Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 16

Jesus Strong for Worshipim God

Jesus Strong for Worshipim God

JOHN 2:12-22

  • JESUS KLINIM TEMPLE

Bihaen datfala marit feast long Cana, Jesus go long Capernaum. Mami bilong hem and olketa haf brata bilong hem go witim hem. Olketa haf brata bilong hem nao James, Joseph, Simon, and Judas.

Why nao Jesus go long Capernaum? Hem wanfala main taon wea pipol savve kam long hem and hem big winim Nazareth and Cana. And tu, staka disaepol bilong Jesus stap long Capernaum and long olketa nara taon wea klosap. So Jesus savve trainim olketa long hom bilong olketa.

Taem Jesus stap long Capernaum, hem duim tu olketa mirakol. So plande pipol long datfala taon and long olketa nara ples klosap herem nius abaotem olketa samting wea hem duim. Bat from Jesus and olketa disaepol bilong hem olketa faithful Jew, klosap nao olketa mas go long Jerusalem for Pasova long 30 C.E.

Taem olketa disaepol bilong Jesus stap long temple, olketa lukim Jesus duim samting wea olketa nating lukim hem duim bifor.

Law bilong God sei olketa Israelite mas go long temple for givim olketa sakrifaes, and taem olketa kam for duim datwan olketa needim kaikai tu. So Law hem sei olketa wea stap farawe from Jerusalem savve tekem kam selen for peim “olketa buluka, sheepsheep, goat,” and eni nara samting wea olketa needim taem olketa stap long Jerusalem. (Deuteronomy 14:24-26) From datwan, olketa bisnisman long Jerusalem savve salem olketa animal and bird insaed long temple. And samfala ravem pipol tu.

Jesus barava kros tumas long diswan, so hem kapsaetem selen and tebol bilong olketa wea changem olketa difren selen, and raosem olketa man hia. Then hem sei: “Tekem go olketa samting hia from disfala ples! Haos bilong Dadi bilong mi hem no haos for iufala market insaed!”—John 2:16.

Taem olketa disaepol lukim diswan, olketa tingim datfala profesi abaotem Son bilong God wea sei: “Mi laekem tumas haos bilong iu and mi tingim evritaem.” Bat olketa Jew sei long hem: “Showim wanfala saen long mifala for pruvim iu garem raet for duim olketa samting hia.” Jesus sei long olketa: “Aotem disfala temple and mi bae wakem bak insaed thrifala day.”—John 2:17-19; Psalm 69:9.

Olketa Jew tingse Jesus storyim temple long Jerusalem, so olketa sei: “Olketa wakem disfala temple for foti-six year finis. Hao nao iu sei bae iu wakem bak insaed thrifala day nomoa?” (John 2:20) Bat taem Jesus sei temple, hem minim body bilong hem. Thrifala year bihaen, taem Jesus hem laef bak olketa disaepol tingim datfala toktok bilong hem.