Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Bak Long Jehovah

 PART 1

“Mi Bae Lukaotem Sheepsheep wea Lus”

“Mi Bae Lukaotem Sheepsheep wea Lus”

Wanfala sheepsheep gohed kaikaim grass. Seknomoa hem no savve lukim olketa nara sheepsheep and man wea lukaftarem olketa. Hem stap seleva nao. Hem gogo for naet tu and hem lus long valley wea olketa wild animal raraon, and no eniwan stap for protectim hem. Hem barava fraet nao. Gogo, hem herem man wea lukaftarem hem singaot kam. Datfala man ran kam long hem, pasolem hem witim kaleko bilong hem, and karem hem go bak.

STAKA taem Jehovah sei hem olsem man wea lukaftarem sheepsheep. Hem promisim iumi: “Mi nao bae lukaotem sheepsheep bilong mi and lukaftarem olketa.”—Ezekiel 34:11, 12.

“Olketa Sheepsheep wea Mi Lukaftarem”

Hu nao olketa sheepsheep bilong Jehovah? Olketa hia nao hem pipol wea lovem and worshipim hem. Bible hem sei: “Iumi baodaon and worshipim hem. Iumi nildaon front long Jehovah wea wakem iumi. Hem nao God bilong iumi, and iumi pipol bilong hem. Hem lukaftarem iumi olsem olketa sheepsheep wea stap long ples wea garem staka grass.” (Psalm 95:6, 7) Olsem olketa sheepsheep wea followim man wea lukaftarem olketa, pipol bilong Jehovah laekem tumas for followim Hem. Waswe, olketa duim stret samting evritaem? Nomoa. Samfala taem olketa olsem “olketa sheepsheep wea no stap tugeta,” “olketa sheepsheep wea lus,” and “olketa sheepsheep  wea go difren.” (Ezekiel 34:12; Matthew 15:24; 1 Peter 2:25) Nomata olsem, taem samwan hem go difren, Jehovah no tingse hem hard tumas for hem kam bak.

Waswe, iu tingse Jehovah hem tingim iu yet? Wanem nao Jehovah duim distaem wea showimaot hem man wea lukaftarem sheepsheep bilong hem? Tingim thrifala samting hia:

Hem feedim iumi long spiritual wei. Jehovah hem sei: “Bae mi feedim olketa long ples wea garem staka grass. . . . Long there nao olketa bae leidaon and kaikaim gudfala grass.” (Ezekiel 34:14) Jehovah hem evritaem givim iumi staka spiritual kaikai long barava taem. Waswe, iu tingim eni article, tok, or video wea olsem ansa for prea bilong iu, and wea mekem iu luksavve Jehovah hem barava tingim iu?

Hem protectim and sapotim iumi. Jehovah hem sei: “Mi bae tekem kam bak sheepsheep wea go difren, bandagem sheepsheep wea garekil, and bae mi strongim sheepsheep wea wik.” (Ezekiel 34:16) Jehovah strongim olketa wea wikdaon from olketa kasem hard taem. Nomata maet samwan or nara Christian nao mekem wanfala sheepsheep feel nogud, Jehovah bae bandagem hem and helpem hem for kamap gud moa. Hem tekem kam bak tu olketa wea go difren and olketa wea ting daonem olketa seleva.

Hem evritaem tingim iumi. Jehovah hem sei: “Mi bae go long olketa ples wea olketa sheepsheep ranawe long hem and tekem olketa kam bak. . . . Mi bae lukaotem sheepsheep wea lus.” (Ezekiel 34:12, 16) Taem wanfala sheepsheep hem lus, Jehovah no tingse hem hard tumas for hem kam bak. Hem savve taem wanfala sheepsheep hem lus, hem lukaotem hem, and hem barava hapi taem hem faendem hem. (Matthew 18:12-14) Hem kolem pipol wea worshipim hem “sheepsheep bilong mi” and “olketa sheepsheep wea mi lukaftarem.” (Ezekiel 34:31) Iu nao wanfala long olketa sheepsheep hia.

Taem wanfala sheepsheep hem lus, Jehovah no tingse hem hard tumas for hem kam bak. Taem hem kam bak, Jehovah barava hapi

“Mekem Laef Bilong Mifala Olsem Bifor”

Why nao Jehovah lukaotem iu and invaetem iu for kam bak long hem? Bikos hem laekem iu for hapi. Hem promis olketa sheepsheep bilong hem bae kasem olketa blessing wea “staka tumas olsem bigfala rain.” (Ezekiel 34:26) Iu savve trustim datfala promis bikos iuseleva kasem finis olketa blessing hia.

Ting go bak long taem iu lane abaotem Jehovah. Olsem example, tingim feeling wea iu garem taem iu lanem tru samting abaotem nem bilong God and plan bilong hem for olketa man. Tingim hapi wea iu kasem taem iu associate witim olketa brata and sista long olketa assembly and convention. And waswe, iu rememberim wei wea iu hapi tumas bihaen iu storyim gud nius long samwan wea barava interest?

Iu savve hapi moa olsem bifor. Pipol wea worshipim God bifor prea olsem: “Jehovah, plis tekem mifala kam bak long iu, and mifala bae willing for kam bak long iu. Mekem laef bilong mifala olsem bifor.” (Lamentations 5:21) Jehovah ansarem datfala prea, and pipol bilong hem kam bak long hem and hapi moa for worshipim hem. (Nehemiah 8:17) Jehovah bae duim sem samting for iu tu.