Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 12

Jesus Hem Baptaes

Jesus Hem Baptaes

MATTHEW 3:13-17 MARK 1:9-11 LUKE 3:21, 22 JOHN 1:32-34

  • JESUS HEM BAPTAES AND KASEM HOLY SPIRIT

  • JEHOVAH SEI JESUS HEM SON BILONG HEM

Samting olsem sixfala month bihaen John Baptaesa hem start for preach, Jesus kam long John long Jordan River. Long datfala taem Jesus hem samting olsem 30 year. Jesus no kam for visitim John nomoa, or for lukim hao nao waka bilong hem gohed, bat hem kam for askem John for baptaesim hem.

John trae for stopem hem and sei: “Waswe, iu kam long mi for baptaesim iu? Mi nao iu shud baptaesim mi.” (Matthew 3:14) John savve finis Jesus hem spesol Son bilong God. Taem Mary hem babule and hem visitim Elizabeth, wea hem mami bilong John, John wea hem insaed bele bilong mami bilong hem, “jamp nao.” Masbi mami bilong John storyim diswan long hem. And bae hem savve tu abaotem taem wea angel Gabriel talem Mary hem bae bornem Jesus, and abaotem olketa angel wea kam long olketa man wea lukaftarem sheepsheep long naet wea Jesus hem born.

John luksavve hem baptaesim pipol wea repent from sin bilong olketa, bat Jesus no sin. Nomata John trae for stopem hem, Jesus sei: “No stopem diswan, mekem iumi savve duim evri samting wea God hem laekem.”—Matthew 3:15.

Why nao hem fitim for Jesus baptaes? Jesus no baptaes for showimaot hem repent, bat hem baptaes for showimaot hem redi for duim wanem Dadi bilong hem laekem. (Hebrew 10:5-7) Jesus hem wanfala carpenter, bat hem kasem taem nao for hem startim ministry wea Dadi bilong hem long heven sendem hem kam long earth for duim. Waswe, John tingse eni spesol samting bae happen taem hem baptaesim Jesus?

Bihaen, John hem sei: “God wea sendem mi for baptaesim pipol long wata hem sei long mi, ‘Man wea iu lukim spirit kam daon and stap long hem, hem nao man wea baptaesim pipol long holy spirit.’” (John 1:33) So John savve finis bae hem lukim spirit bilong God kam daon long samwan wea hem baptaesim. So taem Jesus kamaot from wata, maet John no sapraes taem hem lukim “spirit bilong God wea olsem wanfala kurukuru kam daon antap long Jesus.”—Matthew 3:16.

Nara spesol samting hem happen tu taem Jesus hem baptaes. Bible hem sei: “Skae hem open” for hem. Luk olsem diswan minim taem Jesus baptaes, hem rememberim laef bilong hem long heven bifor olsem wanfala spirit son bilong Jehovah. Hem rememberim tu olketa tru samting wea hem lanem from God bifor hem kam daon long earth.

And tu, taem Jesus hem baptaes, wanfala toktok from skae hem sei: “Diswan nao Son bilong mi wea mi lovem and wea mi hapi long hem.” (Matthew 3:17) Jesus standap long there witim John, so hem no Jesus nao wea toktok kam. God nao toktok kam. Hem klia, Jesus hem Son bilong God. Hem no God.

Taem Jesus stap long earth, hem wanfala son bilong God olsem firstfala man, Adam. Bihaen disaepol Luke storyim taem wea Jesus baptaes, hem sei: “Taem Jesus hem thirti year, hem startim waka bilong hem. Long tingting bilong pipol, hem son bilong Joseph, . . . son bilong Heli, . . . son bilong David, . . . son bilong Abraham, . . . son bilong Noah, . . . son bilong Adam, . . . Son bilong God.”—Luke 3:23-38.

Olsem Adam, Jesus hem wanfala “son bilong God.” Taem Jesus hem baptaes, hem luksavve hem bae kamap wanfala spirit Son bilong God long heven. So Jesus fit for teachim pipol truth from God and wanem olketa mas duim for kasem laef. Gogo, Jesus bae givim laef bilong hem olsem wanfala sakrifaes for olketa man wea sin.