Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Jesus—Road, Truth, Laef

 CHAPTER 8

Olketa Ranawe From Wanfala Nogud King

Olketa Ranawe From Wanfala Nogud King

MATTHEW 2:13-23

  • JOSEPH TEKEM FAMILI BILONG HEM AND RANAWE LONG EGYPT

  • FAMILI BILONG JOSEPH MUV GO LONG NAZARETH

Joseph hem wekapem Mary for talem hem wanfala important nius. Hem lukim angel bilong Jehovah long wanfala dream. Angel hia sei long hem: “Getap, tekem pikinini hia witim mami bilong hem, and ranawe go long Egypt. Stap long there go kasem taem wea mi talem iu for kam bak, bikos Herod hem lukaotem disfala pikinini for killim hem dae.”—Matthew 2:13.

Long datfala naet nao Joseph ranawe witim Mary and pikinini bilong tufala. Long semtaem tu Herod faendemaot olketa man from East trikim hem. Olketa go bak long hom bilong olketa and no go bak for lukim Herod olsem hem talem olketa for duim. Herod hem kros fogud. From hem barava laek for killim dae Jesus, hem sendem olketa man go long Bethlehem and olketa nara ples long datfala area for killim dae olketa boy wea tufala year or wea no kasem tufala year yet. Hem duim olsem bikos hem luksavve samting olsem tufala year go pas finis from taem wea olketa man from East lukim datfala star.

Hem barava nogud samting for killim dae olketa boy hia! Iumi no savve haomas boy nao dae long datfala taem, bat toktok bilong profet Jeremiah wea sei olketa mami barava krae and singaot big, hem kamap tru.—Jeremiah 31:15.

Long datfala taem, Joseph and famili bilong hem ranawe finis long Egypt. Long wanfala naet, Joseph lukim angel bilong Jehovah moa insaed long wanfala dream. Angel hia sei long hem: “Getap, tekem pikinini hia witim mami bilong hem, and go long Israel, bikos olketa wea laek for killim dae datfala pikinini, olketa dae finis.” (Matthew 2:20) So Joseph luksavve hem olraet nao for tekem famili bilong hem go bak long hom. Diswan mekem nara profesi long Bible kamap tru, wea sei: “Mi kolem kam bak son bilong mi from Egypt.”—Hosea 11:1.

Luk olsem Joseph laekem famili bilong hem for stap long Judea, klosap long Bethlehem. Hem nao taon wea olketa stap long hem bifor olketa ranawe long Egypt. Bat hem faendaot Archelaus, wanfala nogud son bilong Herod, hem kamap king long Judea. Long nara dream, God warnim Joseph abaotem diswan. So Joseph and famili bilong hem go long area wea olketa kolem Galilee long north, and stap long Nazareth, wanfala taon wea farawe lelebet from Jerusalem. Jesus growap long datfala taon, wea mekem nara toktok wea olketa profet talem kamap tru, wea sei: “Olketa bae kolem hem man bilong Nazareth.”—Matthew 2:23.