Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 96

Young Man wea Rich Askem Kwestin

Young Man wea Rich Askem Kwestin

MATTHEW 19:16-30 MARK 10:17-31 LUKE 18:18-30

  • WANFALA RICH MAN ASKEM KWESTIN ABAOTEM LAEF OLOWE

Jesus gogo for Jerusalem bat hem stap yet long Perea. Wanfala young rich man hem ran kam long Jesus and baodaon long hem. Hem “wanfala bigman bilong olketa Jew.” Maet hem wanfala bigman bilong sinagog or member bilong Hae Kot bilong olketa Jew. Hem askem Jesus: “Gudfala Teacher, wanem nao mi mas duim for kasem laef olowe?”—Luke 8:41; 18:18; 24:20.

Jesus sei long hem: “Hao nao iu kolem mi gudfala? God nomoa hem gud, no eniwan moa.” (Luke 18:19) Luk olsem datfala young man iusim datfala word “gudfala” olsem title, wea hem nao wanem olketa rabbi savve duim. Nomata Jesus hem teach long gudfala wei, hem laekem datfala man for savve datfala title “Gudfala” hem fitim God nomoa.

Jesus sei long hem: “Sapos iu laek for kasem laef, gohed for obeyim olketa law.” Man hia hem sei: “Olketa wanem law nao mi mas obeyim?” Jesus mekhae long faevfala long Ten Komandment wea sei man mas no killim dae narawan, no duim adultery, no steal, no laea abaotem nara man, and mas respectim dadi and mami bilong hem. Then hem talem wanfala law wea important winim eni nara law. Hem sei: “Iu mas lovem narawan long sem wei wea iu lovem iuseleva.”—Matthew 19:17-19.

Datfala man sei long hem: “Mi obeyim evri law hia. Hao, eni law stap wea mi no followim yet?” (Matthew 19:20) Maet hem wari nogud hem no duim yet wanfala samting wea bae mekem hem fit for kasem laef olowe. Jesus “barava tingim hem” from hem luksavve datfala man garem gudfala heart. (Mark 10:21) Nomata olsem, wanfala samting stopem man hia.

Datfala man tingim tumas olketa samting wea hem garem, so Jesus sei long hem: “Wanfala samting nao iu no duim yet: Go salem olketa samting bilong iu and givim selen hia long pipol wea poor, mekem iu garem riches long heven, and iu kam followim mi.” Datfala man fit for givim selen bilong hem long pipol wea poor and go followim Jesus. Bat hem sorre tumas and hem go from Jesus nao. Masbi Jesus sorre taem hem lukim datwan. From man hia hem tingim tumas “staka samting” wea hem garem, datwan mekem hem no luksavve long wanem hem barava important. (Mark 10:21, 22) Jesus sei: “Bae hem barava no isi for olketa wea garem staka selen for go insaed long Kingdom bilong God!”—Luke 18:24.

Olketa disaepol sapraes long disfala toktok and long nara samting wea Jesus talem. Hem sei: “For wanfala rich man go insaed Kingdom bilong God bae hem olsem wanfala camel hem trae for go insaed hol bilong nila for sewim kaleko.” Datwan mekem olketa disaepol for sei: “Sapos olsem, eniwan savve kasem laef tu?” Jesus luk long olketa and sei: “No eni samting wea man seleva duim savve mekem hem for kasem laef, bat God savve mekem man kasem laef bikos God savve duim eni samting.”—Luke 18:25-27.

Peter showimaot olketa disaepol no olsem datfala rich man taem hem sei: “Bat waswe long mifala? Mifala lusim evri samting and followim iu.” Jesus storyim gud samting wea bae olketa kasem. Hem sei: “God bae mekem evri samting niu moa long taem wea Son bilong man hem sidaon long nambawan throne bilong hem. Long taem hia nao, iufala wea followim mi bae sidaon tu long twelvfala throne and judgem twelvfala tribe bilong Israel.”—Matthew 19:27, 28.

Jesus storyim taem wea earth bae olsem garden long Eden bifor. Peter and olketa nara disaepol bae rul witim Jesus ovarem datfala Paradaes long earth, wea datwan hem nambawan reward wea winim eni samting wea olketa lusim!

Olketa disaepol bae no weit for kasem reward long future nomoa, bat olketa kasem samfala reward distaem tu. Jesus sei: “Eniwan wea lusim haos, waef, olketa brata, dadi, mami, or olketa pikinini bikos long Kingdom bilong God, bae hem kasem bak staka samting distaem winim wanem hem lusim. Then long world wea bae kam, bae hem kasem laef olowe.”—Luke 18:29, 30.

So nomata wea nao olketa disaepol stap, olketa savve fren gud witim olketa narawan wea worshipim Jehovah winim famili bilong olketa. Luk olsem datfala young man wea rich bae no kasem datfala blessing, and tu, bae hem no go insaed long Kingdom bilong God long heven.

Jesus sei moa: “Bat plande wea first bae last, and olketa wea last bae first.” (Matthew 19:30) Wanem nao datwan minim?

Datfala young man wea rich hem insaed long sekson wea “first” bikos hem wanfala bigman bilong olketa Jew. From hem obeyim law bilong God, luk olsem maet bae hem kamap disaepol bilong Jesus and duim staka gud samting witim olketa narawan wea followim Messiah. Nomata olsem, hem tingim nomoa selen and olketa nara samting wea hem garem. Bat olketa man nating olketa luksavve Jesus teachim tru samting and talem wanem man mas duim for kasem laef. Bifor, olketa hia insaed sekson wea “last,” bat distaem olketa nao “first.” Long future, olketa bae sidaon long olketa throne long heven witim Jesus and rul ovarem Paradaes long earth.