Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 51

Killim Man Dae Long Birthday Party

Killim Man Dae Long Birthday Party

MATTHEW 14:1-12 MARK 6:14-29 LUKE 9:7-9

  • HEROD TALEM OLKETA FOR KATEMAOT HED BILONG JOHN BAPTAESA

Olketa aposol bilong Jesus gohed for preach long Galilee, bat John Baptaesa wea redyim wei for Jesus no free nao for preach. Hem stap long prison for samting olsem tufala year finis.

John sei hem tambu for King Herod Antipas maritim Herodias, wea hem waef bilong haf brata bilong hem Philip. Herod hem divorcem waef bilong hem for maritim Herodias. Herod sei hem man for followim Law bilong Moses, bat datfala Law sei man wea marit olsem hem duim adultery and hem brekem law. From Herod feel nogud long samting wea John talem, hem putim John long prison. Maet Herodias tu encouragem hem for duim olsem.

Herod no savve wanem for duim witim John bikos pipol “tingse John hem wanfala profet.” (Matthew 14:5) Bat Herodias hem laekem John for mas dae. Hem “feel nogud long John” and lukaotem eni chance for killim hem dae. (Mark 6:19) Gogo, hem garem chance nao.

No longtaem bifor Pasova long 32 C.E., Herod mekem bigfala feast long birthday bilong hem. Evri bigman bilong hem witim olketa komanda bilong army, and olketa bigman long Galilee nao kam long datfala feast. Salome, wea hem gele bilong Herodias long first hasband bilong hem, Philip, hem dance for olketa. Olketa man barava enjoyim dance bilong hem.

From Herod hem barava hapi long stepdota bilong hem, hem sei: “Eni samting wea iu laekem, bae mi givim long iu.” And hem promis olsem: “Eni samting wea iu askem long mi, nomata hem haf long evri samting wea mi rul ovarem, bae mi givim long iu.” Salome go long mami bilong hem firstaem and sei: “Wanem kaen samting nao bae mi askem?”—Mark 6:22-24.

Herodias garem chance nao for kasem samting wea hem laekem! Hem sei: “Iu askem kam hed bilong John Baptaesa.” Semtaem nomoa, Salome go stret long Herod and sei: “Mi laekem iu for givim long mi distaem hed bilong John Baptaesa long wanfala pleit.”—Mark 6:24, 25.

Herod sorre tumas, bat hem no wei nao bikos olketa wea kam long datfala feast herem finis promis bilong hem long Salome. Hem shame for no duim wanem gele hia askem, nomata hem bae killim dae man wea no guilty long eni samting. So Herod sendem wanfala soldia go long prison for katemaot hed bilong John and tekem kam long wanfala pleit. Hem givim long Salome, then Salome givim go long mami bilong hem.

Taem olketa disaepol herem samting wea happen, olketa kam tekem body bilong John and berem. Then olketa talem Jesus evri samting wea happen.

Bihaen, Herod hem fraet taem hem herem Jesus healim pipol and raosem olketa demon. Hem wari nogud John Baptaesa hem “laef bak” and hem nao duim olketa mirakol hia. (Luke 9:7) So Herod barava laek for lukim Jesus, no for herem hem preach, bat for lukim sapos wanem hem tingim hem tru or nomoa.