1. Waswe, evri religion hem gud?

Insaed long evri religion samfala pipol stap wea barava laek for obeyim God. Iumi hapi God hem savve long olketa pipol olsem and hem lovem olketa. Bat iumi savve tu, staka nogud samting wea happen, pipol duim long nem bilong religion. (2 Corinth 4:3, 4; 11:13-15) Olsem olketa nius report talem, samfala religion sapotim terrorism, war, and olketa joinim tu pipol wea laek for killim dae wanfala full tribe. Plande long olketa priest bilong olketa religion spoelem pikinini saed long sex. Olketa samting hia mekem olketa wea laek for obeyim God feel nogud!Readim Matthew 24:3-5, 11, 12.

Tru religion mekhae long God, bat false religion duim samting wea God no hapi long hem. False religion teachim pipol olketa idea wea no stap long Bible, olsem olketa laea teaching abaotem God and olketa wea dae finis. Bat Jehovah laekem pipol for savve long tru samting abaotem hem.Readim Ezekiel 18:4; 1 Timothy 2:3-5.

2. Wanem nao bae happen long olketa religion?

Hem gud for savve nomata olketa religion hia sei olketa lovem God, God luksavve olketa barava lovem world bilong Satan. (James 4:4) Taem Bible storyim olketa false religion hem iusim datfala nem “Bigfala Babylon.” Babylon hem taon wea false religion start long hem bihaen Flood long taem bilong Noah. Klosap nao God bae finisim religion wea laea long pipol and putim hevi long olketa.Readim Revelation 17:1, 2, 5, 16, 17; 18:8.

Bat Jehovah no forgetim pipol wea laek for obeyim hem, nomata olketa insaed long olketa false religion long world. Hem teachim tru samting long olketa pipol olsem, and datwan helpem olketa for lusim false religion.Readim John 6:45.

 3. Wanem nao pipol wea laek for obeyim God mas duim?

Tru religion mekem pipol stap gud tugeta

Jehovah hem helpem pipol wea laek for savve long tru samting and wea laek for duim gud samting. Jehovah talem olketa for mas lusim false religion. Pipol wea lovem God, olketa willing for changem samfala samting long laef bilong olketa for mekem hem hapi.Readim Revelation 18:4.

Long first century, taem pipol wea laek for obeyim God herem gud nius wea olketa aposol talemaot, olketa hapi tumas. Jehovah helpem olketa for changem laef bilong olketa and datwan mekem olketa hapi. And tu, laef bilong olketa garem mining and olketa garem hope. Olketa showimaot gud example for iumi distaem bikos taem olketa acceptim datfala gud nius, olketa willing for duim samting wea Jehovah hapi long hem.Readim 1 Thessalonica 1:8, 9; 2:13.

Olketa wea worshipim Jehovah olketa olsem wanfala big famili. Jehovah welkamim pipol wea lusim false religion for joinim datfala famili. Sapos iu acceptim datfala invitation bilong Jehovah, iu bae fren gud witim hem, garem wanfala spiritual famili wea lovem iu, and bae iu kasem laef olowe.Readim Mark 10:29, 30; 2 Corinth 6:17, 18.

4. Wanem nao bae God duim for mekem pipol long evri ples hapi?

Iumi hapi for savve God bae judgem false religion. Datwan bae mekem pipol kamap free from olketa nogud samting wea religion duim. No enitaem moa bae false religion laea long pipol and mekem olketa no stap gud tugeta. Evriwan wea laef long heven and long earth bae wan mind for worshipim datfala tru God, Jehovah.Readim Revelation 18:20, 21; 21:3, 4.