Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Bible Story Buk Bilong Mi

Story 104: Jesus Go Bak Long Heven

Story 104: Jesus Go Bak Long Heven

TAEM olketa day go pas, Jesus showim hemseleva long olketa follower bilong hem plande taem. Wanfala taem, samting olsem 500 disaepol lukim hem. Waswe, iu savve wanem nao Jesus storyim taem hem showim hemseleva long olketa? Hem storyim kingdom bilong God. Jehovah sendem Jesus long earth for teach abaotem Kingdom. And hem gohed for duim diswan bihaen hem laef bak from dae tu.

Jesus go bak long heven

Waswe, iu rememberim wanem nao kingdom bilong God? Kingdom hem wanfala really gavman bilong God long heven, and Jesus nao datwan wea God chusim for kamap king. Olsem iumi lanem finis, Jesus showimaot wei wea hem bae kamap nambawan king taem hem feedim olketa wea hangre, healim olketa wea sik, and mekem olketa wea dae finis for laef bak tu!

So taem Jesus rul olsem king long heven for wan thousand year, disfala earth bae hao? Full earth bae kamap naesfala paradaes. Nomoa eni war bae stap, or raf fasin, or sik, or dae tu. Iumi savve diswan hem tru bikos God wakem earth for olsem wanfala paradaes for pipol for enjoyim. Dastawe hem mekem garden bilong Eden long firstaem. And Jesus bae mek sure samting wea God laekem mas kamap tru.

Hem taem nao for Jesus go bak long heven. For 40 day Jesus hem showim hemseleva long olketa disaepol bilong hem. So olketa barava sure hem laef bak nao. Bat bifor hem lusim olketa disaepol bilong hem, hem talem olketa: ‘Stap long Jerusalem go kasem taem iufala kasem holy spirit.’ Holy spirit hem paoa bilong God, olsem wind wea blow, wea bae helpem olketa follower bilong hem for duim will bilong God. Then last samting wea hem talem olketa, hem olsem: ‘Iufala mas preach abaotem mi long olketa farawe ples long earth.’

Bihaen Jesus talem diswan, wanfala spesol samting hem happen. Hem start for go ap long heven, olsem iu savve lukim long hia. Then wanfala cloud hem haedem hem and olketa disaepol no lukim Jesus moa. Jesus go long heven, and from there hem start for rul ovarem olketa follower bilong hem long earth.

Olketa disaepol luk go ap long skae

1 Corinthians 15:3-8; Revelation 21:3, 4; Acts 1:1-11.



Olketa Kwestin

  • Wantaem, haomas disaepol nao lukim Jesus, and hem storyim wanem samting long olketa?
  • Wanem nao Kingdom Bilong God, and taem Jesus rul olsem King for wan thousand year, laef bae waswe?
  • Haomas day nao Jesus hem showim hemseleva long olketa disaepol bilong hem, bat hem redi for duim wanem samting?
  • Bifor Jesus lusim olketa disaepol bilong hem, wanem nao hem talem olketa for duim?
  • Wanem nao iumi lukim long piksa, and hao nao gogo olketa no lukim Jesus moa?

Samfala extra kwestin

  • Readim 1 Corinthians 15:3-8.

    Why nao toktok bilong aposol Paul showimaot hem barava sure long resurrection bilong Jesus, and olketa Christian savve storyim olketa wanem samting long sem wei distaem? (1 Cor. 15:4, 7, 8; Isa. 2:2, 3; Matt. 24:14; 2 Tim. 3:1-5)

  • Readim Acts 1:1-11.

    Olsem samting wea Acts 1:8 hem talem, preaching waka hem spred go kasem wea? (Acts 6:7; 9:31; 11:19-21; Col. 1:23)