Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 36

Bigman Bilong Army Showimaot Strongfala Faith

Bigman Bilong Army Showimaot Strongfala Faith

MATTHEW 8:5-13 LUKE 7:1-10

  • WAKAMAN BILONG WANFALA BIGMAN HEM GUD BAK

  • OLKETA WEA GAREM FAITH BAE KASEM BLESSING

Bihaen Jesus givim datfala tok long maunten, hem go long Capernaum, and samfala bigman bilong olketa Jew kam long hem. Wanfala bigman long army bilong Rome wea staka soldia stap anda long hem nao sendem olketa kam.

Wakaman bilong datfala bigman hem sik big tumas and hem klosap for dae. Olketa Jew talem Jesus datfala wakaman “hem leidaon long haos distaem. Hem paralaes and hem safa tumas.” (Matthew 8:6) Nomata datfala bigman hem no Jew, hem laekem Jesus for helpem hem. Olketa talem Jesus hem barava fitim for hem helpem bigman hia. Olketa sei: “Hem kaen tumas long pipol bilong iumi, and hem wakem tu sinagog bilong iumi.”—Luke 7:4, 5.

No longtaem bihaen, Jesus go long haos bilong datfala bigman witim olketa Jew hia. Taem olketa klosap kasem haos, bigman hia sendem olketa fren bilong hem for sei long Jesus: “Lord, iu no hard waka nomoa for kam, bikos hem no fitim for iu kam long haos bilong man olsem mi. Dastawe mi tingse mi no fit for kam long iu tu.” (Luke 7:6, 7) For wanfala bigman talem toktok olsem, datwan showimaot hem barava hambol! And hem showimaot hem barava difren from olketa long Rome wea raf tumas long olketa wakaman bilong olketa.—Matthew 8:9.

Masbi datfala bigman savve olketa Jew no associate witim pipol wea no Jew. (Acts 10:28) Maet hem tingim datwan taem hem sendem olketa fren bilong hem for sei long Jesus: “Iu talem kam nomoa for hem gud bak, and wakaman bilong mi bae gud nao.”—Luke 7:7.

Jesus barava sapraes for herem diswan, and sei: “Nomata long full Israel tu bat mi no savve long eniwan wea garem strongfala faith olsem disfala man.” (Luke 7:9) Taem olketa fren bilong datfala bigman kasem bak haos, olketa lukim datfala wakaman hem gud bak nao.

Bihaen Jesus healim datfala man, hem storyim hao pipol wea no Jew wea garem faith bae kasem olketa blessing tu. Hem sei: “Plande pipol from east and from west bae kam and sidaon raonem tebol witim Abraham and Isaac and Jacob long Kingdom bilong God.” Waswe long olketa Jew wea no garem faith? Jesus sei “olketa bae torowem olketa . . . long aotsaed wea hem dark. Long ples hia nao bae olketa feel sorre tumas and krae.”—Matthew 8:11, 12.

Nomata olketa Jew nao first wan wea garem chance for rul witim Christ insaed long Kingdom, Christ bae rejectim olketa Jew wea no acceptim datwan. Hem bae welkamim olketa wea no Jew for sidaon raonem tebol bilong hem, wea minim olketa bae rul witim hem insaed long “Kingdom bilong God.”