pipol, and diswan bae mekem iumi stap klia long wanem kaen fasin?

17 “Love . . . hem no duim fasin wea no fitim.” Man wea duim samting wea no fitim hem duim samting mekem narawan feel nogud or shame. Kaen wei olsem minim hem no garem love, bikos hem barava no tingim feeling and gud samting for nara pipol. Long difren wei, man wea garem love showimaot kaenfala wei for tingim nara pipol. Love encouragem man for garem gud wei, fasin wea God appruvim, and respect for olketa Christian brata. So, love bae no letem iumi for duim “fasin wea bringim shame”—tru nao, eni fasin wea bae mekem olketa Christian brata bilong iumi seke or feel nogud.—Ephesians 5:3, 4.

18. Why nao wanfala loving person hem no demandim evriting for mas followim tingting bilong hem nomoa?

18 “Love . . . hem no luk aotem samting for hemseleva nomoa.” The Revised Standard Version hem transleitim diswan long wei olsem: “Love hem no strong for followim wei bilong hemseleva.”  Wanfala person wea garem love no demandim evriting for mas followim samting wea hem wantem, for tingse tingting bilong hem nao evritaem stret. Hem no mekius long nara pipol, and iusim swit toktok for mekem olketa wea garem difren tingting for followim hem. Kaen bighed fasin olsem hem showimaot man hem praod, and Bible sei: “Praod fasin hem kam bifor man foldaon.” (Proverbs 16:18) Sapos iumi really lovem olketa brata bilong iumi, bae iumi respectim tingting bilong olketa, and long taem wea fitim, iumi willing for mekwe. Fasin for mekwe hem followim disfala toktok bilong Paul: “Letem man go ahed for luk aotem, no gudfala samting for hemseleva, bat for narafala man.”—1 Corinthians 10:24.

19. Hao nao love helpem iumi taem narawan mekem iumi feel nogud?

19 “Love . . . hem no savve kros . . . , hem no keepim record bilong rong wea samwan duim.” Love hem no kwiktaem for feel kros from samting wea narawan talem or duim. Hem tru, hem normal for feel nogud taem samwan tok spoelem iumi. Bat nomata sapos iumi garem stretfala reason for kros, love no letem iumi for go ahed for feel kros. (Ephesians 4:26, 27) Iumi no keepim record bilong toktok or akson wea man duim for spoelem iumi, olsem for raetem insaed long wanfala buk mekem iumi no forgetim. Nomoa, bat love muvim iumi for followim loving God bilong iumi. Olsem iumi lukim long Chapter 26, Jehovah forgivim man taem stretfala reason stap for hem duim datwan. Taem hem forgive, hem forgetim tu, wea minim hem no keepim olketa sin hia for iusim for judgem iumi long future. Waswe, iumi tinghae tumas long wei wea Jehovah no keepim record bilong rong wea samwan duim?

20. Hao nao iumi shud feel sapos wanfala brata or sista hem foldaon long trap for duim rong samting and kasem nogud samting from datwan?

20 “Love . . . no hapi long samting wea no raeteous.” Transleison bilong The New English Bible sei olsem: “Love . . . hem no feel hem win taem nara man hem sin.” Transleison bilong Moffat sei: “Love hem nating savve hapi taem nara pipol duim rong samting.” Love hem no hapi long fasin wea no raeteous, so iumi no ting smol long eni dirty fasin. Hao nao iumi feel taem wanfala brata or sista hem foldaon long trap bilong sin and kasem  nogud samting from datwan? Love no mekem iumi hapi long datwan, olsem for sei ‘Feelim! Iu faendem ansa nao!’ (Proverbs 17:5) Bat, iumi hapi taem wanfala brata wea rong hem duim samting for stretem spiritual wei wea hem foldaon.

“Wanfala Best Wei”

21-23. (a) Wanem nao Paul minim taem hem sei “love nating savve fail”? (b) Wanem nao bae iumi storyim long last chapter?

21 “Love nating savve fail.” Wanem nao Paul minim from toktok hia? Olsem olketa verse raonem showimaot, hem story abaotem olketa present bilong spirit wea olketa Christian bifor garem. Olketa present hia kamap olsem saen hao God appruvim datfala niu kongregeson. Bat no evri Christian savve duim healing, talem profesi, or story long difren languis. Bat datwan no important bikos olketa mirakol present hia bae finis. Wanfala samting  bae no finis, samting wea evri Christian savve mekem grow. Hem moa important and moa strong winim eni mirakol present. Tru nao, Paul kolem datwan “wanfala best wei.” (1 Corinthians 12:31) Wanem nao “best wei” hia? Hem wei bilong love.

Mark bilong pipol bilong Jehovah hem love wea olketa garem for each other

22 Tru nao, Christian love wea Paul story abaotem hem “nating savve fail,” wea minim hem no savve finis. Kam kasem distaem, love wea muvim olketa brata for sakrifaesim seleva hem mark bilong olketa tru follower bilong Jesus. Waswe, iu lukim pruv bilong love olsem insaed long olketa kongregeson bilong pipol wea worshipim Jehovah evriwea long world? Datfala love bae stap for olowe, bikos Jehovah promisim laef olowe for olketa faithful servant bilong hem. (Psalm 37:9-11, 29) Iumi want for olowe duim best bilong iumi for “go ahed for wakabaot long love.” Taem iumi duim olsem, iumi savve kasem datfala big hapi wea kamaot from wei for give. Winim datwan, iumi savve go ahed for laef—tru nao, go ahed for showimaot love—for olowe long wei wea followim loving God bilong iumi, Jehovah.

23 Long disfala chapter wea finisim sekson wea story abaotem love, iumi storyim hao iumi savve showimaot love long each other. Bat from planti wei wea iumi kasem gud samting from love bilong Jehovah—and tu from paoa, justice, and wisdom bilong hem—hem gud for iumi ask, ‘Hao nao mi savve showim Jehovah mi really lovem hem?’ Bae iumi storyim ansa bilong datfala kwestin long lastfala chapter.

^ par. 12 Hem no minim hem isi for giamanim man wea garem Christian love. Bible encouragem iumi olsem: “Luk aot long olketa wea mekem iufala divaed and stambol . . . , and stap klia long olketa.”—Romans 16:17.