“Olketa toktok wea mi talem iufala tuday mas stap long heart bilong iufala. Iufala mas evritaem teachim olketa samting hia long olketa son bilong iufala.”—Deuteronomy 6:6, 7

Taem Jehovah startim famili, hem sei dadi and mami nao mas lukaftarem pikinini bilong olketa. (Colossae 3:20) From iu wanfala dadi or mami, hem responsibility bilong iu for trainim pikinini for lovem Jehovah and helpem hem for garem gudfala wei. (2 Timothy 1:5; 3:15) Iu mas trae for luksavve long samting wea stap long heart bilong son or dota bilong iu. And tu, hem barava important for iu showimaot gudfala example long pikinini. Sapos iu laek for teachim pikinini bilong iu olketa toktok bilong Jehovah and helpem hem for followim datwan, datfala toktok mas stap firstaem long heart bilong iu.—Psalm 40:8.

 1 MEKEM HEM ISI FOR PIKININI STORY LONG IU

BIBLE HEM SEI: “Willing for lisin, no kwiktaem for toktok.” (James 1:19) Bae iu laekem pikinini bilong iu feel free for storyim eni samting long iu. Pikinini shud luksavve iu bae hapi for lisin long hem taem hem laek story long iu. Kaen long hem mekem hem no fraet for story long iu. (James 3:18) Sapos pikinini tingse iu bae kros or judgem hem, maet bae hem no laek storyim evri samting long iu. Patient witim pikinini bilong iu and evritaem talem hem iu lovem hem.—Matthew 3:17; 1 Corinth 8:1.

SAMTING IU SAVVE DUIM:

  • Taem pikinini laek for story, redi for lisin long hem

  • Story evritaem witim pikinini bilong iu, no long taem wea problem kamap nomoa

2 TRAE FOR MINIM TINGTING BILONG PIKININI

BIBLE HEM SEI: “Man wea showimaot hem luksavve long samting bae kasem gud samting.” (Proverbs 16:20) Nomata pikinini bilong iu maet talem samting wea mekem iu seke, iu shud trae for minim why nao hem tok olsem. Staka taem olketa young wan savve ova tumas long story bilong olketa or talem samting wea olketa no min for talem. Bible hem sei tu: “Hem no wise for man talem tingting bilong hem bifor hem herem full story.” (Proverbs 18:13) No kwiktaem for feel nogud abaotem samting wea pikinini talem.—Proverbs 19:11.

SAMTING IU SAVVE DUIM:

  • Nomata wanem samting nao pikinini talem long iu, no katem story bilong hem or kwiktaem for kros long hem

  • Trae for tingim feeling bilong iu and wanem hem important long iu taem iu sem age olsem hem

 3 IUTUFALA MAS WAN MIND

BIBLE HEM SEI: “Son bilong mi, lisin long dadi bilong iu taem hem stretem iu, and no forgetim wanem mami bilong iu teachim long iu.” (Proverbs 1:8) Jehovah sei dadi and mami nao mas lukaftarem olketa pikinini, so iu mas teachim olketa for respectim and obeyim iutufala evriwan. (Ephesus 6:1-3) Hem isi for olketa pikinini luksavve sapos dadi and mami no “wan mind” long olketa samting. (1 Corinth 1:10) Sapos iutufala no agree long wanfala samting, no storyim diswan front long olketa pikinini bikos datwan savve mekem olketa for no respectim iutufala.

SAMTING IU SAVVE DUIM:

  • Story tugeta and agree long wanem iutufala bae duim for stretem pikinini

  • Sapos iutufala no garem sem tingting long hao for trainim pikinini, trae for minim tingting bilong marit partner bilong iu abaotem datwan

 4 IUTUFALA MAS GAREM PLAN

BIBLE HEM SEI: “Trainim wanfala boy for followim stretfala wei.” (Proverbs 22:6) For pikinini bilong iu garem gudfala wei, hem no samting wea savve happen nating nomoa. Iu mas garem plan long hao for trainim and stretem pikinini. (Psalm 127:4; Proverbs 29:17) Wei for stretem pikinini hem no minim for panisim hem nomoa, bat for helpem hem for luksavve long why nao hem gud for followim olketa rul bilong famili. (Proverbs 28:7) Iu mas teachim hem for tinghae long Bible and minim olketa principle long Bible tu. (Psalm 1:2) Datwan bae helpem hem for garem gudfala konsens.—Hebrew 5:14.

SAMTING IU SAVVE DUIM:

  • Mek sure pikinini bilong iu luksavve God hem samwan wea hem savve trustim

  • Helpem hem for luksavve and stap klia long olketa samting wea savve spoelem hem, olsem olketa samting long Internet and long social network. Teachim hem hao for stap klia long pipol wea savve spoelem hem saed long sex

“Trainim wanfala boy for followim stretfala wei”