Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 54

Jesus Nao “Datfala Bred wea Mekem Pipol Laef”

Jesus Nao “Datfala Bred wea Mekem Pipol Laef”

JOHN 6:25-48

  • JESUS NAO “BRED FROM HEVEN”

Long east saed long Sea long Galilee, Jesus duim mirakol for feedim staka thousand pipol and then hem ranawe taem olketa laek for mekem hem king. Long datfala naet Jesus wakabaot antap long sea wea raf and hem sevem Peter, wea hem tu wakabaot antap long sea, bat taem hem daot hem start for sink daon. Jesus mekem wind tu for kwaet. Sapos nomoa, maet olketa disaepol shiprek nao.

Jesus kam bak nao long west saed long Sea long Galilee, klosap long Capernaum. Pipol wea Jesus duim mirakol for feedim olketa faendem hem and sei: “Wanem taem nao iu kasem long hia?” Jesus tok strong long olketa and sei olketa lukaotem hem bikos olketa laekem kaikai nomoa. Hem talem olketa: “Iufala mas no waka for kaikai wea savve rotten, bat iufala mas waka for kaikai wea no savve rotten and wea mekem man laef olowe.” So olketa askem hem: “Wanem nao mifala mas duim, mekem mifala duim samting wea God hapi long hem?”—John 6:25-28.

Maet olketa tingim samting wea Law bilong Moses sei olketa mas duim, bat Jesus sei: “Samting wea God hapi long hem nao hem for iufala showimaot faith long man wea God sendem kam.” Bat olketa no showimaot faith long Jesus, nomata hem duim staka samting finis. Olketa laekem hem for duim wanfala mirakol, mekem olketa biliv long hem. Olketa ask: “Wanem samting nao bae iu duim?” Olketa sei moa: “Long wilderness, olketa grani bilong mifala kaikaim manna from God, wea hem nao olketa Holy Raeting talem finis. Olketa sei, ‘Hem givim bred from heven long olketa.’”—John 6:29-31; Psalm 78:24.

Jesus laekem olketa for savve hu nao givim paoa long hem for duim olketa mirakol. Hem sei: “Mi talem iufala tru samting, distaem Dadi bilong mi givim trufala bred from heven long iufala. Moses no givim trufala bred from heven long iufala. Bred wea God givim nao hem man wea kam daon from heven and wea mekem pipol long world kasem laef.” From olketa no minim hem, olketa sei: “Lord, mifala laekem iu for givim mifala disfala bred olowe.” (John 6:32-34) Wanem nao disfala “bred” wea Jesus storyim?

Hem sei: “Mi nao datfala bred wea mekem pipol laef. Man wea kam long mi bae no hangre moa, and man wea showimaot faith long mi bae no need for drink moa. Mi talem iufala finis, nomata iufala lukim mi bat iufala no biliv long mi. . . . Mi kam daon from heven, no for duim samting wea miseleva laekem bat for duim samting wea Dadi, wea hem sendem mi kam, laekem mi for duim. Dadi, wea hem sendem mi kam, no laekem eniwan long olketa wea hem givim long mi for lus, bat hem laekem mi for mekem olketa laef bak long future. Dadi bilong mi hem laekem evriwan wea savve long Son and showimaot faith long hem for kasem laef olowe.”—John 6:35-40.

Datwan mekem olketa Jew kros, and olketa komplenim hem bikos hem sei hem nao “datfala bred wea kam daon from heven.” (John 6:41) Long tingting bilong olketa, hem man nating nomoa from Nazareth, wanfala taon long Galilee. Olketa sei: “Man hia hem Jesus, son bilong Joseph and iumi savve long dadi and mami bilong hem, iaman?”—John 6:42.

Jesus sei long olketa: “Iufala no komplen. Hard for eniwan kam long mi sapos Dadi wea sendem mi kam hem no leadim hem kam long mi firstaem. Bae mi mekem man olsem for laef bak long day for judgem pipol. Olketa Holy Raeting sei, ‘Jehovah bae teachim evriwan long olketa.’ Olketa wea kam long mi nao hem evriwan wea herem samting wea Dadi long heven talem and followim datwan. Mi nao man wea God sendem kam, and mi nomoa lukim Dadi long heven, no eni man moa. Mi talem iufala tru samting, man wea biliv long mi bae kasem laef olowe.”—John 6:43-47; Isaiah 54:13.

Taem Jesus story witim Nicodemus, hem story abaotem laef olowe and faith long Son bilong man. Hem sei: “Evriwan wea showimaot faith long [spesol son bilong God] hem no dae bat kasem laef olowe.” (John 3:15, 16) Bat distaem hem story witim staka pipol and talem olketa hem bae duim samting for mekem olketa kasem laef olowe, wea datfala manna and datfala bred long Galilee no savve duim. So hao nao bae man kasem laef olowe? Jesus sei moa: “Mi nao datfala bred wea mekem pipol laef.”—John 6:48.

Disfala story abaotem bred from heven hem gohed, and hem kamap big moa taem Jesus teach long wanfala sinagog long Capernaum.