Skip to content

Skip to table of contents

Olketa Jehovah’s Witness

Chusim languis Solomon Islands Pidgin

Story 115: Niufala Paradaes Long Earth

Story 115: Niufala Paradaes Long Earth

LUKIM olketa tolfala tree, naesfala flaoa and hae maunten. Disfala ples hem luk naes tumas, iaman? Lukim hao deer hem kaikai from hand bilong smolfala boy. And lukim olketa lion and horse wea stap long there. Waswe, iu laek for stap insaed wanfala haos long wanfala ples olsem?

God laekem iu for stap olowe long earth insaed wanfala paradaes. And hem no laekem iu for garem olketa sik and pain wea mekem pipol safa distaem. Promis bilong Bible for olketa wea bae stap insaed niufala paradaes hem olsem: ‘God bae stap witim olketa. Dae, krae and pain bae nomoa tu. Evri samting bifor hem finis nao.’

Jesus bae mek sure olketa nambawan samting hia kamap. Waswe, iu savve long wanem taem? Bihaen hem finisim evri nogud fasin and nogud pipol long earth. Remember hao taem Jesus stap long earth hem healim pipol wea garem evri difren kaen sik, and hem mekem pipol wea dae finis for laef bak tu. Jesus duim diswan for showimaot hao hem bae duim diswan long full earth taem hem kamap King long kingdom bilong God.

Tingim hao evri samting bae gud tumas long datfala niu paradaes earth! Jesus, witim samfala wea hem chusim bae rul long heven. Olketa ruler hia bae lukaftarem evriwan long earth and mek sure olketa hapi. Bae iumi lukim samting iumi need for duim for mek sure God bae givim iumi laef olowe long datfala niu paradaes bilong hem.

Revelation 21:3, 4; 5:9, 10; 14:1-3.

Piksa bilong paradaes


Olketa Kwestin

  • Bible showim hao iumi bae garem wanem kaen living insaed Paradaes wea bae kamap long earth?
  • Wanem nao promis long Bible for olketa wea stap long Paradaes?
  • Wanem taem nao Jesus bae mek sure disfala nambawan samting hem happen?
  • Taem Jesus hem long earth, wanem nao hem duim for showim samting wea hem bae duim taem hem King long Kingdom Bilong God?
  • Jesus and olketa wea bae rul witim hem long heven bae mek sure long wanem samting taem olketa rul ovarem earth?

Samfala extra kwestin

  • Readim Revelation 5:9, 10.

    Why nao iumi sure olketa wea rul ovarem earth long datfala Thousand Year Rul bae olketa king and priest wea kaen and showimaot mercy? (Eph. 4:20-24; 1 Pet. 1:7; 3:8; 5:6-10)

  • Readim Revelation 14:1-3.

    Wei wea olketa raetem nem bilong Father and nem bilong Lamb long forhed bilong 144,000 showimaot wanem? (1 Cor. 3:23; 2 Tim. 2:19; Rev. 3:12)