Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Famili Bilong Iu Savve Hapi

 SEKSON 9

Famili Worshipim Jehovah Tugeta

Famili Worshipim Jehovah Tugeta

“Worshipim God wea wakem skae and graon.”—Revelation 14:7

Long disfala brochure, iu lukim Bible garem staka principle wea savve helpem iu and famili bilong iu. Jehovah laekem iu for hapi. Hem promisim sapos iu evritaem duim samting wea hem laekem, ‘bae hem givim iu olketa samting wea iu needim.’ (Matthew 6:33) Hem barava laekem iu for fren bilong hem. Evritaem duim samting for strongim wei wea iu fren witim God bikos diswan nao hem winim eni nara samting wea iumi savve duim.—Matthew 22:37, 38.

 1 STRONGIM WEI WEA IU FREN WITIM JEHOVAH

BIBLE HEM SEI: ‘Jehovah hem sei: “Sapos iufala duim olsem, mi bae dadi bilong iufala, and iufala bae olketa son and dota bilong mi.”’ (2 Corinth 6:18) God laekem iu for fren bilong hem. Prea savve helpem iu for duim datwan. Jehovah sei hem gud for iu “prea evritaem.” (1 Thessalonica 5:17) Hem laekem tumas for iu talem hem tingting bilong iu and olketa samting wea iu wari abaotem. (Philippi 4:6) Taem iu prea witim famili bilong iu, olketa bae luksavve iu fren gud witim God.

Hem gud for story witim God, bat iu mas herem toktok bilong hem tu. Iu savve duim datwan taem iu studyim Bible and olketa Bible pablikeson. (Psalm 1:1, 2) Ting raonem wanem iu lanem. (Psalm 77:11, 12) Iu bae herem toktok bilong God tu taem iu go evritaem long olketa Christian meeting.—Psalm 122:1-4.

Nara samting iu savve duim for strongim wei wea iu fren witim Jehovah hem for story witim olketa narawan abaotem hem. Sapos iu evritaem duim datwan, bae iu fren gud witim hem.—Matthew 28:19, 20.

SAMTING IU SAVVE DUIM:

  • Markem taem evriday for readim Bible and prea

  • Evriwan long famili mas luksavve olketa spiritual samting hem important winim wei for duim hapitaem

2 ENJOYIM FAMILI WORSHIP

BIBLE HEM SEI: “Fren gud witim God and bae hem fren gud witim iufala.” (James 4:8) Iu mas markem taem for famili worship and evritaem followim datwan. (Genesis 18:19) Bat iu mas duim samfala nara samting tu. Evri samting wea iu duim mas showimaot iu laek for fren witim God. Strongim wei wea famili bilong iu fren witim God long wei for story abaotem hem “taem iufala sidaon long haos, taem iufala wakabaot long road, taem iufala redi for sleep, and taem iufala wekap.” (Deuteronomy 6:6, 7) Hem gud for followim example bilong Joshua wea hem sei: ‘Mi and famili bilong mi bae worshipim Jehovah.’—Joshua 24:15.

SAMTING IU SAVVE DUIM:

  • Garem program for trainim olketa pikinini evri week wea savve helpem olketa nomata wanem nao age bilong olketa