Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Gud Nius From God!

 LESON 8

Why Nao God Letem Olketa Nogud Samting and Wei for Safa Gohed?

Why Nao God Letem Olketa Nogud Samting and Wei for Safa Gohed?

1. Hao nao olketa nogud samting start?

God letem olketa man for rul for longtaem nao, bat olketa no savve stretem olketa problem bilong man

Olketa nogud samting start long earth taem Satan talem firstfala laea. Long firstaem God wakem wanfala perfect angel. Disfala angel hem kamap Satan bikos “hem no gohed followim samting wea tru.” (John 8:44) Satan laekem pipol for worshipim hem, wea hem samting God nomoa garem raet for kasem. Satan laea long Eve and switim hem for obeyim hem and no obeyim God. Adam disaed for joinim Eve for no obeyim God. Datfala disison mekem olketa man safa and dae.Readim Genesis 3:1-6, 19.

Taem Satan talem Eve for no obeyim God, hem startim wei for againstim God wea hem nomoa garem raet for rul. Staka pipol joinim Satan for againstim rul bilong God. So Satan nao “man wea rulim disfala world.”Readim John 14:30; 1 John 5:19.

2. Waswe, eni samting rong witim olketa samting wea God wakem?

Evri samting wea God wakem olketa perfect. Olketa man and olketa angel wea God wakem savve obeyim God. (Deuteronomy 32:4, 5) God wakem iumi long wei wea iumi savve disaed for duim gud samting or nogud samting. Datwan givim iumi chance for showimaot iumi lovem God.Readim James 1:13-15; 1 John 5:3.

3. Why nao God letem wei for safa gohed kam kasem distaem?

Start kam long taem wea Adam and Eve no obey, Jehovah letem pipol againstim rul bilong hem. Why nao olsem? Diswan hem for showimaot pipol bae no kasem gud samting taem God no rulim olketa man. (Ecclesiastes 7:29; 8:9) Hem barava klia, nomata olketa man rul for winim 6,000 year finis, olketa man no savve finisim war, crime, samting wea no stret, and sik.Readim Jeremiah 10:23; Rome 9:17.

 Bat taem pipol willing for stap anda long rul bilong God, olketa kasem gud samting. (Isaiah 48:17, 18) Klosap nao Jehovah bae finisim evri gavman bilong man. Olketa wea chus for stap anda long rul bilong God nomoa bae stap long earth.—Isaiah 11:9.Readim Daniel 2:44.

4. From God hem patient, iumi garem chance for duim wanem?

Satan sei olketa man worshipim Jehovah nomoa for kasem samting for olketa seleva. Waswe, iu laek for showimaot datfala toktok hem no tru? From God hem patient, iumi garem chance for showimaot sapos iumi laek for stap anda long rul bilong God or rul bilong man. Samting wea iumi duim bae showimaot rul bilong hu nao iumi laek for stap anda long hem.Readim Job 1:8-12; Proverbs 27:11.

5. Wanem nao showimaot iumi chus for stap anda long rul bilong God?

Wanem iumi disaedem showimaot sapos iumi laek for stap anda long rul bilong God or nomoa

Iumi savve showimaot iumi chus for stap anda long rul bilong God taem iumi lanem wanem Bible talem abaotem hao for worshipim God long stretfala wei and followim datwan. (John 4:23) Iumi savve showimaot iumi no stap anda long rul bilong Satan taem iumi no join insaed politik and war, olsem Jesus duim.Readim John 17:14.

Satan iusim paoa bilong hem for mekhae long olketa rabis samting wea savve spoelem man. Taem iumi no laek duim olketa samting hia, maet samfala fren and olketa relative tok spoelem or againstim iumi. (1 Peter 4:3, 4) So iumi mas disaed wanem for duim. Waswe, bae iumi fren witim pipol wea tok spoelem and againstim iumi, or pipol wea lovem God? Waswe, bae iumi obeyim olketa law bilong God? Iumi laek for fren witim pipol wea lovem God and obeyim law bilong hem. Sapos iumi duim datwan, iumi showimaot toktok bilong Satan hem no tru, wea sei olketa man bae no obeyim God taem olketa kasem hard taem.Readim 1 Corinth 6:9, 10; 15:33.

From God hem lovem olketa man iumi savve sure bae hem finisim olketa nogud samting and wei for safa. Olketa wea showimaot olketa trustim God for duim diswan bae kasem laef olowe long earth.Readim John 3:16.