Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 65

Jesus Gohed Teach Taem Hem Gogo for Jerusalem

Jesus Gohed Teach Taem Hem Gogo for Jerusalem

MATTHEW 8:19-22 LUKE 9:51-62 JOHN 7:2-10

  • TINGTING BILONG OLKETA BRATA BILONG JESUS ABAOTEM HEM

  • KINGDOM MAS FIRST SAMTING LONG LAEF

For longtaem lelebet, Galilee nao main ples wea Jesus duim waka bilong hem. Pipol long there willing for herem and acceptim teaching bilong hem winim pipol long Judea. Long Judea nao olketa Jew “barava laek killim hem dae” bikos hem healim wanfala man long Sabbath.—John 5:18; 7:1.

Hem September or October long 32 C.E., and hem klosap taem nao for datfala big hipap bilong olketa Jew, wea olketa savve stap insaed olketa smol leaf haos. Disfala hipap hem gohed for sevenfala day, then long mek-eit day olketa garem wanfala holy assembly. Datfala hipap hem for markem lastfala harvest for datfala year and hem taem for hapi and thankiu long Jehovah.

James, Simon, Joseph, and Judas, wea hem nao olketa haf brata bilong Jesus sei long hem: “Iu go long Judea.” Jerusalem nao main ples bilong religion bilong olketa Jew long full kantri. Evri year olketa Jew savve garem thrifala hipap, and staka pipol tumas kam long Jerusalem. Olketa brata bilong Jesus sei: “Sapos man laekem nara pipol for luksavve long hem, bae hem no haedem samting wea hem duim. So iu go duim olketa samting hia mekem pipol lukim iu.”—John 7:3, 4.

Olketa haf brata bilong Jesus “no bilivim God nao sendem kam Jesus” and no bilivim hem nao datfala Messiah. Bat olketa laekem pipol long datfala hipap for lukim Jesus duim samfala mirakol. Jesus luksavve hem danger, so hem sei: “Pipol long world no heitim iufala, bat olketa heitim mi bikos mi talemaot samting wea olketa duim hem nogud tumas. Iufala go long datfala hipap. Bae mi kam bihaen bikos hem no kasem taem bilong mi yet ia.”—John 7:5-8.

Olketa brata bilong Jesus go witim nara pipol wea gogo for Jerusalem. Tu-thri day bihaen, Jesus and olketa disaepol go tu, bat olketa go haed mekem pipol no lukim olketa. Olketa no followim main road klosap long Jordan River, bat olketa go pas long Samaria and go stret long Jerusalem. Olketa needim ples for stap long Samaria, so Jesus sendem go firstaem samfala disaepol for redyim evri samting. Long wanfala vilij, pipol no welkamim olketa bikos Jesus gogo long Jerusalem for datfala hipap bilong olketa Jew. James and John kros fogud and sei: “Lord, sapos iu laekem, mifala savve talem fire for kam daon from skae for finisim olketa.” (Luke 9:54) Jesus tok strong long tufala, and olketa go moa.

Taem olketa go followim road, wanfala man wea teachim law sei long Jesus: “Teacher, nomata long eni ples wea iu bae go long hem, mi bae followim iu.” Jesus sei long hem: “Olketa fox garem hol for stap insaed and olketa bird garem nest tu, bat Son bilong man no garem eni ples bilong hemseleva wea hem savve sleep long hem.” (Matthew 8:19, 20) Jesus showimaot datfala man bae kasem hard taem sapos hem followim hem, and luk olsem man hia praod tumas and no laek for garem kaen laef olsem. So iumi savve ting raonem disfala kwestin, ‘Waswe, mi willing for followim Jesus?’

Jesus sei long nara man: “Iu kam followim mi.” Man hia sei: “Letem mi go firstaem for berem Dadi bilong mi.” Jesus sei long hem: “Fitim for olketa wea dae finis nao berem olketa wea dae, bat iu go and talem pipol long evri ples abaotem Kingdom bilong God.” (Luke 9:59, 60) Luk olsem dadi bilong man hia no dae yet. Sapos dadi hem just dae nomoa, hard for son bilong hem kam story witim Jesus. Datfala son no willing for mekem Kingdom first samting long laef bilong hem.

Taem olketa gogo moa nara man sei long Jesus: “Lord, mi laek followim iu, bat letem mi go sekhand firstaem long famili bilong mi.” Jesus sei long hem: “Eni man wea iusim hou and lukluk long olketa samting bihaen long hem bae no fit for go insaed long Kingdom bilong God.”—Luke 9:61, 62.

Kingdom mas first samting long laef bilong olketa tru disaepol bilong Jesus. Sapos man wea iusim hou no gohed lukluk long wanem hem duim, waka bilong hem bae no stret. Sapos hem daonem hou for lukluk long olketa samting bihaen, bae hem no finisim waka bilong hem nao. Olsem tu, eniwan wea luk go bak long disfala nogud world maet lusim nao road wea lead go long laef olowe.