Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Kam Bak Long Jehovah

Leta From Governing Body

Leta From Governing Body

Dear brata or sista:

Olsem iu savve finis, staka taem Bible storyim pipol and plande long olketa hem olketa faithful man and woman wea kasem hard taem olsem iumi. Olketa “garem sem feeling olsem iumi.” (James 5:17, footnote) Samfala wikdaon bikos olketa kasem hard taem and wari. Olketa narawan barava feel nogud bikos long samting wea samwan long famili, or narawan wea worshipim Jehovah, olketa duim. Samfala moa gohed for guilty long samting wea olketa seleva duim wea no stret.

Waswe, olketa hia barava lusim Jehovah nao? Nomoa. Plande long olketa olsem man wea raetem psalm wea sei: “Mi go difren olsem wanfala sheepsheep wea lus. Plis lukaotem wakaman bilong iu bikos mi no forgetim olketa law bilong iu.” (Psalm 119:176) Waswe, iu feel olsem tu?

Jehovah no forgetim olketa wea worshipim hem wea go difren. Hem laekem tumas for helpem olketa, and plande taem hem iusim olketa faithful wakaman bilong hem for duim datwan. Olsem example, tingim wanem Jehovah duim for helpem wakaman bilong hem Job. Job kasem staka hard taem. Hem kasem bigfala problem saed long selen, olketa pikinini bilong hem dae, and hem kasem bigfala sik. Olketa fren wea shud sapotim hem tok spoelem hem tu. For lelebet taem tingting bilong Job no stret. Nomata olsem, datwan no minim hem lusim Jehovah. (Job 1:22; 2:10) Wanem nao Jehovah duim for helpem Job kasem bak stretfala tingting?

Jehovah iusim wakaman bilong hem Elihu for helpem Job. Taem Job talemaot tingting bilong hem, Elihu hem lisin and hem laek for story long Job. Wanem nao bae hem talem? Waswe, bae hem tok spoelem Job or trae for changem tingting bilong Job long wei for mekem hem feel guilty or shame? Waswe, Elihu tingse hem gud winim Job? Barava nomoa nao! From God givim holy spirit long Elihu, hem sei: “Long tingting bilong God, mi olsem iu nomoa. God wakem mi tu long clay. Iu mas no fraetem mi. Toktok bilong mi bae no spoelem iu.” (Job 33:6, 7) Elihu no mekem hem hard moa for Job, bat hem encouragem hem and long kaenfala wei hem givim kaonsel wea Job needim.

Mifala laekem iu for savve mifala garem sem tingting taem mifala redyim disfala brochure. Firstaem mifala lisin gud long story bilong samfala wea go difren and ting raonem gud wanem olketa talem and samting wea happen long olketa. (Proverbs 18:13) Then mifala lukluk gud long olketa story long Bible abaotem wanem Jehovah duim for helpem pipol bilong hem long bifor wea kasem sem samting. Gogo, mifala iusim example bilong olketa hia witim experience bilong samfala distaem for wakem disfala brochure. Mifala laekem iu for readim gud disfala brochure, and for iu savve mifala barava lovem iu.

Governing Body Bilong Olketa Jehovah’s Witness