Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Bak Long Jehovah

 PART 5

Kam Bak Long ‘Man wea Lukaftarem and Protectim Laef Bilong Iu’

Kam Bak Long ‘Man wea Lukaftarem and Protectim Laef Bilong Iu’

Waswe, olketa samting wea iumi storyim long disfala brochure hem kasem iu tu? Sapos olsem, hem no iuseleva nomoa. Plande pipol wea faithful for worshipim God bifor and distaem tu kasem olketa sem samting. Jehovah helpem olketa for winim olketa samting hia, and hem bae helpem iu tu.

Jehovah hem stanbae for helpem iu taem iu kam bak long hem

 JEHOVAH hem stanbae for helpem iu taem iu kam bak long hem. Hem bae helpem iu for lusim wei for feel nogud and for deal witim olketa samting wea mekem iu wari. Hem bae helpem iu tu for garem gudfala konsens wea bae mekem iu hapi moa. Maet datwan mekem iu laek for worshipim Jehovah moa witim olketa nara brata and sista. Bae iu olsem samfala Christian long first century wea aposol Peter raet go long olketa and sei: “Iufala olsem olketa sheepsheep wea go difren, bat distaem iufala kam bak long datfala man wea lukaftarem olketa sheepsheep and wea hem protectim laef bilong iufala.”—1 Peter 2:25.

Best samting wea iu savve duim nao hem for kam bak long Jehovah. Why nao olsem? Bae iu mekem Jehovah hapi tumas. (Proverbs 27:11) Jehovah garem feeling, so samting wea iu duim savve affectim hem. Bat Jehovah no forcem iumi for lovem and worshipim hem. (Deuteronomy 30:19, 20) Taem iumi worshipim Jehovah from iumi lovem hem iumi mekem hem barava hapi. No eni nara samting savve mekem iumi hapi olsem wei for worshipim Jehovah, and hem barava fitim for iumi worshipim hem.—Acts 20:35; Revelation 4:11.

And tu, taem iu start for worshipim Jehovah moa, bae iu no hangre long spiritual wei. (Matthew 5:3) Pipol long world laek for savve long ansa for kaen kwestin olsem, ‘Wanem nao God laekem iumi for duim?’ Pipol laek for savve long kaen samting olsem bikos hem nao hao God wakem iumi. Hem savve iumi bae hapi taem iumi worshipim hem bikos hem wakem iumi for olsem, and hem savve iumi bae barava hapi sapos iumi duim datwan from iumi lovem hem.—Psalm 63:1-5.

Plis no forget, Jehovah laekem iu for kam bak long hem. Tingim diswan: Mifala prea long Jehovah for helpem mifala redyim gud disfala brochure. And tu, iu kasem disfala brochure, maet bikos wanfala elder or nara brata or sista nao givim long iu. Then iu willing for readim and duim samting wea showimaot iu tinghae long samting wea disfala brochure storyim. Evri samting hia pruvim Jehovah no forgetim iu, bat hem isisi leadim iu kam bak long hem.—John 6:44.

Iumi hapi for savve Jehovah no forgetim pipol bilong hem wea go difren. Wanfala sista wea nem bilong hem Donna luksavve long diswan. Hem sei: “Mi isisi lusim truth, bat staka taem mi ting raonem Psalm 139:23, 24, wea sei: ‘Plis God, lukluk gud long mi and savve long heart bilong mi. Lukluk gud long mi and savve long olketa samting wea mi wari abaotem, and lukim sapos mi garem eni nogud wei. Plis iu leadim mi mekem mi kasem laef olowe.’ Mi savve mi difren from pipol long world, and mi savve mi shud go bak long organization bilong Jehovah. Mi start for luksavve Jehovah no lusim mi, bat mi nao mi mas kam bak long hem. And mi barava hapi mi duim datwan!”

“Mi start for luksavve Jehovah no lusim mi, bat mi nao mi mas kam bak long hem”

Mifala prea iu tu bae kasem moa datfala hapi wea man kasem taem hem worshipim Jehovah. (Nehemiah 8:10) Iu bae nating sorre sapos iu kam bak long Jehovah.