Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 34

Jesus Chusim Twelvfala Aposol

Jesus Chusim Twelvfala Aposol

MARK 3:13-19 LUKE 6:12-16

  • TWELVFALA APOSOL

Hem samting olsem wan and haf year finis from taem wea John Baptaesa sei Jesus hem datfala Pikinini Sheepsheep bilong God. Taem Jesus startim ministry bilong hem, samfala faithful man kamap olketa disaepol bilong hem, olsem Andrew, Simon Peter, John, maet James (wea hem brata bilong John), Philip, and Bartholomew (wea nara nem bilong hem Nathanael). Gogo, staka moa kamap disaepol bilong Christ.—John 1:45-47.

Distaem Jesus hem redi for chusim olketa aposol bilong hem. Olketa hia bae waka tugeta witim hem and kasem spesol training. Bat bifor Jesus chusim olketa, hem go long wanfala maunten, maet klosap long Sea long Galilee wea no farawe from Capernaum. Hem prea long God for full naet. Masbi hem askem God for wisdom and blessing bilong hem. Long morning, hem talem olketa disaepol for kam long hem and chusim 12-fala long olketa and kolem olketa hia, olketa aposol.

Jesus chusim sixfala wea iumi storyim finis, witim Matthew wea Jesus meetim hem long office for peim tax, and Judas (wea hem “son bilong James” and wea nara nem bilong hem Thaddaeus). Nara fofala wea hem chusim hem Simon, wea hem nao man wea garem strong tingting for duim samting, James, wea hem son bilong Alphaeus, Thomas, and Judas Iscariot.—Matthew 10:2-4; Luke 6:16.

Jesus savve gud long 12-fala hia bikos olketa gogo witim hem taem hem duim ministry. Samfala hem olketa relative bilong hem. Luk olsem, James and John tufala first kasin bilong Jesus. Samfala tingse Alphaeus hem brata bilong Joseph, wea hem dadi bilong Jesus. Sapos olsem, aposol James, wea hem son bilong Alphaeus, hem kasin bilong Jesus.

Hem isi nomoa for Jesus rememberim nem bilong olketa aposol. Bat waswe long iu? For iu rememberim olketa, tingim: Tufala Simon, tufala James, and tufala Judas. Brata bilong Simon (Peter) hem Andrew, and brata bilong James (son bilong Zebedee) hem John. Hem nao nem bilong eitfala aposol. Nara fofala hem man for tekem tax (Matthew), wanfala wea daotem Jesus (Thomas), man wea Jesus lukim andanit long tree (Nathanael), and fren bilong Nathanael (Philip).

Elevenfala aposol kam from olketa taon long Galilee, wea hem hom bilong Jesus. Hom bilong Nathanael hem Cana. Hom bilong Philip, Peter, and Andrew hem Bethsaida. Gogo, Peter and Andrew muv go long Capernaum, wea hem hom bilong Matthew. James and John tu stap klosap long Capernaum, and tufala garem fishing bisnis klosap long there. Luk olsem Judas Iscariot, wea gogo givim Jesus go long enemy, hem nomoa aposol wea kam from Judea.