Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Gud Nius From God!

 LESON 12

Wanem Nao Iu Savve Duim for Fren Gud Witim God?

Wanem Nao Iu Savve Duim for Fren Gud Witim God?

1. Waswe, God herem evri prea?

God laekem pipol long evri ples for prea long hem mekem olketa savve fren gud witim hem. (Psalm 65:2) Bat hem no herem evri prea. Olsem example, God no herem prea bilong man wea treatim nogud waef bilong hem. (1 Peter 3:7) And tu, taem olketa Israelite gohed for duim nogud samting God nating laek for herem prea bilong olketa. Nomata olsem, sapos olketa wea duim bigfala sin olketa repent, God bae herem prea bilong olketa. Tru tumas, prea hem wanfala privilege.Readim Isaiah 1:15; Acts 3:19.

2. Hao nao bae iumi prea?

Prea hem part long worship bilong iumi, so iumi shud prea long Jehovah nomoa wea hem wakem iumi. (Matthew 4:10; 6:9) And tu, from iumi no perfect iumi shud prea long nem bilong Jesus bikos hem nao dae for olketa sin bilong iumi. (John 14:6) Jehovah no laekem iumi for evritaem talem prea wea iumi baeheartim or readim from wanfala buk. Hem laekem iumi for talem prea wea kam from heart.Readim Matthew 6:7; Philippi 4:6, 7.

Nomata man prea kwaet, God savve herem prea bilong hem. (1 Samuel 1:12, 13) Hem laekem iumi for prea evritaem. Iumi savve prea taem iumi wekap long morning, bifor iumi sleep long naet, taem iumi redi for kaikai, and taem iumi kasem problem.Readim 1 Peter 5:7; Matthew 15:36.

3. Why nao olketa Christian hipap tugeta?

Hem no isi for fren gud witim God bikos iumi stap long disfala world wea pipol no garem faith long God and olketa mekfani long promis bilong hem for pipol bae stap gud tugeta long earth. (2 Timothy 3:1, 4; 2 Peter 3:3, 13) So  iumi need for hipap witim olketa nara Christian mekem iumi encouragem iumi evriwan.Readim Hebrew 10:24, 25.

Taem iumi hipap witim pipol wea lovem God, datwan helpem iumi for fren gud witim hem. Iumi savve kasem encouragement from olketa nara Christian long olketa meeting bilong Olketa Jehovah’s Witness.Readim Rome 1:11, 12.

4. Wanem nao iu savve duim for fren gud witim God?

Iu savve fren gud witim Jehovah taem iu ting raonem wanem iu lanem long Bible. Hem gud for ting raonem wanem nao iu savve lanem from olketa samting wea God duim, olketa law and principle bilong hem, and olketa promis bilong hem. Wei for prea and ting raonem samting helpem iumi for tinghae long bigfala love and wisdom bilong God.Readim 1 Timothy 4:15, 16.

Iu savve fren gud witim God nomoa sapos iu trustim hem and garem faith long hem. Faith hem olsem man wea needim kaikai for mekem hem strong. For strongim faith bilong iu, iu mas evritaem ting raonem why nao iu biliv long God and wanem Bible talem.Readim Matthew 4:4; Hebrew 11:1, 6.

5. Taem iu fren witim God, hao nao datwan helpem iu?

Jehovah lukaftarem olketa wea lovem hem. Hem savve protectim iumi from eni samting wea savve spoelem faith bilong iumi and hope wea iumi garem for laef olowe. (Psalm 91:1, 2, 7-10) Hem warnim iumi for no duim olketa samting wea savve spoelem health bilong iumi and wea savve mekem iumi no hapi. Jehovah teachim iumi wanem nao best samting for duim long laef.Readim Psalm 73:27, 28; James 4:4, 8.