Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 75

Jesus Storyim Wanem Nao Mekem Man Barava Hapi

Jesus Storyim Wanem Nao Mekem Man Barava Hapi

LUKE 11:14-36

  • JESUS IUSIM “HOLY SPIRIT BILONG GOD” FOR RAOSEM OLKETA DEMON

  • SAMTING WEA MEKEM MAN BARAVA HAPI

Jesus talem moa olketa main point abaotem wei for prea. Bat taem hem duim ministry bilong hem, samfala nara subject tu hem storyim winim wanfala taem. Taem hem duim olketa mirakol long Galilee, olketa Pharisee laea for sei Jesus iusim paoa bilong Satan for duim datwan. Distaem long Judea, samfala pipol talem sem samting.

Taem Jesus raosem demon wea mekem wanfala man no savve toktok, olketa pipol barava sapraes. Bat samfala wea againstim hem talem sem laea toktok wea olketa Pharisee talem bifor. Olketa sei: “Beelzebub, wea hem boss bilong olketa demon, hem nao givim paoa long man hia for raosem olketa demon from pipol.” (Luke 11:15) Olketa narawan laekem Jesus for showim wanfala saen from God for pruvim hu nao hem.

From Jesus luksavve olketa laek testim hem, hem talem sem samting wea hem talem long olketa Pharisee long Galilee. Hem sei sapos pipol long wanfala kantri faet againstim olketa seleva bae datfala kantri hem nogud nao. Hem sei moa: “Sapos Satan hem againstim hemseleva, rul bilong hem bae finis nao.” Then Jesus talem stret long olketa: “Sapos mi iusim finger bilong God for raosem olketa demon, datwan minim Kingdom bilong God hem stap bat iufala no luksavve.”—Luke 11:18-20, footnote.

Taem Jesus storyim “finger bilong God” datwan shud mekem olketa ting bak long samting wea happen long Israel bifor. Olketa bigman bilong Pharaoh wea lukim Moses duim mirakol, sei: “Finger bilong God nao ia!” God iusim finger bilong hem tu for raetem Ten Komandment long tufala ston. (Exodus 8:19; 31:18) “Finger bilong God,” wea hem nao holy spirit bilong Hem, givim paoa long Jesus for raosem olketa demon and healim pipol wea sik. Wei wea Jesus duim olketa mirakol hia showimaot Kingdom bilong God hem stap, bikos Jesus nao bae King bilong hem, bat olketa wea againstim hem no luksavve long datwan.

From Jesus savve raosem olketa demon, datwan pruvim hem strong winim Satan. Jesus talem moa datfala tokpiksa abaotem demon wea go aot from wanfala man. Sapos datfala man no duim olketa gudfala samting, bae datfala demon kam bak and tekem kam sevenfala demon moa wea bae mekem man hia barava nogud winim taem wea datfala first demon stap long hem. (Matthew 12:22, 25-29, 43-45) Diswan nao samting wea happen long nation bilong Israel.

Wanfala woman wea herem samting wea Jesus talem, hem singaot olsem: “Woman wea bornem iu and susum iu nao hem hapi!” Olketa woman long Israel laekem tumas for bornem pikinini wea bae kamap profet or maet datfala Messiah. So maet disfala woman tingse Mary shud barava hapi bikos hem mami bilong disfala man wea savve tumas for teach. Bat Jesus stretem tingting bilong woman hia and sei: “Nomoa ia, olketa wea herem toktok bilong God and obeyim datwan nao olketa hapi!” (Luke 11:27, 28) No enitaem Jesus sei pipol shud mekhae long Mary. Wei for faithful long God nao savve mekem man or woman barava hapi, and no bikos long famili wea hem kam from or bikos hem duim spesol samting.

Jesus tok strong long olketa hia wea ask for wanfala saen from God, olsem hem duim long Galilee tu. Hem sei saen wea olketa bae kasem nomoa, hem “datfala mirakol wea happen long Jonah.” From Jonah stap insaed bele bilong wanfala fish for thrifala day, and hem strong for preach, datwan nao saen wea mekem pipol bilong Nineveh repent. Jesus sei: “Bat samwan wea important winim Jonah nao hem stap.” (Luke 11:29-32) Jesus hem important winim Solomon tu, wea queen bilong Sheba kam for herem wise toktok bilong hem.

Jesus sei tu: “Taem man laetem wanfala laet hem no haedem datwan or putim andanit long wanfala basket, bat hem putim long ples wea pipol savve lukim.” (Luke 11:33) Maet diswan minim wei for teachim and duim mirakol front long pipol hia hem olsem man hem laetem wanfala laet and then haedem nomoa. From olketa no garem spiritual tingting, olketa no minim why hem teachim pipol and duim olketa mirakol.

Jesus raosem demon from wanfala man and mekem man hia savve toktok. Datwan shud mekem pipol praisem God and story long nara pipol abaotem olketa nambawan samting wea Jehovah duim. So Jesus warnim olketa wea tok againstim hem. Hem sei: “Iu mas lukluk gud. Nogud datfala laet long body bilong iu hem dark nomoa. Dastawe, sapos full body bilong iu hem garem laet and no eni part hem dark, hem bae olsem wanfala laet wea shaen kam.”—Luke 11:35, 36.