Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 109: Peter Visitim Cornelius

Story 109: Peter Visitim Cornelius

APOSOL Peter nao standap long there, and samfala fren bilong hem standap bihaen. Bat why nao disfala man hem baodaon long Peter? Waswe, fitim hem for duim datwan? Waswe, iu savve hu nao hem?

Peter meetim Cornelius

Disfala man hem Cornelius. Hem wanfala bigman long army bilong Rome. Cornelius no savve long Peter, bat samwan talem hem for askem Peter for kam long haos bilong hem. Why nao hem duim olsem?

Olketa first follower bilong Jesus hem olketa Jew, bat Cornelius hem no wanfala Jew. Nomata olsem hem lovem God and prea long hem, and hem duim plande kaenfala samting long pipol. Long wanfala aftanun wanfala angel kam long hem and sei: ‘God hem hapi witim iu, and hem bae ansarem olketa prea bilong iu. Sendem samfala man for tekem kam wanfala man wea nem bilong hem Peter. Hem stap long Jop′pa long haos bilong Simon, wea stap klosap long sea.’

So Cornelius hem kwiktaem sendem samfala man for faendem Peter. Long nextfala day, taem olketa man klosap for kasem Jop′pa, Peter hem antap long flat ruf long haos bilong Simon. Long there God mekem Peter tingse hem lukim wanfala big kaleko wea kam daon from heven. Plande difren kaen animal nao stap insaed long datfala kaleko. Law bilong God hem sei olketa animal hia no fit for man kaikaim bikos olketa no klin, bat wanfala voice hem sei: ‘Getap Peter. Busarem and kaikaim.’

Peter hem sei: ‘Nomoa! Mi nating kaikaim samting wea no klin.’ Bat datfala voice talem Peter: ‘Samting wea distaem God sei hem klin, iu no sei hem no klin.’ Thrifala taem diswan hem happen. Taem Peter gohed for tingim wanem nao diswan minim, olketa man wea Cornelius sendem kasem datfala haos and ask for lukim Peter.

Peter hem go daon and sei: ‘Mi nao man wea iufala lukaotem. Why nao iufala kam?’ Taem olketa man hia sei wanfala angel nao talem Cornelius for invaetem Peter for go long haos bilong hem, Peter agree for go witim olketa. Long nextfala day Peter and samfala fren bilong hem go for visitim Cornelius long Caes‧a‧re′a.

Cornelius hem hipimap olketa relative and klos fren bilong hem. Taem Peter kam, Cornelius meetim hem. Hem baodaon front long Peter, olsem iu lukim long hia. Bat Peter hem sei: ‘Standap; mi wanfala man nomoa.’ Tru nao, Bible showimaot hao hem no stret for baodaon and worshipim man. Iumi mas worshipim Jehovah nomoa.

Then Peter hem preach long olketa wea hipap. Hem sei: ‘Mi lukim hao God acceptim evri pipol wea want for servem hem.’ And taem hem gohed story, God sendem holy spirit bilong hem, and olketa pipol hia start for toktok long olketa difren languis. Diswan mekem olketa Jew disaepol wea kam witim Peter sapraes fogud, bikos olketa tingse God hem laekem olketa Jew nomoa. So diswan teachim olketa hao God no tingse pipol bilong wanfala ples moabeta or moa important winim pipol bilong narafala ples. Datwan hem gudfala samting for iumi rememberim, iaman?

Acts 10:1-48; 11:1-18; Revelation 19:10.



Olketa Kwestin

  • Hu nao man wea baodaon insaed long piksa?
  • Wanem nao wanfala angel talem long Cornelius?
  • God mekem Peter for lukim wanem taem hem stap long ruf bilong haos bilong Simon long Joppa?
  • Why nao Peter talem Cornelius hao hem shud no baodaon and worshipim hem?
  • Why nao olketa Jew disaepol wea stap witim Peter sapraes fogud?
  • Wanem important leson nao iumi shud lanem from wei wea Peter visitim Cornelius?

Samfala extra kwestin

  • Readim Acts 10:1-48.

    Toktok bilong Peter wea stap long Acts 10:42 hem showimaot wanem samting abaotem waka for preachim gud nius bilong Kingdom? (Matt. 28:19; Mark 13:10; Acts 1:8)

  • Readim Acts 11:1-18.

    Wanem tingting nao Peter garem taem direction bilong Jehovah saed long olketa Gentile hem showaot klia, and hao nao iumi savve followim example bilong hem? (Acts 11:17, 18; 2 Cor. 10:5; Eph. 5:17)