Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 95

Teaching Bilong Jesus Abaotem Divorce

Teaching Bilong Jesus Abaotem Divorce

MATTHEW 19:1-15 MARK 10:1-16 LUKE 18:15-17

  • JESUS STORYIM TINGTING BILONG GOD ABAOTEM DIVORCE

  • OLKETA WEA DISAED FOR STAP SINGOL

  • IUMI MAS OLSEM OLKETA SMOL PIKININI

Jesus and olketa disaepol lusim Galilee and akrosim Jordan River. Olketa followim road long south wea go pas long Perea. Lastaem Jesus kasem Perea, hem storyim law bilong God abaotem divorce long olketa Pharisee. (Luke 16:18) Distaem olketa Pharisee storyim datwan for trikim Jesus.

Moses sei man savve divorcem waef bilong hem sapos waef duim barava nogud samting. (Deuteronomy 24:1) Pipol garem difren tingting abaotem wanem nao stretfala reason for man savve divorcem waef. Samfala tingse nomata olketa smol samting tu, man savve divorcem waef. So olketa Pharisee sei: “Hao, hem stret for man lusim waef bilong hem bikos long eni samting nomoa?”—Matthew 19:3.

Jesus no storyim samting wea followim tingting bilong olketa, bat hem talem tingting bilong God abaotem marit. Hem sei: “Hao, iufala no readim finis? Start kam long taem wea God wakem olketa man, hem wakem man and woman and hem sei: ‘Dastawe, man bae lusim dadi and mami bilong hem and hem bae stap olowe witim waef bilong hem. Datfala man and woman bae kamap wanfala body nomoa.’ Diswan minim tufala hia no tufala body, bat wanfala nomoa. So no eni man mas aotem samting wea God joinim finis.” (Matthew 19:4-6) Taem God mekem Adam and Eve for marit, hem no storyim eni wei for tufala finisim datfala marit.

Olketa Pharisee sei long Jesus: “Sapos olsem, why nao Moses letem man for raetem wanfala pepa for divorce and for sendem waef bilong hem go bak?” (Matthew 19:7) Jesus sei long olketa: “Moses letem iufala for lusim waef bilong iufala bikos iufala no laek herem eni samting wea hem talem long iufala. Bat taem God wakem firstfala man and woman hem no olsem.”—Matthew 19:8.

Then Jesus storyim disfala tru samting: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong [Greek languis, por·neiʹa], hem savve lusim hem.” (Matthew 19:9) So wanfala reason nomoa Bible storyim wea fitim for hasband and waef divorce long hem. Hem nao sapos eniwan long tufala durong.

Olketa disaepol sei long hem: “Ei! Sapos marit hem olsem, bae hem gud nomoa for no marit.” (Matthew 19:10) Sapos eniwan tingting for marit hem mas luksavve marit hem for olowe!

Jesus sei samfala stap singol bikos olketa born kam olsem nao, and samfala no savve marit bikos olketa man nao mekem olketa for olsem. Samfala moa kontrolem feeling bilong olketa and disaed for no marit mekem olketa savve duim moa samting for sapotim Kingdom. Jesus sei long olketa wea lisin kam: “Sapos man hapi for stap singol olsem, hem gud nomoa.”—Matthew 19:12.

Then pipol tekem kam long Jesus olketa smol pikinini bilong olketa. Bat olketa disaepol tok strong long olketa, maet from olketa no laekem olketa pikinini for disturbim Jesus. Taem Jesus lukim diswan, hem feel nogud and sei: “Letem olketa smol pikinini for kam long mi. No stopem olketa bikos Kingdom bilong God hem bilong olketa wea olsem olketa pikinini hia. Mi talem iufala tru samting, eniwan wea no acceptim Kingdom bilong God long sem wei wea wanfala smol pikinini savve acceptim samting, bae hem no go insaed long datfala Kingdom.”—Mark 10:14, 15; Luke 18:15.

Iumi lanem nambawan samting from datwan! For go insaed long Kingdom bilong God, iumi mas hambol and willing for lane olsem olketa smol pikinini. Then Jesus holem kam olketa smol pikinini and blessim olketa for showimaot hem lovem olketa. Hem lovem tu evriwan wea “acceptim Kingdom bilong God long sem wei wea wanfala smol pikinini savve acceptim samting.”—Luke 18:17.